1 Kings 15

¹Na rĩrĩ, mwaka wa ikũmi na ĩnana ĩrĩa Jeroboamu wa Nebati aakorirũo athamakĩte-rĩ, nĩguo Abijamu aambĩrĩirie gũthamakĩra Juda.

²Agĩgĩthamaka mĩaka ĩtatũ kũu Jerusalemu; nake nyina etagwo Maaka, mwarĩ wa Abishalomu.

³Nake akĩrũmĩrĩra mehia mothe ma ithe, o macio aatũire ehagia; na ndaigana kũrũmĩrĩra Jehova Ngai wake na ngoro yake yothe, ta ũrĩa ithe wao Daudi ekaga.

⁴No rĩrĩ, Jehova akĩmũhe tawa o kũu Jerusalemu nĩ ũndũ wa gũconokera Daudi, agĩkĩhanda mũrũwe ithenya rĩake athamake thutha wake, nĩguo atũme itũũra rĩu rĩa Jerusalemu rĩtũũre rĩĩ irũmu;

⁵nĩ gũkorũo Daudi nĩekaga maũndũ marĩa monagwo maagĩrĩire nĩ Jehova, na ndaigana kũgarũrũka na mwena ũngĩ agĩtiga gwĩka ũndũ o na ũmwe ũrĩa amwathĩte eke matukũ mothe ma muoyo wake, tiga o ũhoro-inĩ wa Mũhiti ũrĩa wetagwo Uria wiki.

⁶Na rĩrĩ, Rehoboamu nĩaatũũrĩte ahũranaga mbaara na Jeroboamu matukũ mothe marĩa aarĩ muoyo.

⁷Nacio ciĩko iria ingĩ cia Abijamu, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda? O na ningĩ Abijamu na Jeroboamu magĩtũũra mahũranaga mbaara.

⁸Nake Abijamu agĩkoma hamwe na maithe, nao andũ makĩmũthika itũũra rĩa Daudi; nake Asa mũrũwe agĩthamaka ithenya rĩake.

⁹Na rĩrĩ, mwaka wa mĩrongo ĩĩrĩ ĩrĩa Jeroboamu, mũthamaki wa Isiraeli, aakorirũo athamakĩte-rĩ, nĩguo Asa aambĩrĩirie gũthamakĩra Juda.

¹⁰Nake agĩthamaka mĩaka mĩrongo ĩna na ũmwe kũu Jerusalemu; nake nyina etagwo Maaka, mwarĩ wa Abishalomu.

¹¹Nake Asa agĩĩka maũndũ marĩa monagwo maagĩrĩire nĩ Jehova, o ta ũrĩa ithe Daudi ekaga.

¹²Agĩkĩeheria andũ arĩa maarũmagĩrĩra mĩtugo ya ũmaraya wa arũme na arũme, arĩa maarĩ kũu bũrũri ũcio, o na agĩthengia mĩhianano ya kũhoyũo yothe ĩrĩa yathondeketwo nĩ maithe.

¹³O na ningĩ agĩthengia nyina Maaka, atige gũtuĩka mũthamaki-mũndũ-wa-nja, nĩ ũndũ nĩaathondekithĩtie mũhianano wĩ thahu wa gũtuwo Ashera. Nake Asa agĩgĩtemenga mũhianano ũcio aahandĩte, akĩũgũithia thĩ, akĩũcinĩra karũũĩ-inĩ ga Kidironi.

¹⁴No rĩrĩ, matĩri ma kũndũ gũtũũgĩru matiathengirio; no o na gwatuĩka ũguo, Asa nĩaarũmĩrĩire Jehova na ngoro yake yothe matukũ make mothe.

¹⁵Nacio indo iria ithe aamũrĩire Jehova, agĩcitwara agĩciiga nyũmba ya Jehova thĩinĩ, hamwe na indo iria aamũrĩire Jehova we mwene; nacio ciarĩ betha na thahabu, o na indo ingĩ.

¹⁶Nao Asa na Baasha, mũthamaki wa Isiraeli, magĩtũũra mahũranaga mbaara matukũ mao mothe.

¹⁷Na rĩrĩ, Baasha ũcio, mũthamaki wa Isiraeli, akĩambata nĩguo akahũrane na Juda; nake agĩgĩakithia Rama, nĩ getha ndakareke mũndũ o na ũmwe oime Juda akinye bũrũri wake, o na kana mũndũ wa kũu gwake akinye he Asa mũthamaki wa Juda.

¹⁸Hĩndĩ ĩo Asa agĩkĩruta betha yothe, o na thahabu yothe, mũthithũ-inĩ wa indo cia bata iria ciaigĩtwo nyũmba ya Jehova, o na nyũmba ya mũthamaki. Nake mũthamaki, ti Asa, agĩcinengera ndungata ciake itwarĩrũo Beni-hadadi, mũrũ wa Tabirimoni wa Hezioni, mũthamaki wa Suriata, ũrĩa watũire Dameski, akĩmwĩra ũũ:

¹⁹Atĩrĩrĩ, niĩ nawe twĩ na kĩrĩkanĩro gĩa atĩ tũgĩe na ũiguano, o na baba na thoguo maarĩ o nakĩo; atĩrĩrĩ, kĩheo gĩkĩ kĩa betha na thahabu nĩkĩo ndakũrehithĩrie; rĩu gĩthiĩ ũgathũkie kĩrĩkanĩro kĩanyu na Baasha, mũthamaki wa Isiraeli, kĩa ũiguano, nĩguo anjeherere.

