Psalms 69

¹Ka cece ni, ya Allah!Ruwa ya sha kaina.

²Ina nutsewa cikin laka mai zurfi,Ba kuwa ƙasa mai ƙarfi,Na tsunduma cikin ruwa mai zurfi,Raƙuman ruwa kuwa sun kusa kashe ni.

³Na gaji da kira, ina neman taimako,Maƙogwarona yana yi mini ciwo,Idanuna duka sun gaji,Saboda ina zuba ido ga taimakonka.

⁴Waɗanda suke ƙina ba daliliSun fi gashin kaina yawa,Waɗanda suke baza ƙarya suke ƙina,Suna da ƙarfi, suna kuwa so su kashe ni.Suka tilasta ni in mayar da abubuwan da ba satarsu na yi ba.

⁵Zunubaina ba a ɓoye suke a gare ka ba ya Allah,Ka san irin wawancin da na yi!

⁶Kada ka bar ni in jawo kunya ga waɗanda suka dogara gare ka,Ya Ubangiji Allah Mai Iko Dukka!Kada ka bar ni in jawo abin kunyaGa waɗanda suke maka sujada, ya Allah na Isra'ila!

⁷Sabili da kai ne aka ci mutuncina,Kunya ta rufe ni.

⁸Kamar baƙo nake ga 'yan'uwana,Haka ma ga iyalina, kamar baƙo nake.

⁹Ƙaunar da nake da ita ta yin ibada a HaikalinkaTana iza ni a ciki kamar wuta,Zargin da suke yi a kanka, ya fāɗa a kaina.

¹⁰Na ƙasƙantar da kaina ta wurin yin azumi,Jama'a kuwa suka ci mutuncina.

¹¹Na sa tufafin makoki,Sai suka maishe ni abin dariya.

¹²A tituna suna ta magana a kaina,Bugaggu da giya kuwa suna raira waƙa a kaina.

¹³Amma ni, zan yi addu'a gare ka, ya Ubangiji,Ka amsa mini, ya Allah, a lokacin da ka zaɓa,Sabili da muhimmiyar ƙaunarka,Saboda kana cika alkawarinka na yin ceto.

¹⁴Ka cece ni daga nutsewa cikin wannan laka,Ka kiyaye ni daga maƙiyana,Daga kuma wannan ruwa mai zurfi.

¹⁵Kada ka bar ambaliyar ruwa ta rufe ni.Kada ka bar ni in mutu cikin zurfafa,Ko in nutse a cikin kabari.

¹⁶Sabili da madawwamiyar ƙaunarka, ka amsa mini, ya Ubangiji,Ka juyo wurina, saboda juyayinka mai girma!

¹⁷Kada ka ɓoye kanka daga bawanka,Ina shan babbar wahala, ka yi hanzari ka amsa mini!

¹⁸Ka zo ka fanshe ni,Ka kuɓutar da ni daga abokan gābana.

¹⁹Ka san yadda ake cin mutuncina,Da yadda ake kunyata ni, ake ƙasƙantar da ni,Kana ganin dukan abokan gābana.

²⁰Zuciyata ta karai saboda cin mutuncin da ake ci mini,Ni kuwa ba ni da mataimaki,Na sa zuciya za a kula da ni,Amma babu.Na sa zuciya zan sami ta'aziyya,Amma ban samu ba.

²¹Sa'ad da na ji yunwa, sai suka ba ni dafi,Sa'ad da na ji ƙishi, sai suka ba ni ruwan tsami.

²²Allah ya sa bukukuwansu su zama lalacewarsu,Shagulgulansu kuma su zama sanadin fāɗuwarsu!

²³Ka makantar da su, har da ba za su iya gani ba,Kullum ka sa bayansu ya ƙage!

²⁴Ka kwarara musu fushinka,Bari zafin fushinka ya ci musu!

²⁵Allah ya sa su gudu su bar sansaninsu,Kada wani ya ragu da rai cikin alfarwansu!

²⁶Sun tsananta wa waɗanda ka hukunta,Suna taɗin shan wuyar waɗanda ka aukar wa cutar.

²⁷Ka riɓaɓɓanya zunubansu,Kada ka bar su su sami rabon kome daga cikin cetonka.

²⁸Ka sa a goge sunansu daga cikin littafin rai,Kada a sa su a lissafin jama'arka.

²⁹Amma ni mai bukata ne, ina shan wahala,Ka tsame ni, ya Allah, ka cece ni!

³⁰Zan raira waƙar yabo ga Allah,Zan yi shelar girmansa ta wurin yi masa godiya,

³¹Wannan zai daɗaɗa wa Ubangiji raiFiye da hadayar bijimi,Fiye da a ba shi bijimi bana bakwai.

³²Sa'ad da masu bukata suka ga wannan za su yi murna,Waɗanda suke yi wa Allah sujada kuwa za a ƙarfafa su.

³³Ubangiji yana kasa kunne ga masu bukata,Bai manta da jama'arsa da suke a kurkuku ba.

³⁴Ku yabi Allah, ku al'arshi da duniya, ku yabi Allah,Tekuna da dukan talikan da suke cikinsu!

³⁵Gama zai ceci Sihiyona,Ya sāke gina garuruwan Yahuza,Jama'arsa za su zauna a wurin, su mallaki ƙasar.

³⁶Zuriyar bayinsa za su gāje ta,Masu ƙaunarsa za su zauna a wurin.