1 John 2

¹TWANA twakwa, ngũmwandĩkĩra maũndũ maya nĩguo mũtikehagie. Na mũndũ ehia, twĩ na Mũtũcirĩrĩri harĩ Ithe witũ, na nĩwe Jesu Kristo, ũrĩa mũthingu,

²nake nĩwe ihaki rĩa mehia maitũ; na to maitũ ithuiki, nĩ rĩa mehia ma kĩrĩndĩ gĩa thĩ gĩothe o nakĩo.

³Na ũndũ ũrĩa ũtũmaga tũmenye atĩ nĩtũmũũĩ nĩ atĩrĩ, twatũũra tũmenyereire maathani make.

⁴Ũrĩa uugaga ũũ, Nĩndĩmũũĩ, na ndamenyagĩrĩra maathani make, ũcio nĩ wa maheni, na ũhoro ũrĩa-wa ma ndarĩ naguo ngoro yake;

⁵no rĩrĩ, ũrĩa ũtũire o amenyagĩrĩra ũhoro wake, thĩinĩ wa ũcio-rĩ, kwenda Ngai nĩgũkinyanĩire kũna. Ũndũ ũrĩa ũtũmaga tũmenye twĩ thĩinĩ wake nĩ ũyũ:

⁶ũrĩa uugaga atĩ nĩatũire thĩinĩ wake, aagĩrĩirũo o nake mwene agĩage na mĩthiĩre ta ĩrĩa we aarĩ nayo.

⁷Endwa akwa, ti rĩathani rĩerũ ngũmwandĩkĩra, tiga rĩathani rĩa tene rĩrĩa mũtũire narĩo kuuma kĩambĩrĩria; rĩathani rĩu rĩa tene nĩ ũhoro ũrĩa mwaheirũo.

⁸Ningĩ no rĩathani rĩerũ ngũmwandĩkĩra, na nĩ ũhoro wa ma kũrĩ we o na kũrĩ inyuĩ; nĩ gũkorũo nduma no ĩrathira, naguo ũtheri ũrĩa wa ma rĩu nĩũrĩkĩtie gũthera.

⁹Ũrĩa uugaga atĩ arĩ ũtheri-inĩ, na nĩathũire mũrũ wa ithe-rĩ, arĩ o nduma-inĩ o na rĩu.

¹⁰Ũrĩa wendete mũrũ wa ithe nĩatũire ũtheri-inĩ, na thĩinĩ wake gũtirĩ na ũndũ ũngĩtũma ahĩngwo.

¹¹No rĩrĩ, ũrĩa ũthũire mũrũ wa ithe e nduma-inĩ, na gũthiĩ athiaga o na nduma, na ndonaga harĩa ekũgera, tondũ nduma nĩĩmũteete maitho.

¹²Ndĩramwandĩkĩra inyuĩ, twana twakwa, nĩ ũndũ nĩmuoheirũo mehia manyu nĩ ũndũ wa rĩĩtwa rĩake.

¹³Ndĩramwandĩkĩra inyuĩ, maithe, nĩ ũndũ nĩmũũĩ ũrĩa ũtũire kuuma o kĩambĩrĩria. Ndĩramwandĩkĩra inyuĩ, aanake, nĩ ũndũ nĩmũtoretie ũrĩa mũũru. Inyuĩ ciana-rĩ, ndamwandĩkĩra nĩ ũndũ nĩmũũĩ Ithe witũ.

¹⁴Inyuĩ maithe-rĩ, ndamwandĩkĩra nĩ ũndũ nĩmũũĩ ũrĩa ũtũire kuuma o kĩambĩrĩria. Inyuĩ aanake-rĩ, ndamwandĩkĩra nĩ ũndũ mwĩ na hinya, naguo Ũhoro wa Ngai nĩũikaire thĩinĩ wanyu, na nĩmũtoretie ũrĩa mũũru.

¹⁵Mũtikende ũhoro wa thĩ, o na kana maũndũ marĩa me kuo gũkũ thĩ. Mũndũ aakorũo nĩenda ũhoro wa thĩ, kwenda Ithe witũ ndarĩ nakuo ngoro yake.

