1 Kings 8

¹Hĩndĩ ĩo Suleimani akĩũnganithia athuri a Isiraeli mathiĩ harĩ we, o kũu Jerusalemu, o na anene othe a mĩhĩrĩga, o acio atongoria a nyũmba cia maithe ma ciana cia Isiraeli, makaambatie ithandũkũ rĩa kĩrĩkanĩro kĩa Jehova, marĩrute itũũra rĩa Daudi, narĩo nĩrĩo Zayuni.

²Nao andũ othe a Isiraeli magĩgĩtũngana he mũthamaki Suleimani gĩathĩ-inĩ, o mweri wa Ethanimu, naguo nĩguo mweri wa mũgwanja.

³Nao athuri othe a Isiraeli magĩthiĩ kuo, nao athĩnjĩri-Ngai makĩoya ithandũkũ rĩu.

⁴Nao makĩambatia ithandũkũ rĩu rĩa Jehova, o na hema-ya-gũtũnganwo, o na indo ciothe iria nyamũre ciarĩ Hema-inĩ ĩo thĩinĩ; nacio indo icio-rĩ, athĩnjĩri-Ngai o na Alawii magĩgĩciambatia.

⁵Nake mũthamaki Suleimani, o na kĩrĩndĩ gĩothe gĩa Isiraeli kĩrĩa gĩacokanĩrĩire harĩ we, gĩgĩkorũo kĩĩ hamwe nake hau mbere ya ithandũkũ rĩu, gĩkĩruta magongona ma mbũri na ndegwa itangĩheanĩka ũhoro wacio, kana itarĩke, nĩ ũndũ wa ũrĩa ciaingĩhĩte.

⁶Nao athĩnjĩri-Ngai magĩgĩtonyia ithandũkũ rĩa kĩrĩkanĩro kĩa Jehova makĩrĩiga o handũ harĩo mũhuro wa mathagu ma makerubi, o handũ hau hatheru mũno ha nyũmba ĩo, nĩho harĩa haamũrĩtwo hagatuwo hatheru mũno gũkĩra kũrĩa kũngĩ guothe.

⁷Nĩ ũndũ makerubi maatambũrũkĩtie mathagu mamo igũrũ rĩa handũ hau ha kũigwo ithandũkũ rĩu, namo makerubi macio magĩkĩhumba ithandũkũ rĩu, o na mĩtĩ ĩrĩa mĩraya yarĩo.

⁸Nayo mĩtĩ ĩo mĩraya nĩyaraihĩte mũno o nginya mĩthia yayo ĩkoneka nĩ mũndũ e nyũmba ĩrĩa theru ĩrĩa ĩrĩ mbere ya kanyũmba kau kangĩ gatheru mũno, no ndĩonagwo nĩ mũndũ wĩ nja; naho hau noho ĩrĩ, o na ũmũthĩ.

⁹Na rĩrĩ, ithandũkũ rĩu thