1 Chronicles 11

¹Hĩndĩ ĩo Aisiraeli othe magĩgĩĩcokanĩrĩria he Daudi kũu Hebironi, makĩmwĩra ũũ: Atĩrĩrĩ, tũrĩ a mũthimo ũmwe nawe, o na a mwĩrĩ ũmwe.

²O na tene, hĩndĩ ĩrĩa Saulu aarĩ mũthamaki-rĩ, wee nĩwe watongoragia mbũtũ cia Isiraeli igĩthiĩ ita, o na ikĩinũka; nake Jehova Ngai waku agĩkwĩra atĩrĩ, Wee nĩwe ũrĩrĩithagia andũ akwa Isiraeli, na nĩwe ũgatuĩka mũtongoria wa andũ akwa Isiraeli.

³Tondũ ũcio athuri othe a Isiraeli magĩthiĩ magĩkinya he mũthamaki o kũu Hebironi; nake Daudi ũcio akĩrĩkanĩrĩra nao kũu Hebironi mbere ya Jehova; nao magĩgĩitĩrĩria Daudi maguta atuĩke mũthamaki wa gũthamakĩra Isiraeli, o ta ũrĩa ũhoro wa Jehova watariĩ ũrĩa aaririe na kanua ga Samueli.

⁴Nake Daudi, o na Aisiraeli othe, magĩthiĩ Jerusalemu (na nokuo Jebusi), nao Ajebusi, o and�� arĩa maatũũraga bũrũri ũcio, maarĩ kuo.

⁵Nao andũ acio maatũũraga Jebusi makĩĩra Daudi atĩrĩ, Ndũngĩtonya gũkũ. No rĩrĩ, o na moiga ũguo, Daudi nĩaatunyanire kĩhingo kĩu kĩa hinya gĩa Zayuni; na nokĩo gĩĩtagwo itũũra rĩa Daudi.

⁶Nake Daudi akiuga atĩrĩ, Mũndũ o wothe ũrĩa ũrĩamba kũhũra Ajebusi-rĩ, nĩwe ũgũtuĩka mũnene, na mũtongoria wa ita. Nake Joabu wa Zeruia nĩwe wakĩambire kwambata, nake agĩgĩtuwo mũnene.

⁷Nake Daudi agĩgĩtũũra kĩhingo-inĩ kĩu kĩa hinya, na tondũ ũcio gĩgĩcoka gwĩtwo itũũra rĩa Daudi.

⁸Ningĩ agĩaka njirigo akĩrigicĩria itũũra rĩu na mbarĩ ciothe kuuma Milo, nake Joabu agĩcokereria itũũra rĩu kũrĩa gwatigarĩte.

⁹Daudi agĩgĩkĩrĩrĩria kũgĩa na ũnene, nĩ gũkorũo Jehova, Mũnene wa ita, aarĩ hamwe nake.

¹⁰Na rĩrĩ, aya nĩo anene a njamba iria Daudi aarĩ nacio, o acio maamũteithagia na hinya wao wothe ũhoro-inĩ wake wa ũthamaki, makĩmũtua mũthamaki wao me hamwe na Isiraeli othe o ta ũrĩa uuge wa Jehova watariĩ ũkoniĩ Isiraeli.

¹¹Naguo ũyũ nĩguo mũigana wa njamba icio ciarĩ na Daudi: Jashobeamu, mũrũ wa Mũhakimoni, nĩwe warĩ mũnene wa andũ arĩa mĩrongo ĩtatũ; ũcio nĩwe woire itimũ rĩake na igũrũ akahũrane na andũ magana matatũ, nake akĩmoraga o ihinda o rĩmwe.

¹²Na thutha wake haarĩ Eleazaru, mũrũ wa Dodo, Mũahohi, ũmwe wa njamba iria ithatũ.

¹³Ũcio nĩwe warĩ hamwe na Daudi Pasi-damimu, o kũu Afilisiti monganĩte marũĩre mbaara handũ haarĩ gĩcigo kĩa mũgũnda kĩaiyũrĩte cairi; nao andũ magĩgĩkorũo morĩire Afilisiti.

¹⁴Nao andũ acio makĩrũgama o mũgũnda ũcio gatagatĩ, makĩgiria Afilisiti maũkinye, makĩũraga Afilisiti; nake Jehova akĩmahonokia ihonokania inene.

¹⁵Ningĩ kwarĩ andũ atatũ thĩinĩ wa acio mĩrongo ĩtatũ anene maaikũrũkire magĩkinya he Daudi rũaro-inĩ rũa ihiga, magĩtonya ngurunga-inĩ ya Adulamu; nayo ita ya Afilisiti ĩgĩkorũo yambĩte hema ciayo gĩtuamba kĩa Refaimu.

¹⁶Nake Daudi, hĩndĩ ĩo, agĩkorũo arĩ kĩhingo-inĩ gĩakĩtwo na hinya, nakĩo gĩtungati kĩa Afilisiti gĩgaikara Bethi-lehemu.

¹⁷Nake Daudi aaigua abataire mũno agĩkiuga atĩrĩ, Hĩ, na arĩ korũo he mũndũ ũngĩ’he maĩ ma gĩthima kĩa Bethi-lehemu kĩrĩa kĩrĩ kĩhingo-inĩ ’nyue!

¹⁸Nao andũ acio atatũ magĩtũrĩkĩria thĩinĩ wa ita ya Afilisiti, magĩtaha maĩ gĩthima-inĩ kĩu kĩa Bethi-lehemu, o kĩu kĩrĩ kĩhingo-inĩ, magĩthiĩ namo, makĩmatwarĩra Daudi; no Daudi ndaigana gwĩtĩkĩra kũmanyua, nĩ gũita aamaitire thĩ amarutĩre Jehova, ta marĩ ma igongona.

