Zabbuli 50

¹Katonda, Katonda, Mukama, ayogedde, N'ayita ensi okuva mu buvanjuba okutuuka mu bugwanjuba. Katonda amasamasizza.

²Okuva mu Sayuuni, obulungi obutuukiridde, Katonda amasamasizza.

³Katonda waffe alijja, so talisirika; Omuliro gulirya mu maaso ge, Omuyaga omungi gulimwetooloola.

⁴Alikoowoola eggulu waggulu, N'ensi, alyoke asalire abantu be omusango:

⁵Mukuŋŋaanye abatukuvu bange awamu we ndi; Abaalagaana nange endagaano n'essaddaaka.

⁶N'eggulu liribuulira obutuukirivu bwe; Kubanga Katonda ye mulamuzi yennyini. (Seera)

⁷Muwulire, abantu bange, nange naayogera; Ggwe Isiraeri, nange naakutegeeza; Nze Katonda, Katonda wo.

⁸Siikunenye lwa ssaddaaka zo; N'ebyokebwa byo biri mu maaso gange bulijjo.

⁹Siriggya seddume mu nnyumba yo. Newakubadde embuzi ennume mu bisibo byo.

¹⁰Kubanga buli nsolo ey'omu kibira yange, N'ente ez'oku nsozi lukumi.

¹¹Ennyonyi zonna ez'oku nsozi nzimanyi: N'ensolo ez'omu nsiko zange.

¹²Singa nnumwa enjala, sandikubuulidde: Kubanga ensi yange, n'okujjula kwayo.

¹³Nze naalyanga ennyama eya seddume, Oba naanywanga omusaayi gw'embuzi?

¹⁴Owenga Katonda ssaddaaka ey'okwebaza; Osasulenga obweyamo bwo ali waggulu ennyo:

¹⁵Era onkoowoolenga ku lunaku olw'okulaba ennaku; Ndikuwonya, naawe olingulumiza nze!

¹⁶Naye omubi Katonda amugamba nti Ofaayo ki okubuulira amateeka gange, N'oyingiza endagaano yange mu kamwa ko?

¹⁷Kubanga okyawa okuyigirizibwa, N'ebigambo byange obisuula ennyuma wo.

¹⁸Bwe walaba omubbi walagaana naye, Era wassa ekimu n'abenzi.

¹⁹Owaayo akamwa ko eri obubi, N'olulimi lwo lukola eby'obulimba.

²⁰Otuula ng'ovuma muganda wo; Era owaayiriza omwana wa nnyoko.

²¹Ebyo wabikola, nange ne nsirika; N'olowooza nga nenkanankanira ddala naawe: Naye ndikunenya, ne mbiteeka mu maaso go.

²²Kale mulowooze kino, mmwe abeerabira Katonda, Nneme okubataagulataagula, okubulawo alibawonya:

²³Buli ampa ssaddaaka ey'okwebaza angulumiza; Naye alongoosa obulungi ekkubo lye Ndimulaga obulokozi bwa Katonda.