Zabbuli 97

¹Mukama afuga; ensi esanyuke: Ebizinga bijaguze bwe byenkana obungi.

²Ebire n'ekizikiza bimwetooloola: Obutuukirivu n'omusango bye binyweza entebe ye.

³Omuliro gumukulembera, Gwokya abalabe be eruuyi n’eruuyi.

⁴Enjota ze zaamulisa ensi: Ensi n'eraba n'ekankana.

⁵Ensozi z'asaanuuka ng'envumbo awali Mukama, Awali Mukama w'ensi zonna.

⁶Eggulu libuulira obutuukirivu bwe, N'amawanga gonna galabye ekitiibwa kye.

⁷Bakwatibwe ensonyi bonna abasinza ebifaananyi ebyole, Abeenyumiriza olw'ebifaananyi: Mumusinze ye, mmwe bakatonda mwenna.

⁸Sayuuni yawulira n'asanyuka, N'abawala ba Yuda ne bajaguza; Olw'emisango gyo, ai Mukama.

⁹Kubanga ggwe, Mukama, oli waggulu nnyo ku nsi zonna: Ogulumizibwa okusinga ennyo bakatonda bonna.

¹⁰Kale mmwe abaagala Mukama, mukyawe obubi: Akuuma emmeeme z'abatukuvu be; Abawonya mu mukono gw'omubi.

¹¹Omusana gwasigirwa omutuukirivu, N'essanyu oyo alina omutima ogw'amazima.

¹²Musanyukire Mukama, mmwe abatuukirivu Era mwebaze erinnya lye ettukuvu.