1 Kings 2

¹Na rĩrĩ, matukũ ma Daudi ma gũkua magĩkuhĩhĩria, nake agĩgĩtaara Suleimani, mũriũ, akĩmwĩra atĩrĩ,

²Nĩngwĩthiĩra na njĩra ĩrĩa ĩgeragwo nĩ andũ othe a gũkũ thĩ; tondũ ũcio gĩa na hinya, na wĩyonanagie atĩ wĩ mũndũ mũrũme ki;

³na ũikarage ũmenyereire maũndũ marĩa Jehova Ngai waku aathanĩte, ũthiage na njĩra ciake, na ũmenyagĩrĩre irĩra cia watho wake wa kũrũmĩrĩrũo, o na maathani make, o na matuĩro make ma cira, o na maũira make, o ta ũrĩa kwandĩkĩtwo watho-inĩ wa Musa, nĩ getha ũgaacĩre maũndũ-inĩ marĩa ũrĩĩkaga, o na kũndũ guothe kũrĩa ũrĩerekagĩra;

⁴nĩ getha Jehova atũũre arũmĩtie ũhoro ũrĩa aaririe ũngoniĩ, akiuga ũũ: Atĩrĩrĩ, ciana ciaku ingĩtũũra imenyereire mĩthiĩre yacio, ithiage na mĩthiĩre ĩrĩa nguona yerekereire, igĩĩkaga maũndũ ma ũhoro-wa-ma na ngoro ciacio ciothe, o na mĩoyo yacio yothe-rĩ, ndũkaaga mũndũ wa gũikarĩra gĩtĩ gĩa ũthamaki gĩa Isiraeli, (ũguo nĩguo oigire).

⁵O na ningĩ atĩrĩ, wee nĩũũĩ ũndũ ũrĩa Joabu wa Zeruia aanjĩkire, o ũndũ ũcio ekire anene arĩa erĩ a mbũtũ cia ita cia Isiraeli, nao nĩo Abineri wa Neri na Amasa wa Jetheri, arĩa oragire, agĩitithia thakame hĩndĩ ya thayũ o ta ũrĩa ĩitagwo hĩndĩ ya ita, agĩgĩtũma thakame ĩo ya ita ĩgĩe mũcibi-inĩ wake ũrĩa eohete njohero, o na iratũ-inĩ ciake iria ekĩrĩte magũrũ.

⁶Tondũ ũcio mũtware o ta ũrĩa ũũgĩ waku ũtariĩ, na ndũkanareke mũtwe ũcio wake wĩ mbuĩ ũikũrukio Kwa-ngoma na thayũ.

⁷No rĩrĩ, ariũ a Barizilai Mũgileadi, mekage maũndũ mega ma ũtugi, na ũrekage matuĩke a thiritũ ya arĩa marĩagĩra irio metha-inĩ yaku; nĩ ũndũ o nao nĩmokire kũrĩ niĩ rĩrĩa ndorĩire Abisalomu, mũrũ wa thoguo, makĩnjĩka maũndũ mega ma ũtugi.

⁸Na atĩrĩrĩ, Shimei wa Gera, Mũbenjamini wa Bahurimu, arĩ o gũkũ hamwe nawe, o we ũcio wanumire kĩrumi kĩũru mũno mũthenya ũrĩa ndathiaga Mahanaimu; no rĩrĩ, rĩrĩa aaikũrũkire agĩũka gũ’thagania Jorodani, nĩndehĩtire mwĩhĩtwa ũkoniĩ Jehova nĩ ũndũ wake, ngĩmwĩra atĩrĩ, Ndikũũragithia na rũhiũ.

⁹No rĩrĩ, wee menya ũkanamũtua ta atarĩ mwĩhia, nĩ ũndũ wĩ mũndũ mũũgĩ, nawe nĩũkamenya ũrĩa wagĩrĩirũo nĩ kũmwĩka, naguo mũtwe wake ũcio wĩ mbuĩ nĩũkaũikũrũkia Kwa-ngoma na thakame.

¹⁰Thutha ũcio Daudi agĩgĩkoma hamwe na maithe, agĩthikwo itũũra rĩa Daudi.