¹⁹Nake agĩkiuga atĩrĩ, Ngai wakwa arongiria njĩke ũndũ ũcio! Kaĩ ingĩkĩhota atĩa kũnyua thakame ya andũ arĩa metwarĩrĩire ũgwati-inĩ wa gĩkuũ? Nĩ gũkorũo maĩ macio mamarehete nĩ ũndũ wa ũrĩa metwarĩrĩire ũgwati-inĩ wa gĩkuũ. Na tondũ ũcio ndaigana gwĩtĩkĩra kũmanyua. Maũndũ macio nĩmo njamba icio ithatũ ciekire.

²⁰Nake Abishai, mũrũ wa ithe na Joabu, nĩwe warĩ mũnene wa acio atatũ; nĩ ũndũ nĩwe woire itimũ rĩake akĩrũa na andũ magana matatũ, agĩkĩmoraga, akĩgĩa igweta mũno thĩinĩ wa acio atatũ.

²¹Na rĩrĩ, thĩinĩ wa acio atatũ-rĩ, nĩwe watĩĩkire gũkĩra acio angĩ erĩ, agĩgĩtuwo mũnene wao; no rĩrĩ, ndaigana kũgĩa igweta ta acio angĩ atatũ a mbere.

²²Nake Benaia, mũrũ wa Jehoiada, mũrũ wa mũndũ njamba wa Kabizeeli, ũrĩa wekĩte maũndũ ma hinya-rĩ, nĩwe woragire ariũ erĩ a Arieli wa Moabi; o na ningĩ agĩikũrũka agĩtonya irima hĩndĩ ya tharunji akĩũragĩra mũrũthi kuo;

²³na ningĩ akĩũraga Mũmisiri warĩ karau akĩonwo, na aarĩ wa mĩkono ĩtano kũraiha na igũrũ, nakuo guoko kwa Mũmisiri ũcio kwanyitĩte itimũ rĩigana o ta mũtĩ wa mũtambo ũrĩa ũtumaga tama; nake Benaia aaikũrũkire agĩthiĩ harĩ we na rũthanju, nake akĩhuria itimũ rĩu rĩarĩ guoko kwa Mũmisiri ũcio, akĩmũũraga na itimũ rĩu rĩake we mwene.

²⁴Maũndũ macio nĩmo mekirũo nĩ Benaia mũrũ wa Jehoiada, nake agĩkĩgĩa igweta mũno thĩinĩ wa acio atatũ maarĩ njamba.

²⁵Na atĩrĩrĩ, mũndũ ũcio aatĩĩkire mũno gũkĩra acio angĩ mĩrongo ĩtatũ, no rĩrĩ, ndaigana kũgĩa igweta ta acio atatũ a mbere. Nake Daudi akĩmũtua mwathi wa arĩa maamũrangagĩra.

²⁶Ningĩ andũ arĩa maarĩ njamba thĩinĩ wa athigari a ita-rĩ, nĩ Asaheli mũrũ wa ithe na Joabu, na Elihanani mũrũ wa Dodo wa kũu Bethi-lehemu,

²⁷na Shamothu, ũrĩa Mũhiarori, na Helezu, Mũpelori,

²⁸na Ira, mũrũ wa Ikeshu, Mũtekoa, na Abiezeru, Mũanathothu,

²⁹na Sibekai, Mũhushathi, na Ilai, Mũahohi,

³⁰na Maharai, Mũnetofathi, na Heledĩ, mũrũ wa Baana ũrĩa Mũnetofathi,

³¹na Ithai, mũrũ wa Ribai wa kũu Gibea, wa ciana cia Benjamiri, na Benaia, Mũpirathoni,

³²na Hurai wa tũrũũĩ-inĩ twa Gaashi, na Abieli, Mũaribathi,

³³na Azamavethu, Mũbaharumi, na Eliahaba, Mũshalaboni,

³⁴na ariũ a Hashemu, Mũgizoni, na Jonathani mũrũ wa Shage, Mũharari,

³⁵na Ahiamu mũrũ wa Sakaru, Mũharari, na Elifali, mũrũ wa Uri,

³⁶na Heferi, Mũmekerathi, na Ahija, Mũpeloni,

³⁷na Hezoro, Mũkarimeli, na Naarai, mũrũ wa Ezibai,

³⁸na Joeli, mũrũ wa ithe na Nathani, na Mibihari, mũrũ wa Hagari,

³⁹na Zeleki, Mũamoni, na Naharai, Mũberothi, ũrĩa wakuuagĩra Joabu, mũrũ wa Zeruia, indo ciake cia mbaara,

⁴⁰na Ira, Mũithiri, na Garebu, Mũithiri,

⁴¹na Uria, Mũhiti, na Zabadi, mũrũ wa Ahalai,

⁴²na Adina, mũrũ wa Shiza, Mũreubeni, mũnene ũmwe wa Areubeni, e na andũ mĩrongo ĩtatũ,

⁴³na Hanani, mũrũ wa Maaka, na Joshafatu, Mũmithini,

⁴⁴na Uzia, Mũashiterathi, na Shama na Jeieli, ariũ a Hothamu, Mũaroeri,

⁴⁵na Jediaeli, mũrũ wa Shimuri, na Joha, mũrũ wa ithe, ũrĩa warĩ Mũtizi,

⁴⁶na Elieli, Mũmahavi, na Jeribai na Joshavia, ariũ a Elinaamu, na Ithima, Mũmoabi,

⁴⁷na Elieli, na Obedi, na Jaasieli, Mũmezobai.