1 Chronicles 20

¹Na gũgĩkinya atĩrĩ, atĩ mwaka ũyũ ũngĩ wakinya, o ihinda rĩrĩa athamaki mahũthĩire kuumagara mathiĩ ita-inĩ-rĩ, Joabu agĩtongoria gĩtungati gĩa athigari kĩrĩa kĩarĩ hinya, akĩanangithia bũrũri wa ciana cia Amoni biũ, ningĩ agĩthiĩ akĩrigicĩria Raba arĩtunyane. No rĩrĩ, Daudi aaikarĩte Jerusalemu. Nake Joabu akĩhũra Raba akĩrĩng’aũrania.

²Nake Daudi agĩkĩruta tanji ya mũthamaki wao mũtwe, akĩona atĩ ũritũ wayo warĩ wa taranda ĩmwe ya thahabu, na nĩyathecereirũo tũhiga twa goro; nayo ĩgĩĩkĩrũo Daudi mũtwe; nacio indo cia itũũra rĩu iria ciatahĩtwo agĩciumagaria, na ciarĩ nyingĩ mũno igakĩrĩrĩria.

³O nao andũ arĩa maarĩ kuo thĩinĩ akĩmoimagaria, akĩmatua arengi mĩtĩ na mĩthumeno, o na aruti wĩra na harũ cia igera, o na mathanwa. Naguo ũguo noguo Daudi ekire matũũra mothe ma ciana cia Amoni. Nao Daudi na andũ acio othe magĩcoka Jerusalemu.

⁴Na gũgĩkinya atĩrĩ, atĩ thutha wa maũndũ macio, hakĩarahũrũo ita kũu Gezeri cia kũhũrana na Afilisiti; nake Sibekai, Mũhushathi, akĩ��raga Sipai, wa ariũ a Rafa, nao magĩgĩtorio biũ.

⁵Ningĩ hakĩgĩa mbaara o hĩndĩ ĩngĩ ya kũhũrana na Afilisiti; nake Elihanani, mũrũ wa Jairu, akĩũraga Lahami, mũrũ wa nyina na Goliathu ũrĩa Mũgiti; naguo mũtĩ wa itimũ rĩake watariĩ o ta mũtĩ wa mũtambo ũrĩa ũtumaga tama.

⁶O na ningĩ gũgĩcoka gũkĩgĩa mbaara o hĩndĩ ĩngĩ kũu Gathu, kũrĩa kwarĩ mũndũ mũraihu mũno kĩũga; na aarĩ na ciara mĩrongo ĩĩrĩ na inya, nĩ ũndũ aarĩ na ciara ithathatũ o guoko, o na ciara ithathatũ o kũgũrũ. Mũndũ ũcio o nake aaciarĩtwo nĩ Rafa ũcio.

⁷Na rĩrĩa ogitire Isiraeli, Jonathani, mũrũ wa Shimea, mũrũ wa ithe na Daudi, akĩmũũraga.

⁸Acio othe-rĩ, maaciarĩirũo nĩ Rafa ũcio o kũu Gathu; nao makĩũragwo nĩ Daudi na ndungata ciake.