Zabbuli 118

¹Mumwebaze Mukama; kubanga mulungi: Kubanga okusaasira kwe kubeerera emirembe gyonna.

²Isiraeri ayogere kaakano Nti okusaasira kwe kubeerera emirembe gyonna.

³Ennyumba ya Alooni eyogere kaakano Nti okusaasira kwe kubeerera emirembe gyonna.

⁴Abo abamutya Mukama boogere kaakano Nti okusaasira kwe kubeerera emirembe gyonna.

⁵Bwe nnali mu nnaku ne nkaabira Mukama: Mukama n'anjitaba, n'anteeka mu kifo ekigazi.

⁶Mukama ali ku luuyi lwange; siritya: Abantu bayinza kunkola ki?

⁷Mukama ali ku luuyi lwange mu abo abannyamba: Kyendiva ndaba bye njagala nga bituuse ku abo abankyaye.

⁸Kirungi okwesiganga Mukama Okusinga okwesiga abantu.

⁹Kirungi okwesiganga Mukama Okusinga okwesiga abalangira.

¹⁰Amawanga gonna ganneetoolodde: Mu linnya lya Mukama ndigazikiriza.

¹¹Ganneetoolodde; weewaawo, ganneetoolodde; Mu linnya lya Mukama ndigazikiriza.

¹²Banneetoolodde ng'enjuki; bazikidde ng'omuliro ogw'omu maggwa: Mu linnya lya Mukama ndibazikiriza.

¹³Bansoya nnyo okungwisa: Naye Mukama n'annyamba.

¹⁴Mukama ge maanyi gange, lwe luyimba lwange; Era afuuse obulokozi bwange.

¹⁵Eddoboozi ery'essanyu era ery'obulokozi liri mu weema ez'abatuukirivu; Omukono ogwa dddyo ogwa Mukama gukola eby'obuzira.

¹⁶Omukono ogwa ddyo ogwa Mukama gugulumizibwa: Omukono ogwa ddyo ogwa Mukama gukola eby'obuzira.

¹⁷Sirifa, naye naabeeranga mulamu, Era naabuuliranga omirimu gya Mukama.

¹⁸Mukama ambonerezza nnyo: Naye tangabulanga eri okufa.

¹⁹Munzigulirewo enzigi ez'obutuukirivu: Naaziyingiramu, ne nneebaza Mukama.

²⁰Olwo lwe luggi lwa Mukama; Abatuukirivu be baliyingiramu.

²¹Naakwebazanga, kubanga onzizeemu, Era ofuuse obulokozi bwange.

²²Ejjinja abazimbi lye baagaana Lifuuse ekkulu ery'oku nsonda.

²³Ekyo Mukama ye yakikola; Kya kitalo mu maaso gaffe.

²⁴Luno lwe lunaku Mukama lwe yakola; Tunaasanyuka, tunaajaguliza okwo.

²⁵Olokole kaakano, tukwegayiridde, ai Mukama: Ai Mukama, tukwegayiridde, oweereze omukisa kaakano.

²⁶Alina omukisa oyo ajja mu linnya lya Mukama: Tubasabidde omukisa nga tuyima mu nnyumba ya Mukama.

²⁷Mukama ye Katonda, era atuwadde omusana Musibe ssaddaaka n'emigwa, musibe ku mayembe g'ekyoto.

²⁸Ggwe oli Katonda wange, nange naakwebazanga: Ggwe oli Katonda wange, naakugulumizanga.

²⁹Kale mumwebaze Mukama; kubanga mulungi: Kubanga okusaasira kwe kubeerera emirembe gyonna.