1 Kings 17

¹Na rĩrĩ, Elija Mũtishibi, wa arĩa maatũũraga marĩ ageni Gileadi, agĩkĩĩra Ahabu atĩrĩ, O ta ũrĩa Jehova, Ngai wa Isiraeli, atũũraga muoyo, o we ũrĩa niĩ ndũgamaga mbere yake-rĩ, gũticoka kũgĩa ireera, o na kana mbura, mĩaka ĩno, tiga o ta ũrĩa ngoiga.

²Nakĩo kiugo kĩa Jehova gĩkĩmũkinyĩrĩra, akĩĩrũo atĩrĩ,

³Ũkĩra wĩthiĩre, ũgarũrũke ũrorete mwena wa irathĩro, ũkehithe karũũĩ-inĩ ga Kerithu, karĩa ke mbere ya Jorodani.

⁴Na nĩgũgatuĩka atĩrĩ, atĩ ũkanyuaga maĩ mako; na nĩnjathĩte mahuru makũrehagĩre irio ho.

⁵Nake agĩgĩthiĩ, agĩĩka o ta ũguo uuge wa Jehova watariĩ; nĩ ũndũ nĩaathiire agĩtũũra karũũĩ-inĩ kau ga Kerithu, o kau karĩ mbere ya Jorodani.

⁶Namo mahuru makamũtwaragĩra mũgate na nyama rũcinĩ, o na mũgate na nyama hwaĩ-inĩ, nake akanyuaga maĩ ma karũũĩ kau.

⁷Na gũgĩkinya atĩrĩ, atĩ matukũ maathiathia, karũũĩ kau gakĩhũa, nĩ ũndũ gũtiarĩ mbura bũrũri ũcio.

⁸Ningĩ kiugo kĩa Jehova gĩkĩmũkinyĩrĩra, akĩĩrũo atĩrĩ,

⁹Ũkĩra ũthiĩ Zarefathu, itũũra rĩa Zidoni, ũgatũũre kuo; na atĩrĩrĩ, nĩnjathĩte mũtumia wa ndigwa wakuo akũheage irio.

¹⁰Tondũ ũcio agĩgĩũkĩra agĩthiĩ Zarefathu; na aakinya mũrango-inĩ wa kĩhingo gĩa itũũra, akĩona mũtumia wa ndigwa akĩũngania tũkũ, akĩmwĩta, akĩmwĩra atĩrĩ, Ndagũthaitha ndehere tũũĩ na kaihũri ’nyue.

¹¹Na rĩrĩa aathiaga gũtũgĩra, akĩmwĩta, akĩmwĩra atĩrĩ, Ndagũthaitha ũndehanĩrie na kenyũ ka mũgate.

¹²Nake agĩkiuga atĩrĩ, O ta ũrĩa Jehova Ngai waku atũũraga muoyo-rĩ, ndirĩ na kamũgate tiga o kamũtu ka rũhĩ rũmwe ke ndigithũ-inĩ, o na tũguta tũnini twĩ cuba-inĩ; na atĩrĩrĩ, rĩu ndĩrongania tũkũ nĩguo ’thiĩ ngagathondeke ndĩkaruge nĩ ũndũ wakwa niĩ mwene, o na mũrũ wakwa, nĩguo tũkarĩe tũcoke tũkue.

¹³Nake Elija agĩkĩmwĩra atĩrĩ, Tiga gwĩtigĩra, thiĩ wĩke o ta ũguo woiga; no rĩrĩ, amba ũ’thondekere kamũgate kanini kaguo, ũndehere, na thutha wa ũguo wĩthondekere wee mwene mwĩ na mũrũguo.

¹⁴Nĩ gũkorũo Jehova, Ngai wa Isiraeli, oigĩte ũũ: Ndigithũ ĩo ya mũtu ndĩninũka, o na kana cuba ũcio wa maguta ũninũke, tiga o mũthenya ũrĩa Jehova akoiria mbura gũkũ thĩ.

¹⁵Nake agĩgĩthiĩ, agĩĩka o ta ũguo Elija oigĩte gwĩkwo; nake mũtumia ũcio, o na Elija, o na andũ othe a nyũmba yake, makĩrĩa kandũ kau matukũ maingĩ.

¹⁶Nayo ndigithũ ĩo ndĩigana gũthira mũtu, o na kana cuba ũgĩthira maguta, o ta ũrĩa uuge wa Jehova watariĩ ũrĩa aaririe na kanua ka Elija.

¹⁷Na gũgĩkinya atĩrĩ, atĩ thutha wa maũndũ macio, mũrũ wa mũtumia ũcio mwene nyũmba ĩo akĩrũara; naguo mũrimũ ũkĩmwĩhĩra mũno o nginya akĩaga gũcoka kũhihia.

¹⁸Nake mũtumia ũcio agĩkĩĩra Elija atĩrĩ, Ndĩ na ũhoro ũrĩkũ nawe, wee mũndũ wa Ngai? Anga wokire gũkũ gwakwa ũtũme mehia makwa maririkanwo, ũnjũragĩre mũrũ wakwa!

¹⁹Nake agĩkĩmwĩra atĩrĩ, Ta ’nengera mũrũguo. Nake agĩkĩmuoya, akĩmũruta gĩthũri-inĩ gĩake, akĩhaica kanyũmba ka igũrũ karĩa aaikaraga amũkuuĩte, akĩmũkomia ũrĩrĩ wake we mwene.

²⁰Agĩgĩkaĩra Jehova, akiuga atĩrĩ, Wee Jehova Ngai wakwa, kaĩ warehere mũtumia ũyũ wa ndigwa ndũũraga gwake ndĩ mũgeni ũũru, woraga mũrũwe?

²¹Agĩgĩkomera mwana ũcio maita matatũ etambũrũkĩtie, agĩkaĩra Jehova, akiuga atĩrĩ, Wee Jehova Ngai wakwa, ndagũthaitha ũreke muoyo wa mwana ũyũ ũmũcokerere.

²²Nake Jehova agĩkĩigua ihoya rĩa Elija; naguo muoyo wa mwana ũcio ũkĩmũcokerera, akĩriũka.

²³Nake Elija agĩkĩoya mwana ũcio, akĩmũruta kanyũmba kau, akĩmũikũrũkia kũu nyũmba, akĩmũnengera nyina; nake Elija akiuga atĩrĩ, Ta rora, mũrũguo e muoyo.

²⁴Nake mũtumia ũcio agĩkĩĩra Elija atĩrĩ, Rĩu ndĩ kũmenya atĩ wĩ mũndũ wa Ngai, o na atĩ ũhoro wa Jehova ũrĩa ũkwario na kanua gaku nĩ wa ma.