1 Chronicles 21

¹Na rĩrĩ, Shaitani agĩkĩĩhanda nĩguo okĩrĩre Isiraeli, akĩarahũra ngoro ya Daudi nĩguo atare Isiraeli.

²Nake Daudi akĩĩra Joabu, o na anene a andũ atĩrĩ, Thiĩi mũgatare Aisiraeli mũmarutĩtie Biri-shiba o nginya Dani; mũcoke mũndehere ũhoro, nĩ getha ’menye ũrĩa maigana.

³Nake Joabu akiuga atĩrĩ, Jehova arotũma andũ ake maingĩhe maita igana gũkĩra ũrĩa maigana rĩu magĩtarũo; no rĩrĩ, mũthamaki ũyũ, mwathi wakwa, githĩ acio othe ti ndungata ciaku, wee mwathi wakwa? Nĩ kĩ gĩgũtũma, wee mwathi wakwa, wende gwĩkwo ũguo? Egũkĩhĩtithia Isiraeli ũguo nĩ ũndũ kĩ?

⁴No rĩrĩ, o na Joabu oiga ũguo-rĩ, kiugo kĩa mũthamaki nĩkĩamũhootire. Na tondũ ũcio Joabu agĩkiuma hau, akĩgera bũrũri wothe wa Isiraeli, agĩcoka agĩkinya Jerusalemu.

⁵Nake Joabu akĩhe Daudi ũhoro wa ũrĩa andũ acio maaiganĩte maatarũo; nao andũ othe a Isiraeli maarĩ arũme ngiri ngiri na ngiri igana, arĩa maacomoraga hiũ cia njora; o nao andũ a Juda maarĩ arũme ngiri magana mana na mĩrongo mũgwanja arĩa maacomoraga hiũ cia njora.

⁶No rĩrĩ, andũ a Lawii na Benjamini Joabu ndaigana kũmataranĩria na acio angĩ; nĩ ũndũ ũhoro ũcio wa mũthamaki warĩ mũthũũre mũno nĩ Joabu.

⁷Nake Ngai akĩigua ũũru nĩ ũndũ wa ũhoro ũcio, na akĩhũra Isiraeli.

⁸Nake Daudi akĩĩra Ngai atĩrĩ, Nĩnjĩhĩtie mũno nĩ ũndũ wa ũndũ ũcio njĩkĩte; no rĩrĩ, rĩu ndagũthaitha ũnjehererie wĩhia ũcio wakwa, niĩ ndungata yaku; nĩ gũkorũo nĩnjĩkĩte ũndũ wa ũkĩgu mũno.

⁹Nake Jehova akĩarĩria Gadi, ũrĩa wonagĩra Daudi maũndũ, akĩmwĩra atĩrĩ,

¹⁰Thiĩ warie na Daudi, ũmwĩre atĩ Jehova oiga ũũ: Atĩrĩrĩ, ngũkũigĩra mbere yaku maũndũ matatũ, nawe wĩthurĩre ũmwe wamo, nĩ getha ngwĩke guo.

¹¹Tondũ ũcio Gadi agĩgĩthiĩ agĩkinya he Daudi, akĩmwĩra atĩrĩ, Jehova oigĩte ũũ: Atĩrĩrĩ, thura ũndũ ũmwe wa maya matatũ, o ũrĩa ũkwenda,

¹²ũkorũo nĩ mĩaka ĩtatũ ya ng’aragu, o na kana mĩeri ĩtatũ ũninwo nĩ thũ ciaku, rĩrĩa ũgũthingatwo na hiũ cia njora cia thũ ciaku, o na kana hihi mĩthenya ĩtatũ kũgĩe rũhiũ rũa Jehova, naruo nĩ rũa atĩ kũgĩe mũthiro bũrũri ũyũ, nake mũraika wa Jehova aninane kũndũ guothe mĩhaka-inĩ ya Isiraeli. Na tondũ ũcio wĩcirie ũmenye icokia rĩrĩa ngũcokeria ũrĩa ũndekirie.

¹³Nake Daudi agĩkĩĩra Gadi atĩrĩ, Hĩ! Ndĩ hairũ rĩu! No rĩrĩ, nĩ kaba ngũe moko-inĩ ma Jehova, nĩ ũndũ tha ciake nĩ nyingĩ mũno, ndikagũe moko-inĩ ma andũ a gũkũ thĩ.

¹⁴Tondũ ũcio Jehova agĩgĩtwarithĩria Isiraeli mũthiro, naho hagĩkua andũ a Isiraeli ngiri mĩrongo mũgwanja.

¹⁵Nake Ngai akĩrekia mũraika Jerusalemu nĩguo arĩnine; no rĩrĩ, hĩndĩ ĩrĩa aagwataga kũrĩnina-rĩ, Jehova akĩbara ũndũ ũcio, nake akĩĩrira nĩ ũndũ wa ũũru ũcio, agĩkĩĩra mũraika ũrĩa waninanaga atĩrĩ, Nĩkũiganĩte; rĩu girĩrĩria guoko gwaku. Nake mũraika ũcio wa Jehova aarũgamĩte kĩhuhĩro-inĩ kĩa ngano kĩa Orinani, Mũjebusi.

