1 Chronicles 22

¹Hĩndĩ ĩo Daudi agĩkiuga atĩrĩ, Ino nĩyo nyũmba ya Jehova Ngai, nakĩo kĩgongona-inĩ gĩkĩ, nĩho Isiraeli marĩrutagĩra ihaki rĩa njino.

²Nake Daudi agĩathana akiuga atĩ ageni arĩa maarĩ bũrũri wa Isiraeli macokererio hamwe; akĩhe abundi amwe a mahiga wĩra wa gwacũhia mahiga ma gwaka nyũmba ya Ngai.

³Nake Daudi agĩkĩigithia igera nyingĩ mũno cia gũthondekwo mĩcumarĩ ya mĩrango ya gwĩkĩrũo mĩromo, o na ya igera cia kũnyitithania nyũmba; o na igera nyingĩ cia gĩcango itaathimirũo;

⁴o na mĩtarakwa ĩtangĩtarĩka; nĩ gũkorũo Azidoni o na andũ a Turo nĩmaatwarĩire Daudi mĩtarakwa mĩingĩ mũno.

⁵Nake Daudi akiuga atĩrĩ, Mũrũ wakwa Suleimani nĩ mũnyinyi na nĩ mwĩthĩ, nayo nyũmba ĩrĩa ĩgwakĩrũo Jehova no mũhaka ĩtuĩke thaka mũno, ĩgĩe ngumo, o na ĩĩkĩrĩrũo mabũrũri-inĩ mothe; na tondũ ũcio nĩngũigithia indo nĩ ũndũ wayo. Tondũ ũcio Daudi akĩigithia indo nyingĩ mũno o mbere ataanakua.

⁶Hĩndĩ ĩo agĩgĩĩta Suleimani mũrũwe, akĩmũtaara atĩ aakĩre Jehova Ngai wa Isiraeli nyũmba.

⁷Daudi agĩkĩĩra Suleimani, mũrũwe, atĩrĩ, Ha ũhoro wakwa-rĩ, ngoro yakwa nĩĩrendete atĩ njake nyũmba ĩĩtanĩtio na rĩĩtwa rĩa Jehova Ngai wakwa.

⁸No rĩrĩ, ũhoro wa Jehova nĩwanginyĩire ngĩĩrũo atĩrĩ, Wee nĩũitĩte thakame nyingĩ mũno, na ũkarũa mbaara nene mũno; wee tiwe ũgwaka nyũmba ĩĩtanĩtio na rĩĩtwa rĩakwa, nĩ ũndũ nĩũitĩte thakame nyingĩ, ngĩonaga.

⁹Atĩrĩrĩ, nĩũgaciara kahĩĩ, nako nĩgagatuĩka mũndũ wa gũikara ahoreire; na niĩ nĩngamũhe ũhurũko, aikare atiganĩte na thũ ciake ciothe iria ikamũrigicĩria; nĩ gũkorũo rĩĩtwa rĩake agetagwo Suleimani, na nĩngatũma Aisiraeli magĩe na thayũ, o na maikare mahoreire, matukũ make.

¹⁰Ũcio nĩwe ũgaaka nyũmba ĩĩtanĩtio na rĩĩtwa rĩakwa; na nĩagatuĩka mũrũ wakwa, na niĩ nduĩke ithe; na nĩngatũma gĩtĩ gĩake gĩa ũthamaki gĩikare kĩrũmĩte wega, thĩinĩ wa Isiraeli tene na tene.

¹¹Tondũ ũcio, rĩu, mũrũ wakwa, Jehova aroikara hamwe nawe, na ũtũũre ũgaacĩire, na wake nyũmba ya Jehova Ngai waku, o ta ũrĩa aarĩtie ndeto igũkoniĩ.

¹²Tondũ ũcio Jehova arogĩta o gũkũhe ũũgĩ wa kũbarĩrĩra wega maũndũ, o na ũhoro wa kũmenya maũndũ; ningĩ arogũtaara ũhoro-inĩ wa gwatha Isiraeli, nĩ getha ũikarage ũmenyereire watho wa Jehova Ngai waku.

¹³Ũngĩtũũra ũmenyereire irĩra cia watho wa kũrũmĩrĩrũo, o na matuĩro ma cira marĩa Jehova aataarire Musa makoniĩ Isiraeli-rĩ, hĩndĩ ĩo nĩũgatũũra ũgaacĩire. Gĩa na hinya, na ũũmĩrĩrie; menya wĩtigĩre, o na kana ũmake.

¹⁴Na atĩrĩrĩ, o na harĩa ndatũire na mĩtangĩko-rĩ, nĩnjigithĩtie taranda cia thahabu ngiri igana rĩmwe nĩ ũndũ wa nyũmba ya Jehova, o na taranda cia betha ngiri ngiri; o na gĩcango o na igera ngĩiga itathimĩtwo nĩ ũndũ nĩ nyingĩ mũno; o nayo mĩtĩ na mahiga ngĩciiga nĩ ũndũ wa wĩra ũcio; nawe wakĩhota gũkanaciongerera.

¹⁵O na ningĩ-rĩ, aruti wĩra wĩ nao aingĩ mũno, enji mahiga o na aicũhia amo, na atemi mĩtĩ, o na andũ othe arĩa mohĩgĩrĩire ũruti wa wĩra wa mĩthemba yothe.

¹⁶Atĩrĩrĩ, thahabu, na betha, na gĩcango, o na igera-rĩ, itingĩtarĩka; tondũ ũcio kĩarahũke ũrute wĩra nacio, nake Jehova aroikara hamwe nawe.

¹⁷Ningĩ Daudi agĩgĩatha anene othe a Isiraeli mateithagie Suleimani, mũrũwe, akĩmera ũũ:

¹⁸Githĩ Jehova Ngai wanyu ndakĩrĩ hamwe na inyuĩ? O na ningĩ-rĩ, githĩ ndakĩmũhete ũhurũko na ndwere cianyu ciothe? Nĩ gũkorũo nĩaarekereirie andũ arĩa matũũraga bũrũri ũyũ, akĩmaneana moko-inĩ makwa, naguo bũrũri ũyũ ũgũikara wĩ mũtorie nĩ Jehova, o na andũ ake.

¹⁹Rĩu kĩroriei ngoro cianyu, o na mĩoyo yanyu, ũhoro-inĩ wa gũcaria Jehova Ngai wanyu; na tondũ ũcio kĩarahũkei, mwake handũ harĩa haamũre ha Jehova Ngai, nĩ getha ithandũkũ rĩa Jehova rĩa kĩrĩkanĩro rĩtwarũo nyũmba-inĩ ĩo ĩgwakwo ĩĩtanĩtio na rĩĩtwa rĩake, rĩĩ hamwe na indo iria theru cia Ngai.