Zabbuli 135

¹1 Mumutendereze Mukama. Mutendereze erinnya lya Mukama, Mumutendereze, mmwe abaddu ba Mukama:

²Mmwe abayimirira mu nnyumba ya Mukama, Mu mpya z'ennyumba ya Katonda waffe.

³Mumutendereze Mukama; kubanga Mukama mulungi: Muyimbe okutendereza erinnya lye; kubanga lya ssanyu.

⁴Kubanga Mukama yeeroboza Yakobo okuba owuwe, Ne Isiraeri okuba ow'envuma ye yekka.

⁵Kubanga mmanyi nga Mukama mukulu, Era nga Mukama waffe asinga bakatonda bonna.

⁶Buli ky'ayagadde Mukama akikoze, Mu ggulu ne mu nsi, mu nnyanja ne mu by'obuziba byonna.

⁷Anyoosa omukka okuva ku nkomerero z'ensi; Aleetera enjota enkuba; Afulumya empewo mu mawanika ge.

⁸Eyakuba ababereberye ab'e Misiri, Ab'abantu era n'ab'ensolo.

⁹Yaweereza obubonero n'eby'amagero wakati mu ggwe, ggwe Misiri, Ku Falaawo, ne ku baddu be bonna.

¹⁰Eyakuba amawanga amangi, N'atta bakabaka ab'amaanyi;

¹¹Sikoni kabaka w'Abamoli, Ne Ogi kabaka w'e Basani, N'amatwale gonna aga Kanani:

¹²N'agaba ensi yaabwe okuba obusika, Obusika eri Isiraeri abantu be.

¹³Erinnya lyo, ai Mukama, libeerera ennaku zonna; N'ekijjukizo kyo, ai Mukama, okutuusa emirembe gyonna.

¹⁴Kubanga Mukama alisalira omusango abantu be, Era alyejjusa mu bigambo eby'abaddu be.

¹⁵Ebifaananyi eby'amawanga ye ffeeza, ye zaabu, Omulimu ogw'emikono gy'abantu.

¹⁶Birina obumwa, naye tebyogera; Birina amaaso, naye tebiraba;

¹⁷Birina amatu, naye tebiwulira; So tewali mukka mu bumwa bwabyo.

¹⁸Ababikola balibifaanana; Weewaawo, buli abyesiga.

¹⁹Mmwe ennyumba ya Isiraeri, mumwebaze Mukama: Mmwe ennyumba ya Alooni, mumwebaze Mukama:

²⁰Mmwe ennyumba ya Leevi, mumwebaze Mukama: Mmwe abatya Mukama, mumwebaze Mukama.

²¹Mukama yeebazibwe okuva mu Sayuuni, Atuula mu Yerusaalemi. Mumutendereze Mukama.