Psalms 31

¹Na zo gare ka, ya Ubangiji, domin ka kiyaye ni.Kada ka bari a yi nasara da ni.Kai Allah mai adalci ne,Ka cece ni, ina roƙonka!

²Ka ji ni! Ka cece ni yanzu!Ka zama mafakata, don ka kiyaye ni,Ka zama mai kāre ni, don ka cece ni.

³Kai ne mafakata da kariyata,Ka bi da ni yadda ka alkawarta.

⁴Ka kiyaye ni daga tarkon da aka kafa domina,Kai ne inuwata.

⁵Ina ba da kaina gare ka domin ka kiyaye ni.Za ka fanshe ni, ya Ubangiji,Kai Allah mai aminci ne.

⁶Kana ƙin waɗanda suke yi wa gumaka sujada,Amma ni na dogara gare ka.

⁷Zan yi murna da farin ciki,Saboda madawwamiyar ƙaunarka.Ka ga wahalata,Ka kuwa san damuwata.

⁸Ba ka bar magabtana su kama ni ba,Ka kiyaye ni.

⁹Ka yi mini jinƙai, ya Ubangiji,Gama ina shan wahala,Idanuna sun gaji saboda yawan kuka,Na kuwa tafke ƙwarai!

¹⁰Baƙin ciki ya gajerta kwanakina,Kuka kuma ya rage shekaruna.Na raunana saboda yawan wahalata,Har ƙasusuwana suna zozayewa!

¹¹Magabtana duka suna mini ba'a,Maƙwabtana sun raina ni,Waɗanda suka san ni kuwa suna jin tsorona,Sa'ad da suka gan ni a kan titi sukan guje mini.

¹²Duk an manta da ni kamar matacce,Na zama kamar abin da aka jefar.

¹³Na ji magabtana da yawa suna raɗa,Razana ta kewaye ni!Suna ƙulla maƙarƙashiya don su kashe ni.

¹⁴Amma a gare ka na dogara, ya Ubangiji,Kai ne Allahna.

¹⁵Kana lura da ni kullum,Ka cece ni daga magabtana,Daga waɗanda suke tsananta mini.

¹⁶Ni, bawanka ne,Ka dube ni da alherinka,Ka cece ni saboda madawwamiyar ƙaunarka!

¹⁷Ina kira gare ka, ya Ubangiji,Kada ka bari a ci nasara a kaina!Ka sa a ci nasara a kan mugaye,Ka sa su yi shiru a lahira.

¹⁸Ka rufe bakin maƙaryatan canDukan masu girmankai da masu fāriya,Waɗanda suke wa adalai maganar raini!

¹⁹Abin al'ajabi ne irin tanadin da ka yi wa masu tsoronka!Abin da kake aikatawa a gaban kowa kuma,Yana da banmamaki.Kana kiyaye waɗanda suke amincewa da kai.

²⁰Ka ɓoye su a wurinka lafiya daga makircin mutane,A inuwa mai lafiya ka ɓoye su daga zargin magabtansu.

²¹Yabo ya tabbata ga Ubangiji!Gama ya nuna mini ƙaunarsa mai ban al'ajabi,Sa'ad da aka kewaye ni, aka fāɗa mini!

²²Na ji tsoro, na zaci ka jefar da ni ne daga gabanka.Amma ka ji kukana sa'ad da na yi kira gare ka neman taimako.

²³Ku ƙaunaci Ubangiji, ku amintattun jama'arsa duka!Ubangiji yana kiyaye masu aminci,Amma yakan hukunta masu girmankai da tsanani.

²⁴Ku ƙarfafa, ku yi ƙarfin hali,Dukanku da kuke sa zuciya ga Ubangiji!