Psalms 85

¹Ya Ubangiji, ka yi wa ƙasarka alheri,Ka sāke arzuta Isra'ila kuma.

²Ka gafarta wa jama'arka zunubansu,Ka kuwa gafarta musu dukan kuskurensu,

³Ka daina yin fushi da su,Ka kuwa kawar da zafin fushinka.

⁴Ka komo da mu, ya Allah Mai Cetonmu,Ka daina jin haushinmu!

⁵Za ka yi fushi da mu har abada?Ba za ka taɓa hucewa ba?

⁶Ka daɗa mana ƙarfi, ka yarda ka sabunta ƙarfinmu,Mu kuwa, jama'arka, za mu yabe ka.

⁷Ka ƙaunace mu da madawwamiyar ƙaunarka, ya Ubangiji,Ka taimake mu da cetonka.

⁸Ina kasa kunne ga abin da Ubangiji Allah yake cewa,Mu da muke mutanensa, ya alkawarta mana salama,Idan ba mu koma kan al'amuranmu na wauta ba.

⁹Hakika a shirye yake yă ceci waɗanda suke girmama shi,Kasancewarsa a ƙasar, ceto ne ga ƙasar.

¹⁰Ƙauna da aminci za su sadu wuri ɗaya,Adalci da salama za su gamu.

¹¹Amincin mutum zai yunƙura daga duniya, yă nufi sama.Adalcin Allah kuwa zai dubo daga Sama.

¹²Ubangiji zai arzuta mu,Ƙasarmu kuwa za ta ba da amfanin gona mai yawa.

¹³Adalci zai yi tafiya a gaban Ubangiji,Yă shirya masa tafarki.