1 Chronicles 12

¹Na rĩrĩ, andũ aya nĩo maakinyire he Daudi o kũu Zikilagi, hĩndĩ ĩrĩa aaikarĩte ehithĩte nĩ ũndũ wa Saulu, mũrũ wa Kishu; nao maarĩ a thiritũ ya njamba iria ciamũteithagia ita-inĩ.

²Nao maakuuaga mota; ningĩ nĩmaahotaga gũikia mahiga na kĩgũtha, o na mĩguĩ na ũta, na moko mao ma ũrĩo o na ma ũmotho, nao andũ acio-rĩ, maarĩ Abenjamini, ariũ a ithe na Saulu.

³Nake mũnene wao nĩ Ahiezeri, na thutha wake nĩ Joashu, nao maarĩ ariũ a Shemaa, Mũgibea; na Jezieli, na Peleti, ariũ a Azimavethu, na Beraka, na Jehu, Mũanathothu,

⁴na Ishimaia, Mũgibeoni, ũrĩa warĩ njamba thĩinĩ wa acio mĩrongo ĩtatũ, nake nĩwe waroraga andũ acio mĩrongo ĩtatũ; na Jeremia, na Jahazieli, na Johanani, na Jozabadu ũrĩa warĩ Mũgederathi,

⁵na Eluzai, na Jerimothu, na Bealia, na Shemaria, na Shefatia, Mũharufi,

⁶na Elikana, na Ishia, na Azareli, na Joezeru, na Jashobeamu, Akora;

⁷na Joela, na Zebadia, ariũ a Jerohamu wa Gedori.

⁸Na thĩinĩ wa Agadi kwarĩ amwe meamũrire magĩthiĩ kwĩ Daudi kĩhingo-inĩ kĩu gĩaakĩtwo na hinya o kũu werũ-inĩ; nao maarĩ njamba irĩ hinya, na nĩmaarutĩtwo kũrũa mbaara, makahota kũrũmia ngo o na itimũ; namo mothiũ mao maahaanaga o ta mothiũ ma mĩrũthi, nao maarĩ ihenya o ta thwariga irĩ irĩma-inĩ;

⁹Ezeri nĩwe warĩ mũnene wao, na wa kerĩ nĩ Obadia, na wa gatatũ nĩ Eliabu,

¹⁰na wa kana nĩ Mishimana, na wa gatano nĩ Jeremia,

¹¹na wa gatandatũ nĩ Atai, na wa mũgwanja nĩ Elieli,

¹²na wa anana nĩ Johanani, na wa kenda nĩ Elizabadu,

¹³na wa ikũmi nĩ Jeremia, na wa ikũmi na ũmwe nĩ Makabanai.

¹⁴Andũ acio a ariũ a Gadi maarĩ anene a athigari a mbũtũ ya ita; ũrĩa warĩ mũnyinyi gũkĩra arĩa angĩ thĩinĩ wao-rĩ, mũrũĩre wake no ta wa kũhoota andũ igana rĩmwe mbaara-inĩ, na ũrĩa mũnene mũrũĩre wake no ta wa kũhoota andũ ngiri.

¹⁵Acio nĩo maathiire makĩringa Jorodani, mweri wa mbere, hĩndĩ ĩrĩa rũaiyũrĩte rũgathika hũgũrũrũ ciaruo ciothe, nao magĩtũma arĩa othe maarĩ kũu ituamba-inĩ more, o arĩa maarĩ a mwena wa irathĩro o na mwena wa ithũĩro.

¹⁶Nakuo kũu gũgĩthiĩ ciana imwe cia Benjamini, o na cia Juda, igĩkinya o kĩhingo-inĩ kĩu he Daudi.