¹⁶Nake Daudi agĩtiira maitho, akĩona mũraika ũcio wa Jehova arũgamĩte rĩera-inĩ gatagatĩ ga thĩ na igũrũ, anyitĩte rũhiũ rũcomore na guoko gwake rũambararĩirio Jerusalemu. Nake Daudi, o na athuri, makĩĩgũithia maroretie mothiũ mao thĩ, nao mehumbĩte matama ma ikũnia.

¹⁷Nake Daudi akĩũria Ngai atĩrĩ, Githĩ ti niĩ ndaathanire ngiuga andũ matarũo? Niĩ nĩ niĩ njĩhĩtie na ngeka waganu mũingĩ; no rĩrĩ, andũ aya matariĩ ta ng’ondu, nĩ atĩa mekĩte? Ndagũthaitha, wee, Jehova Ngai wakwa, ũreke guoko gwaku kũnjũkĩrĩre arĩ niĩ, o na nyũmba ya baba; no rĩrĩ, nĩgũtige gũũkĩrĩra andũ aku, atĩ nĩguo mahũrũo na mũrimũ.

¹⁸Hĩndĩ ĩo mũraika wa Jehova agĩatha Gadi akere Daudi aambate, agaakĩre Jehova kĩgongona kĩhuhĩro-inĩ kĩa ngano kĩu kĩa Orinani, Mũjebusi.

¹⁹Nake Daudi agĩkĩambata o ta ũguo Gadi oigĩte thĩinĩ wa rĩĩtwa rĩa Jehova.

²⁰Nake Orinani akĩĩhũgũra na thutha akĩona mũraika ũcio, nao ariũ ake ana arĩa maarĩ hamwe nake makĩĩhitha. Na rĩrĩ, Orinani nĩ kũhuha aahuhaga ngano.

²¹Na rĩrĩ, Daudi aakuhĩhĩria Orinani-rĩ, Orinani agĩcũthĩrĩria akĩona Daudi, agĩkiuma hau kĩhuhĩro-inĩ kĩu kĩa ngano, akĩinamĩrĩra Daudi, aturumithĩtie ũthiũ thĩ.

²²Nake Daudi agĩkĩĩra Orinani atĩrĩ, ’He handũ haha kĩhuhĩro-inĩ gĩkĩ kĩa ngano, njakĩre Jehova kĩgongona ho; na nĩ kũgũra ngũgũra harĩ wee o ta ũrĩa thogora waho wothe ũtariĩ; nĩ getha mũthiro ũyũ ũgirĩrĩrio, ũtige kũnina andũ.

²³Nake Orinani agĩkĩĩra Daudi atĩrĩ, Kĩoe, mwathi wakwa, mũthamaki ũyũ, wĩke o ta ũrĩa ũkuona kwagĩrĩire; ningĩ o nacio ng’ombe cia mahaki ma njino, o na mĩnyamũ ĩrĩa ĩhũraga ngano ĩtuĩke ngũ, o na ngano ya gũtuĩka igongona rĩa mũtu-rĩ, icio ciothe nĩndakũhe.

²⁴Nake mũthamaki Daudi agĩkĩĩra Orinani atĩrĩ, Aca, ti ũguo; no rĩrĩ, ti-itherũ nĩ kũgũra ngũgũra indo icio o ta ũrĩa thogora wacio wothe ũtariĩ; nĩ ũndũ ndingĩoya kĩndũ gĩaku ndutĩre Jehova gĩtuĩke gĩake, o na kana ndute ihaki rĩa njino itarĩ kĩndũ o na kĩ ndĩrĩrutĩire.

²⁵Tondũ ũcio Daudi akĩhe Orinani thahabu ya cekeri magana matandatũ ĩgĩthimwo, nĩ ũndũ wa handũ hau.

²⁶Nake Daudi agĩgĩakĩra Jehova kĩgongona ho, agĩcoka akĩrutĩra mahaki ma njino ho, o na magongona ma ũiguano, na agĩkaĩra Jehova; nake Jehova akĩmũcokeria ũhoro uumĩte igũrũ na ũndũ wa mwaki gwakana igũrũ rĩa kĩgongona kĩu kĩa ihaki rĩa njino.

²⁷Nake Jehova agĩgĩatha mũraika wake; nake agĩcokia rũhiũ rũake njora.

²⁸Hĩndĩ ĩo-rĩ, Daudi ona atĩ Jehova nĩamũcokeirie ũhoro kĩhuhĩro-inĩ kĩu kĩa Orinani Mũjebusi-rĩ, agĩcoka kũrutagĩra igongona ho.

²⁹Nĩ gũkorũo gĩikaro kĩa Jehova, kĩrĩa Musa aathondekeire werũ-inĩ, o na kĩgongona kĩa ihaki rĩa njino, ciarĩ itĩri-inĩ rĩa kũndũ gũtũũgĩru kũu Gibeoni hĩndĩ ĩo.

³⁰No rĩrĩ, Daudi ndaigana kũhota gũthiĩ mbere yakĩo gũtuĩria ũhoro he Ngai, nĩ gũkorũo nĩetigagĩra rũhiũ rũa njora rũa mũraika wa Jehova.