1 Kings 3

¹Na rĩrĩ, Suleimani agĩtuma ũthoni na Firauni, mũthamaki wa Misiri, agĩgĩtwara mwarĩ wa Firauni, akĩmũhira itũũra rĩa Daudi, o nginya hĩndĩ ĩrĩa aarĩkirie gwaka nyũmba yake mwene, o na nyũmba ya Jehova, o na rũthingo rũrĩa rũathiũrũkĩirie Jerusalemu.

²No rĩrĩ, andũ maatũire o marutagĩra igongona matĩri-inĩ ma kũndũ gũtũũgĩru, nĩ ũndũ gũtiarĩ nyũmba yaakĩirũo rĩĩtwa rĩa Jehova o nginya matukũ macio.

³Nake Suleimani agĩtũũra endete Jehova, agathiaga arũmĩrĩire irĩra cia watho wa kũrũmĩrĩrũo iria cia ithe Daudi; no nĩaarutagĩra igongona agacinĩra ũbumba matĩri-inĩ macio ma kũndũ gũtũũgĩru.

⁴Nake mũthamaki agĩgĩthiĩ Gibeoni akarutĩre igongona kuo; nĩ ũndũ kũu nĩkuo kwarĩ itĩri rĩrĩa rĩekĩrĩirũo mũno; Suleimani agĩkĩrutĩra nyamũ ngiri ĩmwe cia mahaki ma njino kĩgongona-inĩ kĩu.

⁵Nakuo kũu Gibeoni Jehova akiumĩrĩra Suleimani na njĩra ya kĩroto ũtukũ; nake Ngai akĩmwĩra atĩrĩ, Ta hoya kĩrĩa ngũkũhe.

⁶Nake Suleimani akiuga atĩrĩ, Nĩwekire baba, Daudi ndungata yaku, maũndũ manene ma utugĩ, o ta ũrĩa aathiaga mbere yaku na mĩthiĩre ya ma na ya ũthingu, o na akagĩa ngoro ĩtarĩ maheni akĩonwo nĩwe; o na ningĩ ũkĩmũigĩra ũndũ ũyũ mũnene wa ũtugi, wa atĩ nĩũmũheete mũriũ wa gũikarĩra gĩtĩ gĩake gĩa ũthamaki, o ta ũũ kuonekete ũmũthĩ.

⁷Na rĩu wee, Jehova Ngai wakwa, nĩ niĩ ndungata yaku ũtuĩte mũthamaki ithenya rĩa baba Daudi; na ndĩgĩtariĩ o ta kaana kanini; ndirĩ na ũũgĩ wa kũmenya mĩthiĩre ĩrĩa mĩega ngiumagara kana ngĩcoka na mũciĩ.

⁸Ningĩ niĩ, ndungata yaku, njikarĩte thĩinĩ wa andũ aku arĩa ũthurĩte, na nĩ aingĩ mũno; matingĩgereka, kana matarĩke nĩ ũndũ wa ũrĩa maingĩhĩte.

⁹Tondũ ũcio, niĩ ndungata yaku ’he ngoro ĩĩ na ũũgĩ wa gũcirĩra andũ aku, nĩ getha ’hotage gũkũũrana wega na ũũru; nĩ ũndũ-rĩ, andũ aya aku aingĩ ũũ-rĩ, nũ ũngĩkĩhota kũmacirĩra?

¹⁰Naguo uuge ũcio ũgĩgĩkenia Jehova, nĩ ũndũ wa ũndũ ũcio Suleimani aahoire.

¹¹Nake Ngai agĩkĩmwĩra atĩrĩ, Tondũ nĩwahoya ũndũ ũcio, na ndũnehoera atĩ ũtũũre muoyo matukũ maingĩ, kana wehoera ũtonga, kana wahoya mĩoyo ya thũ ciaku, ĩninwo; no nĩ ũmenyi wega maũndũ wehoera, nĩguo ũhotage gũcirĩra andũ na kĩhooto,

¹²tondũ ũcio-rĩ, nĩndeka o ta ũguo kũhoya kũu gwaku gũtariĩ; nĩndakũhe ngoro ĩĩ na ũũgĩ, o na ũmenyi wega maũndũ, o nginya gũtuĩke atĩ mbere yaku gũtirĩ kwagĩa mũndũ ũngĩ tawe, kana thutha waku gũkaarahũka mũndũ o na ũrĩkũ tawe.

¹³O na ningĩ indo iria ũtahoete o nacio nĩndakũhe, nacio nĩ ũtonga na gwĩkĩrĩrũo, o nginya gũtuĩke atĩ matukũ maku mothe gũtirĩ mũthamaki o na ũmwe wa athamaki arĩa angĩ ũgatuĩka tawe.

¹⁴O na ningĩ ũngĩĩtĩkĩra gũthiaga na mĩthiĩre ya kũnũmĩrĩra, ũmenyagĩrĩre irĩra cia watho wakwa wa kũrũmĩrĩrũo, o na maathani makwa, o ta ũrĩa mĩthiĩre ya thoguo Daudi yatariĩ-rĩ, nĩngaingĩhia matukũ maku.

