1 Chronicles 13

¹Na rĩrĩ, Daudi akĩgĩa ndundu, magĩciranĩra na anene a athigari a ita, arĩa maathaga andũ ngiri, o na igana, o na mũndũ o wothe mũtongoria wa andũ.

²Nake Daudi agĩkĩĩra kĩrĩndĩ kĩu gĩothe gĩa Isiraeli atĩrĩ, Mũngĩkorũo nĩmũkuona arĩ wega, o naguo ũndũ ũcio ũkorũo uumĩte harĩ Jehova Ngai witũ-rĩ, nĩtũrekiei andũ harĩ ariũ a ithe witũ arĩa matigarĩte kũndũ guothe bũrũri wa Isiraeli, hamwe na athĩnjĩri-Ngai, o na Alawii, arĩa maikarĩte matũũra-inĩ mao o marĩa marĩ na ithaka imarigicĩirie cia ũrĩithio, nĩ getha moke mongane hamwe na ithuĩ;

³tũgĩcoke tũgĩre ithandũkũ rĩa Ngai tũrĩcokie gũkũ tũrĩ; nĩ gũkorũo tũtiatuĩragia mohoro harĩ rĩo matukũ-inĩ ma Saulu.

⁴Nakĩo kĩrĩndĩ kĩu gĩothe gĩkiuga atĩ nĩgĩgwika ũguo; nĩ gũkorũo ũndũ ũcio nĩwonagwo wagĩrĩire nĩ andũ acio othe.

⁵Tondũ ũcio Daudi agĩcokanĩrĩria kĩrĩndĩ kĩu gĩothe gĩa Isiraeli hamwe, akĩrutĩtie karũũĩ ka Misiri karĩa getagwo Shihoru, o nginya itonyero-inĩ rĩa Hamathu, nĩ getha magĩre ithandũkũ rĩa Ngai marĩrute Kiriathu-jearimu.

⁶Nake Daudi agĩkĩambata me hamwe na andũ acio othe a Isiraeli, magĩkinya Baala, narĩo nĩrĩo Kiriathu-jearimu, itũũra rĩa Juda, nĩguo makaambatie ithandũkũ rĩa Ngai, o rĩu rĩa Jehova ũrĩa ũikaraga gatagatĩ-inĩ ka makerubi, o rĩrĩa rĩĩtanĩtio na Rĩĩtwa rĩake, marĩrute kuo.

⁷Narĩo ithandũkũ rĩu rĩa Ngai makĩrĩruta mũciĩ wa Abinadabu, marĩkuuĩte na ngari njerũ, nao Uza na Ahio nĩo maatuĩkĩte atwari a ngari ĩo.

⁸Nake Daudi o na Isiraeli othe makĩinĩra mbere ya Jehova na hinya wao wothe, makĩina nyĩmbo makĩhũraga inanda cia ndigi, o na inanda cia kĩnubi, o na ihembe, o na thani iria ihũrithanagio, o na macoro.

⁹Nao maakinya kĩhuhĩro-inĩ gĩa Kidoni, Uza agĩtambũrũkia guoko anyite ithandũkũ, nĩ gũkorũo ndegwa nĩciahĩngĩtwo.

¹⁰Nake Jehova agĩcinwo nĩ marakara nĩ ũndũ wa Uza, nake akĩmũhũra nĩ ũndũ wa gũtambũrũkĩria ithandũkũ guoko; nake agĩgĩkuĩra o hau mbere ya Ngai.

¹¹Nake Daudi akĩigua ũũru nĩ ũndũ wa ũguo Jehova aaguthũkĩire Uza; agĩgĩĩta handũ hau Perezu-uza, naho hatũire hetagwo ũguo o na ũmũthĩ.

¹²Nake Daudi agĩgĩĩtigĩra Jehova mũthenya ũcio, akĩũria atĩrĩ, Ĩ ithandũkũ rĩrĩ rĩa Ngai ngakĩrĩinũkia gwakwa mũciĩ atĩa?

¹³Tondũ ũcio Daudi ndaigana gũthamĩria ithandũkũ rĩu kũu aatũire itũũra rĩa Daudi, no aarĩkerũrithirie akĩrĩtonyia mũciĩ wa Obedi-edomu ũrĩa Mũgiti.

¹⁴Narĩo ithandũkũ rĩu rĩa Ngai rĩgĩikara kũu mũciĩ wa Obedi-edomu mĩeri ĩtatũ hamwe na andũ a nyũmba yake. Nake Jehova akĩrathima andũ acio a nyũmba ya Obedi-edomu, o na kĩrĩa gĩothe aarĩ nakĩo.