¹⁶Amu-rĩ, maũndũ mothe marĩa me gũkũ thĩ, mwĩrirĩrio wa mwĩrĩ, na mwĩrirĩrio wa maitho, na nguthi cia muoyo ũyũ tũrĩ-rĩ, maũndũ macio matiumanĩte na Ithe witũ, nĩ ma thĩ.

¹⁷Na thĩ nĩ gũthira ĩrathira, o na mwĩrirĩrio wayo; no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.

¹⁸Ciana ici, ĩno nĩyo thaa ya kũrigĩrĩria; na ta ũrĩa mwaiguire atĩ mũmena-Kristo nĩegũũka, o na rĩu nĩkũgĩĩte amena-Kristo aingĩ; na tondũ ũcio tũkamenya atĩ ĩno nĩyo thaa ya kũrigĩrĩria.

¹⁹Kuuma nĩmoimire kũrĩ ithuĩ, no matiarĩ aitũ; amu mangĩakorirũo marĩ aitũ, nĩmangĩaikarire hamwe na ithuĩ; no nĩmaatũtigire, nĩ getha moimbũke mamenyeke atĩ othe ti aitũ.

²⁰Inyuĩ-rĩ, mũrĩ ahake maguta nĩ Ũrĩa Mũtheru, mũgakĩmenya maũndũ mothe.

²¹Ndiamwandĩkĩra nĩ ũndũ atĩ mũtiũĩ ũhoro-ũrĩa-wa-ma; ndamwandĩkĩra nĩ ũndũ nĩmũũũĩ, na tondũ gũtirĩ ũhoro wa mathara, o na ũrĩkũ, ũkoragwo uumanĩte na ũhoro-ũrĩa-wa-ma.

²²Ũrĩa wa mathara nũ, tiga ũrĩa ũkaanaga atĩ Jesu tiwe Kristo? Ũcio nĩwe mũmena-Kristo, ũcio ũkaanaga Ithe witũ na agakaana Mũriũ.

²³Ũrĩa o wothe ũkaanaga Mũriũ, ũcio ndarĩ na Ithe witũ; ũrĩa wĩtĩkĩtie Mũriũ arĩ na Ithe o nake.

²⁴Inyuĩ-rĩ, ũhoro ũrĩa mwarutirie kũigua kĩambĩrĩria-inĩ, tũũrai o naguo ngoro-inĩ cianyu. Ũhoro ũcio mwarutirie kũigua kĩambĩrĩria-inĩ wagĩtũũra thĩinĩ wa ngoro cianyu-rĩ, inyuĩ na inyuĩ mũgũtũũra thĩinĩ wa Mũriũ o na thĩinĩ wa Ithe witũ.

²⁵Naguo ũguo nĩguo kĩĩranĩro kĩrĩa aatwĩrĩire, o muoyo wa tene na tene.

²⁶Nĩndamwandĩkĩra maũndũ macio ha ũhoro-inĩ wa arĩa mendaga kũmũhĩtithia.

²⁷Na inyuĩ-rĩ, ihaka rĩa maguta rĩrĩa mwahakirũo nĩwe mũtũire o narĩo ngoro-inĩ cianyu, na mũtibatairio nĩ kũrutwo ũhoro nĩ mũndũ; no rĩrĩ, ta ũrĩa ihaka rĩake rĩmũrutaga ũhoro wa maũndũ mothe, na nĩ rĩa ma, ti rĩa maheni, o na ta ũrĩa rĩakĩmũrutire-rĩ, tũũrai thĩinĩ wake.

²⁸Na rĩu, twana twakwa, tũũragai o thĩinĩ wake, nĩ getha o rĩrĩa akonithanio-rĩ, tũgakĩhota kũũmĩrĩria na tũticonoke mbere yake oka.

²⁹Ongorũo nĩmũũĩ nĩ mũthingu, menyai atĩ o ũrĩa nake wĩkaga maũndũ ma ũthingu nĩaciarĩtwo nĩwe.