²⁰Nake Benihadadi agĩĩtĩkĩra ũhoro wa Asa, mũthamaki, agĩkĩrekia anene a mbũtũ ciake cia ita makahũre matũũra ma Isiraeli, nake akĩhũrithia Ijoni, na Dani, o na Abeli-bethi-maaka, o na Kinerethu guothe, hamwe na bũrũri wothe wa Nafitali.

²¹Na gũgĩkinya atĩrĩ, atĩ Baasha aaigua ũhoro ũcio, agĩtiga gwakithia Rama, agĩthiĩ gũtũũra Tiriza.

²²Hĩndĩ ĩo Asa, mũthamaki, agĩkĩhunjanĩria ũhoro agĩĩta andũ othe a Juda, na gũtiigana kũgĩa mũndũ o na ũmwe ũtetĩtwo athiĩ kĩaro kĩu; nao makĩeheria mahiga ma kũu Rama, o na mbaũ cia mwako iria Baasha aakaga kuo nacio; nake Asa, mũthamaki, agĩgĩakithia Geba, itũũra rĩa Benjamini, na indo icio, o na Mizipa.

²³Na rĩrĩ, ciĩko iria ingĩ cia Asa, o na hinya ũrĩa aarĩ naguo wothe, o na maũndũ marĩa mothe ekire, o na matũũra marĩa aakire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda? Na aakũra nĩaarũarire magũrũ.

²⁴Nake Asa agĩgĩkoma hamwe na maithe, agĩthikwo hamwe na maithe itũũra rĩa ithe, Daudi nake Jehoshafatu, mũrũwe, agĩthamaka ithenya rĩake.

²⁵Nake Nadabu, mũrũ wa Jeroboamu, aambĩrĩirie gũthamakĩra Isiraeli mwaka wa iĩrĩ ĩrĩa Asa mũthamaki wa Juda aakorirũo athamakĩte, agĩthamakĩra Isiraeli mĩaka ĩĩrĩ.

²⁶Nake agĩgĩĩka maũndũ marĩa monagwo marĩ moru nĩ Jehova, akĩrũmĩrĩra mĩthiĩre ya ithe, o na mehia make marĩa maatũmire Aisiraeli o nao mehie.

²⁷Na rĩrĩ, Baasha, mũrũ wa Ahija, wa nyũmba ya Isakaru, akĩgĩa ndundu ya kũmũũkĩrĩra; nake Baasha ũcio akĩmũũragĩra o kũu Gibethoni, itũũra rĩa Afilisiti; nĩ gũkorũo Nadabu, marĩ na Aisiraeli othe, nĩmaakorirũo mathiũrũrũkĩirie Gibethoni marĩtunyane.

²⁸Naguo mwaka wa ĩtatũ ĩrĩa Asa, mũthamaki wa Juda, aakorirũo athamakĩte, nĩguo Baasha oragire Nadabu ũcio, agĩgĩthamaka ithenya rĩake.

²⁹Na gũgĩkinya atĩrĩ, atĩ aatuĩka mũthamaki o ro ũguo-rĩ, akĩũraga andũ othe a nyũmba ya Jeroboamu; na ndaigana gũtigĩria Jeroboamu mũndũ o na ũmwe e muoyo; aamaninire o kũmanina biũ, o ta ũrĩa uuge wa Jehova watariĩ ũrĩa aaririe na ndungata yake Ahija, Mũshiloni,

³⁰nĩ ũndũ wa mehia ma Jeroboamu marĩa ehirie we mwene, na tondũ wamo agĩtũma Aisiraeli o nao mehie; o na ũmaramari wa ũrĩa aathirĩkirie Jehova, Ngai wa Isiraeli, akĩmũrakaria.

³¹Na rĩrĩ, ciĩko iria ingĩ cia Nadabu, o na maũndũ mothe marĩa ekire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

³²Nao Asa na Baasha, mũthamaki wa Isiraeli, magĩtũũra mahũranaga mbaara matukũ mao mothe.

³³Na rĩrĩ, mwaka wa ĩtatũ ĩrĩa Asa, mũthamaki wa Juda, aakorirũo athamakĩte-rĩ, nĩguo Baasha wa Ahija aambĩrĩirie gũthamakĩra Isiraeli othe kũu Tiriza, agĩgĩthamaka mĩaka mĩrongo ĩĩrĩ na ĩna.

³⁴Nake agĩgĩĩka maũndũ marĩa monagwo marĩ moru nĩ Jehova, akĩrũmĩrĩra mĩthiĩre ya Jeroboamu, o na akĩĩhia mehia o ta macio make marĩa maatũmire Aisiraeli o nao mehie.