1 Kings 16

¹Na rĩrĩ, ndũmĩrĩri ya Jehova ĩgĩgĩkinyĩrĩra Jehu wa Hanani ĩkoniĩ Baasha, ĩĩranĩtwo ũũ:

²Atĩrĩrĩ, kuona atĩ ndagũtũũgĩririe, ngĩkũruta rũkũngũ-inĩ, ngĩgũtua mũnene wa gwatha andũ akwa Isiraeli, nawe wathiĩ na mĩthiĩre ya Jeroboamu, watũma andũ akwa Isiraeli mehie, maa’thirĩkia na mehia mao maandakaria-rĩ,

³nĩ ta kũhaata ngũkũhaatithia, wee Baasha, ũninwo biũ, hamwe na nyũmba yaku; nayo nyũmba yaku ndĩmĩtue o ta nyũmba ya Jeroboamu wa Nebati.

⁴Mũndũ wa Baasha ũrĩa ũgakuĩra itũũra-inĩ akarĩĩka nĩ magui; ningĩ mũndũ wake ũrĩa ũgakuĩra gĩthaka-inĩ, akarĩĩka nĩ nyamũ cia rĩera-inĩ.

⁵Na rĩrĩ, ciĩko iria ingĩ cia Baasha, na maũndũ marĩa ekire, o na hinya ũrĩa aarĩ naguo-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

⁶Nake Baasha agĩgĩkoma hamwe na maithe, agĩthikwo o kũu Tiriza; nake Ela, mũrũwe, agĩthamaka ithenya rĩake.

⁷Ningĩ ndũmĩrĩri ĩo ya Jehova ĩgĩkinyĩrĩra Jehu wa Hanani, ũcio warĩ mũnabii, ĩkoniĩ Baasha na nyũmba yake, nĩ ũndũ wa maũndũ mothe marĩa ekaga, o macio monagwo marĩ moru nĩ Jehova, agĩkĩmũthirĩkia agĩtũma arakare nĩ ũndũ wa maũndũ marĩa ekaga na moko make, o na ũndũ wa ũrĩa aahaanaine na andũ a nyũmba ya Jeroboamu, o na ũndũ wa ũrĩa aamĩninire biũ.

⁸Na rĩrĩ, mwaka wa mĩrongo ĩĩrĩ na ĩtandatũ ĩrĩa Asa, mũthamaki wa Juda, aakorirũo athamakĩte-rĩ, nĩguo Ela, mũrũ wa Baasha, aambĩrĩirie gũthamakĩra Isiraeli o kũu Tiriza, nake agĩgĩthamaka mĩaka ĩĩrĩ.

⁹Nake Zimuri, ndungara yake, ũrĩa warĩ mwathi wa nuthu ya ngari ciake cia ita, akĩgĩa ndundu ya kũmũũkĩrĩra; na rĩrĩ, hĩndĩ ĩo Ela aakĩrĩ kũu Tiriza akĩnyuĩra njohi nyũmba ya Ariza, ũrĩa warĩ mũrori wa maũndũ mothe ma nyũmba yake kũu Tiriza, na aarĩ mũrĩu;

¹⁰nake Zimuri agĩgĩtonya kuo akĩmũgũtha, akĩmũũraga, o mwaka wa mĩrongo ĩĩrĩ na mũgwanja ĩrĩa Asa, mũthamaki wa Juda, aakorirũo athamakĩte kũu Juda, agĩgĩthamaka ithenya rĩake.

¹¹Na gũgĩkinya atĩrĩ, atĩ aambĩrĩria gũthamaka, o ihinda rĩrĩa aaikarĩire gĩtĩ gĩa ũthamaki, akĩũraga andũ othe a nyũmba ya Baasha; na ndaigana kũmũtigĩria mwana wa kahĩĩ o na ũmwe, kana mũndũ o na ũmwe wa andũ ao, kana wa arata ake.

¹²Ũguo nĩguo Zimuri aaninire nyũmba yothe ya Baasha, o ta ũrĩa uuge wa Jehova watariĩ, ũrĩa aaririe ũkoniĩ Baasha na kanua ka Jehu ũcio mũnabii,

¹³nĩ ũndũ wa mehia mothe ma Baasha, o na mehia ma Ela, mũrũwe, marĩa mehirie, na magĩtũma Aisiraeli o nao mehie, magĩthirĩkia Jehova Ngai wa Isiraeli, magĩtũma arakare nĩ ũndũ wa maũndũ mao ma tũhũ.

¹⁴Na rĩrĩ, ciĩko iria ingĩ cia Ela, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

¹⁵Na rĩrĩ, mwaka wa mĩrongo ĩĩrĩ na mũgwanja ĩrĩa Asa mũthamaki wa Juda, aakorirũo athamakĩte, nĩguo Zimuri nake aathamakire mĩthenya mũgwanja kũu Tiriza. Na hĩndĩ ĩo Aisiraeli maakorirũo maakĩrĩire Gibethoni, itũũra rĩa Afilisiti, mahũrane narĩo.

¹⁶Nao andũ acio maarĩakĩrĩire makĩigua ũhoro ũkĩheanwo ũũ: Atĩrĩrĩ, Zimuri nĩagĩĩte ndundu ya gũũkĩrĩra mũthamaki, akamũũraga; tondũ ũcio Aisiraeli othe magĩtua Omuri, ũrĩa mũnene wa ita, mũthamaki wao mũthenya o ro ũcio marĩ kũu kĩraaro-inĩ, nĩguo athamake bũrũri wa Isiraeli.

