1 John 1

¹ŨRĨA warĩ o kuo kuuma kĩambĩrĩria, ũrĩa tũiguĩte, ũrĩa tuonete na maitho maitũ, ũrĩa tweroreire, namo moko maitũ makĩũnyitanga, Ũhoro-inĩ ũrĩa wĩ muoyo

²(amu muoyo ũcio nĩwonithanirio, na ithuĩ nĩtũwonete, na tũkaheana ũira, tũkamuumĩrĩria inyuĩ ũhoro wa muoyo ũcio, o ũcio wa tene na tene, watũire gwĩ Ithe witũ, na ũkĩonithio ithuĩ);

³ũrĩa tuonete na tũkaigua, o na inyuĩ nĩtũgũkĩmuumĩrĩria, nĩ getha o na inyuĩ mũgĩe ngwatanĩro na ithuĩ; nayo ngwatanĩro iitũ nĩ ngwatanĩro na Ithe witũ, ningĩ na Mũrũ wake Jesu Kristo;

⁴na tũkũmwandĩkĩra maũndũ maya nĩ getha gĩkeno giitũ kĩiganĩre.

⁵Naguo ũhoro ũrĩa tũiguĩte kũrĩ we, ũrĩa tũgũgĩcoka kũmũhe inyuĩ, nĩ atĩrĩ, atĩ Ngai nĩ ũtheri, na thĩinĩ wake gũtirĩ gatuma o na kanini.

⁶Twoiga atĩ twĩ ngwatanĩro nake, tũgĩthiaga o na nduma-rĩ, nĩ maheni tũkuuga, na tũtiĩkaga maũndũ marĩa ma ma;

⁷no akorũo tũthiaga o na ũtheri, ta ũrĩa we arĩ ũtheri-inĩ, twĩ na ngwatanĩro, mũndũ na ũrĩa ũngĩ, nayo thakame ya Jesu Mũrũ wake nĩĩtũtheragia tũgathira wĩhia wothe.

⁸Twoiga tũtirĩ na wĩhia nĩ kwĩhenia tũkwĩhenia, na ũhoro-ũrĩa-wa-ma tũtirĩ naguo ngoro ciitũ.

⁹Twakiumbũra mehia maitũ, we nĩ mwĩhokeku, o na nĩ mũthingu, agatuohera mehia maitũ, na agatũtheria tũgathirũo nĩ maũndũ marĩa mothe matarĩ ma ũthingu.

¹⁰Twoiga tũtiĩhĩtie, tũkũmũtua wa maheni, na ũhoro wake tũtirĩ naguo ngoro ciitũ.