¹⁷Nake Daudi akiumagara nĩguo agacitũnge, agĩcokia agĩciĩra atĩrĩ, Mũngĩkorũo mũũkĩte kũrĩ niĩ na thayũ, nĩguo mũndeithie-rĩ, hau nĩho ngoro yakwa ĩngĩiguanĩra na inyuĩ; no rĩrĩ, mũngĩkorũo mũũkĩte kũngunyanĩra ’nyitwo nĩ thũ ciakwa, kuona atĩ hatirĩ ihĩtia ’hĩtĩtie-rĩ, Ngai wa maithe maitũ arorora ũndũ ũcio, na aũkaananie.

¹⁸Hĩndĩ ĩo Amasai, mũnene wa andũ acio mĩrongo ĩtatũ, akĩgwatwo nĩ roho, akiuga atĩrĩ, Ithuĩ tũrĩ aku, wee Daudi na tũrĩ a mwena waku, wee mũrũ wa Jesii: ũrogĩa na thayũ, o thayũ ki, o nao arĩa magũteithagia marogĩa na thayũ; nĩ gũkorũo Ngai waku nĩwe ũgũteithagia. Hĩndĩ ĩo Daudi akĩmetĩkĩra matuĩke a thiritũ yake, agĩkĩmatua anene a athigari ake a ita.

¹⁹Ningĩ haarĩ andũ amwe a Manase morĩire he Daudi hĩndĩ ĩrĩa aathiire hamwe na Afilisiti kũhũrana na Saulu; no matiamateithirie; nĩ gũkorũo aathani a Afilisiti, tondũ wa gũtaarũo kũrĩa maataarirũo, nĩmaamwĩrire ethiĩre, makiuga atĩrĩ, Ndarĩ hinya agĩkoora acoke he mwathi wake Saulu, nacio ciongo ciitũ igĩe na ũgwati wa gũtinio.

²⁰Na rĩrĩ, rĩrĩa aacokaga Zikilagi nĩguo andũ amwe a Manase metwarire harĩ we, nao nĩ Adina, na Jozabadu, na Jediaeli, na Mikaeli, na Jozabadu, na Elihu, na Zilethai nao maarĩ anene a athigari ngiri a Manase.

²¹Nao magĩgĩteithia Daudi kũhũrana na gĩtungati kĩrĩa gĩatharĩkanĩire; nĩ ũndũ othe maarĩ njamba irĩ hinya, na maarĩ anene a athigari a mbũtũ ya ita.

²²Nĩ ũndũ he Daudi mũthenya o mũthenya nĩhaathiaga andũ makamũteithie, o nginya magĩtuĩka mbũtũ nene, ĩgĩtuĩka o ta mbũtũ ya Ngai.

²³Na rĩrĩ, ũyũ nĩguo mũigana wa anene thĩinĩ wa arĩa meohete indo cia mbaara, o acio maakinyire he Daudi kũu Hebironi, nĩguo makagarũre ũthamaki wa Saulu ũtuĩke wa Daudi, o ta ũrĩa uuge wa Jehova watariĩ.

²⁴Thĩinĩ wa ciana cia Juda-rĩ, andũ arĩa meohete indo cia mbaara me na ngo na matimũ maarĩ ngiri ithathatũ na magana manana.

²⁵Ningĩ thĩinĩ wa ciana cia Simeoni, kwarĩ andũ ngiri mũgwanja na igana rĩmwe, njamba irĩ hinya cia kũrũa mbaara.

²⁶Ningĩ thĩinĩ wa ciana cia Lawii kwarĩ ngiri inya na magana matandatũ.

²⁷Nake Jehoiada nĩwe warĩ mũtongoria wa nyũmba ya Haruni, nao andũ arĩa maarĩ hamwe nake maarĩ ngiri ithatũ na magana mũgwanja,

²⁸magĩũka na Zadoku, mwanake, njamba ĩrĩ hinya, o na anene a athigari a ita mĩrongo ĩĩrĩ na erĩ a nyũmba ya ithe.

²⁹Ningĩ thĩinĩ wa ciana cia Benjamini, ariũ a ithe na Saulu maarĩ ngiri ithatũ; no mbere ya hĩndĩ ĩo andũ arĩa maarĩ aingĩ thĩinĩ wao maatũire maathĩkagĩra nyũmba ya Saulu.