¹¹Nayo mĩthenya ĩrĩa Daudi aathamakĩire Isiraeli, yarĩ mĩaka mĩrongo ĩna. Mĩaka mũgwanja yayo-rĩ, aathamakire arĩ Hebironi, nayo mĩaka mĩrongo ĩtatũ na ĩtatũ agĩthamaka arĩ Jerusalemu.

¹²Nake Suleimani agĩgĩikarĩra gĩtĩ gĩa ũthamaki gĩa ithe Daudi; naguo ũthamaki wake ũkĩhandwo ũgĩtũũra ũrũmĩte mũno.

¹³Hĩndĩ ĩo Adonija, mũrũ wa Hagithu, agĩthiĩ agĩkinya kwĩ Bathi-sheba, nyina wa Suleimani. Nake akĩmũũria atĩrĩ, Woka na thayũ? Nake agĩcokia atĩrĩ, Ĩĩ, nĩ thayũ.

¹⁴Ningĩ agĩkĩmwĩra atĩrĩ, Ndĩ na ũhoro ngwenda gũkwĩra. Nake agĩgĩcokia ũũ: Ta kĩuuge.

¹⁵Agĩkiuga atĩrĩ, Wee nĩũũĩ atĩ ũthamaki warĩ wakwa, na atĩ Aiairaeli othe nĩ niĩ maacũthĩrĩirie, atĩ nĩguo ’thamake; no rĩrĩ, rĩu ũthamaki nĩũgarũrĩtwo, ũgatuĩka wa mũrũ wa awa, nĩ ũndũ wa gwathĩrĩrio guo nĩ Jehova.

¹⁶Na rĩrĩ, rĩu no ũndũ ũmwe ngũkũhoya na ndũkarege. Nake agĩkĩmwĩra atĩrĩ, Ta kĩuuge.

¹⁷Nake akiuga atĩrĩ, Ndagũthaitha, aria na Suleimani, mũthamaki, nĩ ũndũ wee ndangĩkũregera, nĩguo a’he Abishagi, ũrĩa Mũshunami, atuĩke mũka wakwa.

¹⁸Nake Bathi-sheba agĩkiuga atĩrĩ, Ĩĩ, nĩ wega, nĩngũkwarĩrĩria he mũthamaki.

¹⁹Tondũ ũcio Bathi-sheba agĩthiĩ he mũthamaki Suleimani, akaarĩrĩrie Adonija harĩ we. Nake mũthamaki akĩarahũka akamũtũnge, akĩmũinamĩrĩra, agĩcoka agĩikarĩra gĩtĩ gĩake gĩa ũthamaki, na akĩigithĩria nyina wa mũthamaki gĩtĩ; nake nyina agĩgĩikara thĩ guoko-inĩ gwake kwa ũrĩo.

²⁰Nake agĩkiuga atĩrĩ, Nĩ kaũndũ kanini ndĩ nako ngũkũhoya; ndagũthaitha ndũkarege. Nake mũthamaki akĩmwĩra atĩrĩ, Ta kĩhoe ũndũ ũrĩa ũkũbatairie, maitũ; nĩ ũndũ ndingĩrega.

²¹Nake akiuga atĩrĩ, Reka Abishagi, Mũshunami, aheo Adonija mũrũ wa thoguo, atuĩke mũka.

²²Nake mũthamaki Suleimani agĩcokeria nyina akĩmũũria atĩrĩ, Nĩ kĩ gĩgũtũma ũhoere Adonija Abishagi ũcio Mũshunami? Ndũkĩmũhoere ũthamaki o naguo! Nĩ ũndũ nĩwe mũrũ wa baba ũrĩa mũkũrũ; ĩĩ-ni kĩmũhoere, o na ũũhoe nĩ ũndũ wa Abiatharu mũthĩnjĩri-Ngai, o na Joabu wa Zeruia!

²³Hĩndĩ ĩo mũthamaki Suleimani agĩkĩĩhĩta mwĩhĩtwa ũkoniĩ Jehova, akiuga atĩrĩ, Ngai aro’thũũra, o na akĩrĩrĩrie gũ’thũũra, ũndũ ũcio ũũrĩtio nĩ Adonija ũngĩaga gũtuĩka wa gũtũma orũo nĩ muoyo wake.

