Psalms 83

¹Ya Allah, kada ka yi shiru,Kada ka tsaya cik,Ya Allah, kada kuma ka yi tsit!

²Duba, abokan gābanka suna tawaye,Maƙiyanka sun tayar.

³Suna ta ƙulle-ƙulle a asirce gaba da jama'arka,Suna shirya maƙarƙashiya gāba da waɗanda kake tsaronsu.

⁴Suna cewa, “Ku zo, mu hallakar da al'ummarsu,Don a manta da Isra'ila har abada!”

⁵Suka yarda a kan abin da suka shirya,Suka haɗa kai gāba da kai.

⁶Su ne mutanen Edom, da Isma'ilawa,Da mutanen Mowab, da Hagarawa,

⁷Da mutanen Gebal, da na Ammon, da na Amalek,Da na Filistiya, da na Taya.

⁸Assuriya ma ta haɗa kai da su,Haɗa kai ke nan mai ƙarfi da zuriyar Lutu.

⁹Ka yi musu yadda ka yi wa Madayanawa,Ka yi musu yadda ka yi wa SiseraDa Yabin a Kogin Kishon,

¹⁰Waɗanda aka kora a Endor,Gawawwakinsu kuwa suka ruɓe a ƙasa.

¹¹Ka yi wa shugabannin yaƙinsu yadda ka yi wa Oreb da Ziyib,Ka kori dukan masu mulkinsu yadda ka kori Zeba da Zalmunna,

¹²Waɗanda suka ce, “Za mu ƙwace ƙasar da take ta Allah, ta zama tamu.”

¹³Ya Allahna, ka warwatsa su kamar ƙura,Ka warwatsa su kamar ciyayin da iska take hurawa.

¹⁴Kamar yadda wuta take cin jeji,Kamar yadda harshen wuta yake ƙone tuddai,

¹⁵Ka runtume su da hadirinka,Ka razanar da su da iskarka mai ƙarfi.

¹⁶Ya Ubangiji, ka sa kunya ta rufe su,Don su so su bauta maka.

¹⁷Ka sa a kore su, a razanar da su har abada,Ka sa su mutu, mutuwar ƙasƙanci!

¹⁸Ka sa su sani kai kaɗai ne Ubangiji,Kai kaɗai ne mamallakin dukan duniya!