¹⁵Nake Suleimani agĩgĩũkĩra toro, agĩkora nĩ kĩroto. Thutha wa ũguo agĩthiĩ agĩkinya Jerusalemu, akĩrũgama mbere ya ithandũkũ rĩa kĩrĩkanĩro kĩa Jehova, akĩruta mahaki ma njino na magongona ma ũiguano, o na akĩrugithĩria ndungata ciake ciothe iruga.

¹⁶Na rĩrĩ, hĩndĩ ĩo aka erĩ a maraya magĩgĩthiĩ he mũthamaki, makĩrũgama mbere yake.

¹⁷Nake mũndũ-wa-nja ũmwe akiuga ũũ: Hĩ! Atĩrĩrĩ, mwathi wakwa, niĩ na mũndũ-wa-nja ũyũ tũtũũraga nyũmba ĩmwe; na niĩ ndĩrohoka tũrĩ o nake nyũmba.

¹⁸Na kũrakinya atĩrĩ, atĩ mũthenya wa ĩtatũ thutha wa ndarĩkia kuohoka, mũndũ-wa-nja ũyũ o nake aracoka arohoka; na tũrarĩ o hamwe; na tũtirarĩ na mũgeni kuo, tiga o ithuĩ ithuerĩ tũrarĩ nyũmba ĩo.

¹⁹Nako kaana ka mũndũ-wa-nja ũyũ karakua ũtukũ, nĩ ũndũ nĩaragakomeire.

²⁰Nake arokĩra ũtukũ gatagatĩ, hĩndĩ ĩrĩa niĩ, ndungata yaku ya mũndũ-wa-nja, ndĩrakomete, aroya kaana gakwa arakaruta harĩ niĩ, arathiĩ arakaiga gĩthũri-inĩ gĩake, aracoka araiga kaana gake ge gakuũ gĩthũri-inĩ gĩakwa.

²¹No rĩrĩ, rĩrĩa ndĩrarokire gũũkĩra rũcinĩ, atĩ nĩguo nyongithie kaana gakwa, ndĩrona atĩ nĩ gakuũ; no rĩrĩ, hĩndĩ ĩrĩa ndĩrakabarire wega rũcinĩ-rĩ, ndĩrona atĩ tiko kaana gakwa karĩa ndaciarĩte.

²²Nake mũndũ-wa-nja ũcio ũngĩ akiuga atĩrĩ, Aca, ũguo tiguo; no rĩrĩ, kaana gaka ke muoyo nĩko gakwa, nako kaana kau gakuũ nĩko gaku. Nake ũcio ũngĩ wa mbere akiuga atĩrĩ, Aca, no rĩrĩ, kaana gaka gakuũ nĩko gaku, nako kaana kau ke muoyo nĩko gakwa. Ũguo nĩguo maaragia me mbere ya mũthamaki.

²³Hĩndĩ ĩo mũthamaki agĩkiuga atĩrĩ, Inyuĩ o mũndũ wanyu ekuuga atĩrĩ, Kaana gaka ke muoyo nĩko gakwa, nako kaana gaku nĩko karĩa gakuũ; nake ũrĩa ũngĩ akoiga atĩrĩ, Aca, ũguo tiguo, no rĩrĩ, kaana gaku nĩko gakuũ, na kaana gakwa nĩko ke muoyo.

²⁴Nake mũthamaki agĩkiuga atĩrĩ, Ta ngĩrĩra rũhiũ rũa njora. Nao magĩtwarithĩria mũthamaki rũhiũ rũa njora.

²⁵Nake mũthamaki agĩkiuga atĩrĩ, Atũraniai kaana gaka ke muoyo njatũ igĩrĩ, mũnengere mũtumia ũmwe rũatũ rũmwe, nake mũtumia ũrĩa ũngĩ mũmũnengere rũu rũngĩ.

²⁶Hĩndĩ ĩo mũndũ-wa-nja ũrĩa warĩ mwene kama kau kaarĩ muoyo akĩarĩria mũthamaki nĩ gũikio nĩ ngoro nĩ ũndũ wa kaana kau gake, akiuga ũũ: Atĩrĩrĩ, mwathi wakwa, mũnengere kaana kau ke muoyo; ndagũthaitha ndũgakorage o na atĩa. No rĩrĩ, mũndũ-wa-nja ũcio ũngĩ akiuga atĩrĩ, Gatingĩtuĩka gakwa kana gaku; reke gaatũranio njatũ igĩrĩ.

²⁷Hĩndĩ ĩo mũthamaki agĩgĩcokia ũhoro akiuga atĩrĩ, Nengerai ũcio kaana kau ke muoyo; menyai mũkorage o na atĩa; ũcio nĩwe nyina wako.

²⁸Nao Isiraeli othe makĩigua ituĩro rĩa cira ũcio rĩrĩa rĩatuĩtwo nĩ mũthamaki; nao magĩgĩĩtigĩra mũthamaki ũcio; nĩ gũkorũo nĩmonire atĩ ũũgĩ wa Ngai warĩ thĩinĩ wake atuage cira na kĩhooto.