1 Chronicles 5

¹Na rĩrĩ, aya nĩo ariũ a Reubeni, irigithathi rĩa Isiraeli, (tondũ nĩwe warĩ wa irigithathi, no rĩrĩ, tondũ wa ũrĩa aagwatirie ũrĩrĩ wa ithe thahu-rĩ, ũrigithathi wake waheirũo ariũ a Jusufu, mũrũ wa Isiraeli, naguo ũhoro wa ũrĩa njiaro ciao irũmanĩrĩire ndũngĩtwarũo ta ũrĩa kĩhooto gĩa gũciarũo gĩtariĩ.

²Nĩ gũkorũo Juda nĩwe wahootanire mũno gũkĩra ariũ a ithe, na mũtongoria oimire o thĩinĩ wake; no rĩrĩ, ũrigithathi watuĩkire wa Jusufu:)

³ariũ a Reubeni ũcio, irigithathi rĩa Isiraeli, nĩ Hanoku, na Palu, na Hezironi, na Karami.

⁴Nao ariũ a Joeli nĩ Shemaia mũrũwe, na Gogu mũrũwe wa ũcio, na Shimei mũrũwe wa ũcio,

⁵na Mika mũrũwe wa ũcio, na Reaia mũrũwe wa ũcio, na Baali mũrũwe wa ũcio,

⁶na Beera mũrũwe wa ũcio, ũrĩa Tiligathu-pilineseri, mũthamaki wa Ashuri, aagwatire mũgwate agĩthiĩ nake; ũcio nĩwe warĩ mũnene wa Areubeni.

⁷Nao ariũ a ithe o ta ũrĩa mbarĩ ciao ciatariĩ hĩndĩ ĩrĩa njiaro ciao ciataragwo-rĩ, nĩ aya: Jeieli nĩwe warĩ mũnene wao, na Zekaria,

⁸na Bela mũrũ wa Azazi wa Shema, wa Joeli, ũrĩa watũũraga Aroeri, o nginya Nebo, na Baali-meoni;

⁹naguo mwena wa irathĩro aatũũrire o nginya nyumĩrĩra ya werũ kuuma rũũĩ rũa Farati; nĩ gũkorũo ũhiũ wao nĩwaingĩhĩire mũno bũrũri wa Gileadi.

¹⁰Namo matukũ ma Saulu nĩmaarũire mbaara na Ahagari, makĩmoraga; nao magĩgĩtũũra hema-inĩ ciao kũu bũrũri ũcio wothe wa mwena wa irathĩro wa Gileadi.

¹¹Nao ariũ a Gadi magĩtũũra mang’ethanĩire nao, kũu bũrũri wa Bashani, o nginya Saleka.

¹²Nakuo kũu Bashani-rĩ, Joeli nĩwe warĩ mũnene wao, nake Shafamu nĩwe warĩ wa kerĩ, ningĩ Janai na Shafati maarĩ o kuo;

¹³o na ningĩ ariũ a ithe wao a nyũmba cia maithe mao magĩtũũra o kuo, nao nĩ Mikaeli, na Meshulamu, na Sheba, na Jorai, na Jakani, na Zia, na Eberi, andũ mũgwanja.

¹⁴Acio nĩo maarĩ ariũ a Abihaili, mũrũ wa Huri wa Jaroa, wa Gileadi, wa Mikaeli, wa Jeshishai, wa Jahado, wa Buzi;

¹⁵na Ahi, mũrũ wa Abidieli wa Guni, mũnene wa nyũmba cia maithe mao.

¹⁶Nao magĩtũũra Gileadi, o kũu Bashani, o na matũũra ma bũrũri ũcio, o na ithaka imarigicĩirie cia ũrĩithio cia Sharoni, o nginya kũndũ kũrĩa mĩhaka yao yakinyĩte.

¹⁷Acio othe-rĩ, nĩmaatarirũo o ta ũrĩa njiaro ciao ciatariĩ matukũ-inĩ ma Jothamu, mũthamaki wa Juda, o na matukũ-inĩ ma Jeroboamu, mũthamaki wa Isiraeli.

¹⁸Na rĩrĩ, ariũ a Reubeni, na Agadi, o na nuthu ya mũhĩrĩga wa Manase-rĩ, arĩa othe maarĩ njamba na makahota kuoya ngo o na rũhiũ rũa njora, na gũikia mũguĩ na ũta, na makagĩa na ũũgĩ wa kũrũa mbaara, maarĩ ngiri mĩrongo ĩna na inya na magana mũgwanja na mĩrongo ĩtandatũ magĩtarũo; nao acio nĩ arĩa maahotaga kuumagara mathiĩ ita-inĩ.

¹⁹Nao makĩhũrana mbaara na Ahagari, na Ajeturi, na Anafishi, na Anodabu.

²⁰Nao magĩgĩteithio makĩhũrana nao, na tondũ ũcio Ahagari makĩneanwo moko-inĩ mao me na arĩa othe maarĩ hamwe nao; nĩ gũkorũo nĩmaakaĩire Ngai mbaara-inĩ ĩo, nake agĩgĩĩtĩkĩra kũmaigua; nĩ ũndũ nĩmaamwĩhokire.

²¹Nao magĩcoka magĩtaha ũhiũ wao; magĩtaha ngamĩra ngiri mĩrongo ĩtano, na mbũri ngiri magana merĩ ma mĩrongo ĩtano, na ndigiri ngiri igĩrĩ; na magĩtaha andũ ngiri igana rĩmwe.

²²Nĩ gũkorũo nĩhaagũire andũ aingĩ moragĩtwo, nĩ ũndũ mbaara ĩo nĩ Ngai wamĩrũithagia. Nao magĩgĩtũũra kuo ithenya rĩao, o nginya hĩndĩ ĩrĩa gwatahanirũo.

²³Nacio ciana cia nuthu ya mũhĩrĩga wa Manase igĩtũũra bũrũri ũcio, igĩkĩũtũũra iũrutĩtie Bashani, igĩkinya o Baali-herimoni, na Seniri, o na kĩrĩma kĩa Herimoni, ciĩthegeire kuo.

²⁴Nao aya nĩo maarĩ anene a nyũmba cia maithe ma cio; Eferi, na Ishi, na Elieli, na Azirieli, na Jeremia, na Hodavia, na Jadieli, o andũ arĩa maarĩ njamba irĩ hinya, na marĩ igweta, na anene a nyũmba cia maithe mao.

²⁵Nao andũ acio makĩagarara watho wa Ngai wa maithe mao, makĩĩrirĩria mũno kũrũmĩrĩra ngai cia andũ a bũrũri ũcio, o acio Ngai aaninire mehere mbere yao.

²⁶Nake Ngai wa Isiraeli akĩarahũra roho wa Puli, mũthamaki wa Ashuri, o na roho wa Tiligathu-pilineseri, mũthamaki wa Ashuri, nake agĩkĩmataha agĩthiĩ nao, nao nĩ Areubeni, na Agadi, o na nuthu ya mũhĩrĩga wa Manase, akĩmatwarithia Hala, na Habori, na Hara, o na kũu rũũĩ-inĩ rũa Gozani, nao matũire kuo o na ũmũthĩ.