Zabbuli 116

¹Mmwagala Mukama, kubanga awulidde Eddoboozi lyange n'okwegayirira kwange.

²Kubanga antegedde okutu, Kyennaavanga mmukoowoola nga nkyali mulamu.

³Emigwa egy'okufa gyansiba. N'okulumwa kw'emagombe kwankwata: Ne ndaba ennaku n'okutegana.

⁴Ne ndyoka nkoowoola erinnya lya Mukama; Nti Ai Mukama, nkwegayiridde, omponye emmeeme yange.

⁵Mukama wa kisa, era mutuukirivu; Weewaawo, Katonda waffe alina okusaasira.

⁶Mukama akuuma abo abatalina nkwe: Najeezebwa, n'andokola.

⁷Komawo mu kiwummulo kyo, ggwe emmeeme yange; Kubanga Mukama akukoledde eby'ekisa ekingi.

⁸Kubanga omponyezza emmeeme yange okufa, Amaaso gange obutakaaba maziga, N'ebigere byange obutagwa.

⁹Naatambuliranga mu maaso ga Mukama Mu nsi y'abalamu.

¹⁰Nzikiriza, kubanga ndyogera: Nabonyaabonyezebwa nnyo:

¹¹Ne njogera nga nnyanguwa Nti Abantu bonna bulimba.

¹²Kiki kye ndisasula Mukama Olw'ebirungi bye byonna eri nze?

¹³Nditoola akakompe ak'obulokozi, Era ndikaabira erinnya lya Mukama.

¹⁴Ndisasula obweyamo bwange eri Mukama, Weewaawo, mu maaso g'abantu be bonna.

¹⁵Okufa kw'abatukuvu be Kwa muwendo mungi mu maaso ga Mukama.

¹⁶Ai Mukama, mazima nze ndi muddu wo: Nze ndi muddu wo, era omwana w'omuzaana wo; Osumuludde ebyansiba.

¹⁷Ndikuwa ssaddaaka ey'okwebaza, Era ndikaabira erinnya lya Mukama.

¹⁸Ndisasula obweyamo bwange eri Mukama, Weewaawo, mu maaso g'abantu be bonna;

¹⁹Mu mpya z'ennyumba ya Mukama, Wakati mu ggwe, ggwe Yerusaalemi. Mumutendereze Mukama.