³⁰O na thĩinĩ wa ciana cia Efiraimu maarĩ ngiri mĩrongo ĩĩrĩ na magana manana, njamba irĩ hinya theri, o andũ maarĩ igweta thĩinĩ wa nyũmba cia maithe mao.

³¹O na thĩinĩ wa nuthu ĩrĩa ya mũhĩrĩga wa Manase maarĩ ngiri ikũmi na inyanya, o arĩa maagwetirũo marĩĩtwa mao, nĩguo mathiĩ magatue Daudi mũthamaki.

³²Ningĩ thĩinĩ wa ciana cia Isakaru-rĩ, kwarĩ andũ maarĩ na ũũgĩ wa gũkũũrana ũhoro wa mahinda mao, mamenye ũrĩa Aisiraeli maagĩrĩirũo nĩ gwĩka, nao maarĩ na anene ao magana merĩ; nao ariũ arĩa angĩ othe a ithe wao maathagwo nĩo.

³³O na thĩinĩ wa Zebuluni arĩa maahotaga kuumagara mathiĩ na mbũtũ ya ita, o na makahota kwarania ita, marĩ na indo cia mbaara cia mĩthemba yothe, andũ acio-rĩ, maarĩ ngiri mĩrongo ĩtano; nao nĩmaahotaga kũnuna ita wega, na matiarĩ a ngoro igĩrĩ.

³⁴Na thĩinĩ wa Nafitali kwarĩ anene a ita ngiri ĩmwe; nao andũ arĩa maarĩ hamwe nao magwatĩte ngo na matimũ maarĩ ngiri mĩrongo ĩtatũ na mũgwanja.

³⁵Ningĩ thĩinĩ wa ciana cia Dani kwarĩ andũ ngiri mĩrongo ĩĩrĩ na inyanya na magana matandatũ arĩa maahotaga kwarania ita.

³⁶O na thĩinĩ wa Asheri kwarĩ ngiri mĩrongo ĩna arĩa maahotaga kuumagara mathiĩ na mbũtũ ya ita, o na makahota kwarania ita.

³⁷Na rĩrĩ, mũrĩmo ũrĩa ũngĩ wa Jorodani, thĩinĩ wa Areubeni, o na Agadi, o na nuthu ya mũhĩrĩga wa Manase, kwarĩ andũ ngiri igana na mĩrongo ĩĩrĩ arĩa maarĩ na indo cia mbaara cia mĩthemba yothe, nĩguo mathiĩ ita nacio.

³⁸Acio othe-rĩ, maarĩ andũ a ita arĩa maahotaga kwarania ita, na nĩo maakinyire Hebironi marĩ na ngoro o ro ĩmwe kũna ya gũtua Daudi mũthamaki wa andũ othe a Isiraeli; o nao andũ arĩa angĩ othe maatigarĩte a Isiraeli maarĩ na ngoro o ro ĩmwe ũhoro-inĩ ũcio wa gũtua Daudi mũthamaki.

³⁹Nao maaikarire na Daudi mĩthenya ĩtatũ kũu aarĩ, makĩrĩa o na makĩnyua; nĩ gũkorũo ariũ a ithe wao nĩmaamethagathagĩire mamatuge.

⁴⁰O na ningĩ-rĩ, andũ arĩa maatũire gũkuhĩ nao, o nginya Isakaru, na Zebuluni, na Nafitali, nĩmaatwarithirie irio kuo ikuuĩtwo nĩ ndigiri, na ngamĩra, na nyũmbũ, o na ndegwa, nacio nĩ mũtu ũthondeketwo wa kũrĩo, na ikũmba cia ngũyũ ngime, na imanjika cia thabibu nyũmũ, na ndibei, o na maguta; o na magĩtwarithia ndegwa o na ng’ondu nyingĩ; nĩ gũkorũo kwarĩ gĩkeno kũu Isiraeli.