²⁴Na tondũ wa ũhoro ũcio, o ta ũrĩa Jehova atũũraga muoyo, o we ũcio wa’handire ũthamaki-inĩ ndũũre nũmĩte, o na akĩnjikarĩria gĩtĩ gĩa ũthamaki kĩa baba Daudi, o na agĩtũma ngĩe na rũciaro o ta ũrĩa eranĩire-rĩ, ti-itherũ Adonija ndarĩ hingo atekũũragwo ũmũthĩ.

²⁵Mũthamaki Suleimani agĩkĩrekia Benaia wa Jehoiada, nake akĩhũra Adonija o nginya agĩkua.

²⁶Naho ha ũhoro wa Abiatharu mũthĩnjĩri-Ngai, mũthamaki akĩmwĩra ũũ: Wee-rĩ, ũkĩra ũthiĩ Anathothu gĩthaka gĩaku, nĩ ũndũ nĩwagĩrĩirũo no gũkua; no rĩrĩ, ndikũũraga rĩu, nĩ ũndũ nĩwakuuire ithandũkũ rĩa Jehova Ngai ũgĩthiĩ mbere ya baba Daudi, o na ningĩ nĩ ũndũ nĩwanyariranĩirio na baba maũndũ-inĩ mothe marĩa baba aanyaririrũo namo.

²⁷Ũguo nĩguo Suleimani aakĩingatire Abiatharu, atige gũtuĩka mũthĩnjĩri-Ngai wa Jehova; agĩkĩhingia ũhoro wa Jehova, ũrĩa aarĩirie o kũu Shilo ũkoniĩ nyũmba ya Eli.

²⁸Naguo ũhoro ũcio ũgĩkinyĩra Joabu, nĩ gũkorũo Joabu nĩaagarũrũkĩte akarũmĩrĩra Adonija, o na harĩa ataarũmĩrĩire Abisalomu. Nake Joabu agĩkĩũrĩra Hema-inĩ ya Jehova, akĩĩnyitĩrĩra hĩa cia kĩgongona.

²⁹Naguo ũhoro ũcio ũkĩheo mũthamaki Suleimani, akĩĩrũo ũũ: Atĩrĩrĩ, Joabu orĩire Hema-inĩ ya Jehova, na e kĩgongona-inĩ. Suleimani agĩkĩrekia Benaia wa Jehoiada, akĩmwĩra atĩrĩ, Thiĩ ũmũũrage.

³⁰Nake Benaia agĩthiĩ, agĩkinya Hema-inĩ ya Jehova, akĩmwĩra atĩrĩ, Mũthamaki oiga ũũ: Uma na nja. Nake akiuga atĩrĩ, Aca, no ngũkuĩra o haha. Nake Benaia agĩgĩcokeria mũthamaki ũhoro, akĩmwĩra atĩrĩ, Joabu oiga ũna na ũna, ningĩ ũna na ũna nĩguo aanjokeria.

³¹Nake mũthamaki akĩmwĩra atĩrĩ, Ĩka o ta ũguo oiga, ũmũũrage na ũmũthike, nĩ getha ũnjehererie niĩ, o na nyũmba ya awa, thakame ĩrĩa Joabu aaitire hatarĩ gĩtũmi.

³²Nake Jehova nĩegũtũma thakame yake ĩmũcokerere we mwene, nĩ ũndũ nĩaahũrire andũ erĩ athingu na ega kũmũkĩra, akĩmoraga na rũhiũ rũa njora, nake awa Daudi agĩkorũo atamenyete ũhoro ũcio; nao andũ acio ũmwe nĩ Abineri wa Neri, mũnene wa mbũtũ cia ita cia Isiraeli, na ũrĩa ũngĩ nĩ Amasa wa Jetheri, mũnene wa mbũtũ cia ita cia Juda.

³³Ũguo noguo thakame yao ĩgacokerera Joabu o na rũciaro rũake tene na tene; no rĩrĩ, ha ũhoro wa Daudi na mbeũ yake, o na nyũmba yake, o na gĩtĩ gĩake gĩa ũthamaki-rĩ, nĩ thayũ uumĩte he Jehova ũgũtũũra wonekaga tene na tene.

³⁴Hĩndĩ ĩo Benaia wa Jehoiada agĩkĩambata, agĩthiĩ akĩmũguthũkĩra, akĩmũũraga; nake agĩthikwo mũciĩ wake o kũu werũ-inĩ.