¹⁷Nake Omuri agĩkĩambata oimĩte Gibethoni, me na Aisiraeli othe, nao magĩthiũrũrũkĩria Tiriza marĩtunyane.

¹⁸Na gũgĩkinya atĩrĩ, atĩ Zimuri ona atĩ itũũra rĩu rĩgũtunyanwo, agĩthiĩ agĩtonya handũ harĩ kĩhingo kĩrũmu nyũmba-inĩ ya mũthamaki, agĩcoka agĩcina nyũmba ĩo ya mũthamaki, agĩĩcinĩrĩra kuo thĩinĩ na mwaki, agĩgĩkua,

¹⁹nĩ ũndũ wa mehia marĩa ehirie agĩĩka maũndũ marĩa monagwo marĩ moru nĩ Jehova, nĩ ũndũ wa gũthiĩ na mĩthiĩre ya Jeroboamu, o na mehia make marĩa ehirie na agĩtũma Aisiraeli o nao mehie.

²⁰Na rĩrĩ, ciĩko iria ingĩ cia Zimuri, o na maũndũ marĩa ekire, o na ũhoro wa ũrĩa okĩrĩire mũthamaki-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

²¹Hĩndĩ ĩo andũ a Isiraeli magĩkĩamũkana icunjĩ igĩrĩ, amwe makĩrũmĩrĩra Tibini wa Ginathu makamũtue mũthamaki; nao arĩa angĩ makĩrũmĩrĩra Omuri.

²²No rĩrĩ, andũ arĩa maarũmĩrĩire Omuri makĩhoota acio maarũmĩrĩire Tibini wa Ginathu; Tibini agĩgĩkua, nake Omuri agĩthamaka.

²³Na rĩrĩ, mwaka wa mĩrongo ĩtatũ na ũmwe ĩrĩa Asa, mũthamaki wa Juda, aakorirũo athamakĩte-rĩ, nĩguo Omuri aambĩrĩirie gũthamakĩra Isiraeli, agĩgĩthamaka mĩaka ikũmi na ĩĩrĩ. Mĩaka ĩtandatũ-rĩ, aagĩthamakire arĩ kũu Tiriza.

²⁴Agĩcoka akĩgũra gĩthũngũri gĩa Samaria gwĩ Shemeru na taranda igĩrĩ cia betha; agĩgĩaka gĩthũngũri-inĩ kĩu, narĩo itũũra rĩu aakire akĩrĩtua Samaria, arĩĩtanĩtie na Shemeru ũcio warĩ mwene kĩrĩma kĩu.

²⁵Nake Omuri agĩĩka maũndũ marĩa monagwo marĩ moru nĩ Jehova, agĩgĩĩka maũndũ ma waganu gũkĩra arĩa othe maarĩ mbere yake.

²⁶Nĩ gũkorũo aathiaga na mĩthiĩre yothe ya Jeroboamu wa Nebati, o na mehia make marĩa ehirie na agĩtũma Aisiraeli o nao mehie, mathirĩkie Jehova, Ngai wa Isiraeli, mamũrakarie na maũndũ mao ma tũhũ.

²⁷Na rĩrĩ, ciĩko iria ingĩ cia Omuri, o na hinya wake ũrĩa onanirie-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

²⁸Omuri agĩgĩkoma hamwe na maithe, agĩthikwo Samaria; nake Ahabu, mũrũwe, agĩthamaka ithenya rĩake.

²⁹Na rĩrĩ, mwaka wa mĩrongo ĩtatũ na ĩnana ĩrĩa Asa, mũthamaki wa Juda, aakorirũo athamakĩte, nĩguo Ahabu, mũrũ wa Omuri, aambĩrĩirie gũthamakĩra Isiraeli; nake Ahabu ũcio wa Omuri agĩthamakĩra Isiraeli, o kũu Samaria, mĩaka mĩrongo ĩĩrĩ na ĩĩrĩ.

³⁰Nake Ahabu ũcio wa Omuri agĩĩka maũndũ marĩa monagwo marĩ moru nĩ Jehova gũkĩra arĩa othe maarĩ mbere yake.

³¹Na gũgĩkinya atĩrĩ, atĩ tondũ wa ũrĩa onaga ta arĩ ũndũ mũhũthũ mũno kũrũmĩrĩra mehia ma Jeroboamu wa Nebati-rĩ, akĩhikia Jezebeli, mwarĩ wa Ethibaali, mũthamaki wa Azidoni, agĩgĩthiĩ gũtungatĩra Baali, akĩmĩinamĩrĩra amĩhoe.

³²Nake agĩgĩakithĩria Baali kĩgongona thĩinĩ wa nyũmba ya Baali, ĩrĩa aakĩte kũu Samaria.

³³Nake Ahabu agĩgĩthondeka Ashera, o na agĩĩka maũndũ mangĩ ma kũrakaria Jehova, Ngai wa Isiraeli, gũkĩra athamaki arĩa angĩ othe a Isiraeli arĩa maarĩ mbere yake.

³⁴Na rĩrĩ, matukũ-inĩ make nĩguo Hieli, Mũbeth-eli, aacokereirie itũũra rĩa Jeriko akĩrĩaka; na rĩrĩa aarĩakaga gĩtina kĩarĩo, agĩkuĩrũo nĩ Abiramu mũrũwe wa irigithathi, o na ningĩ rĩrĩa ekagĩra mĩrango yarĩo, agĩkuĩrũo nĩ Segubu, mũrũwe wa kĩhinga-nda; o ta ũrĩa uuge wa Jehova watariĩ, ũrĩa aaririe na kanua ka Joshua, mũrũ wa Nuni.