³⁵Nake mũthamaki agĩtua Benaia wa Jehoiada mũnene wa mbũtũ cia ita ithenya rĩake; nake Zadoku mũthĩnjĩri-Ngai-rĩ, mũthamaki akĩmũcokia ithenya rĩa Abiatharu.

³⁶Nake mũthamaki akĩrekania Shimei agĩĩtwo, akĩmwĩra atĩrĩ, Wĩakĩre nyũmba Jerusalemu, ũtũũre kuo, na ndũkanoime kuo ũthiĩ handũ o na ha kana ha.

³⁷Nĩ gũkorũo mũthenya ũrĩa ũkoima kuo, ��ringe karũũĩ ga Kidironi, menya mũno atĩ ndũrĩ hingo ũtagakua; nayo thakame yaku nĩwe mwene ũgacokererũo nĩyo.

³⁸Nake Shimei agĩcokeria mũthamaki atĩrĩ, Kwaria kũu warĩtie nĩ kwega; o ta ũguo wee, mũthamaki ũyũ, mwathi wakwa, uugĩte-rĩ, ũguo noguo niĩ, ndungata yaku, ngwĩka. Nake Shimei agĩgĩtũũra Jerusalemu matukũ maingĩ.

³⁹Na gũgĩkinya atĩrĩ, atĩ mĩaka ĩtatũ yathira, andũ erĩ a ndungata cia Shimei makĩũrĩra harĩ Akishi, mũrũ wa Maaka, mũthamaki wa Gathu. Nake Shimei akĩheo ũhoro ũcio akĩĩrũo ũũ: Atĩrĩrĩ, ndungata ciaku irĩ o kũu Gathu.

⁴⁰Nake Shimei agĩkĩarahũka, agĩtandĩka ndigiri yake, agĩthiĩ agĩkinya Gathu kwa Akishi, nĩguo agacarie ndungata ciake; agĩcoka akĩinũkia ndungata icio ciake acirutĩte kũu Gathu.

⁴¹Naguo ũhoro ũcio ũkĩheo Suleimani, akĩĩrũo atĩ Shimei nĩarathiĩte Gathu, akoima Jerusalemu, na atĩ rĩu nĩainũkĩte.

⁴²Nake mũthamaki agĩkĩrekania Shimei agĩĩtwo, akĩmũũria atĩrĩ, Githĩ ndiakwĩhĩtithirie mwĩhĩtwa ũkoniĩ Jehova, o na ngĩgũkaania mũno, ngĩkwĩra ũũ: Atĩrĩrĩ, menya wega na ma, o ma, atĩ mũthenya ũrĩa ũkoima itũũra-inĩ rĩrĩ ũthiĩ handũ o na ha kana ha, ndũrĩ hingo ũtakoragwo? O nawe hĩndĩ ĩo ũkĩnjarĩria ũkĩnjĩra ũũ: Kwaria kũu warĩtie ngĩĩiguagĩra nĩ kwega.

⁴³Rĩu-rĩ, nĩ kĩ gĩakĩgiririe ũikare ũrũmĩtie mwĩhĩtwa ũcio wehĩtire ũkoniĩ Jehova, o na watho ũrĩa ndagwathire?

⁴⁴Ningĩ mũthamaki akĩĩra Shimei atĩrĩ, Wee mwene nĩũũĩ waganu wothe ũrĩa wekire awa Daudi, o ũcio ũtũire ũmenyete na ngoro yaku; tondũ ũcio Jehova nĩegũtũma ũcokererũo nĩ waganu ũcio wee mwene.

⁴⁵No rĩrĩ, niĩ Suleimani, mũthamaki wanyu, nĩ kũrathimwo ngũrathimwo, o nakĩo gĩtĩ kĩa ũnene kĩa Daudi nĩgĩkũhandwo gĩtũũre kĩrũmĩte wega mbere ya Jehova tene na tene.

⁴⁶Tondũ ũcio mũthamaki agĩgĩatha Benaia wa Jehoiada; nake akiumagara, agĩthiĩ akĩhũra Shimei, agĩkua. Naguo ũthamaki ũcio ũkĩhandwo ũgĩtũũra ũrũmĩte wega hĩndĩ ĩo Suleimani aathamakaga.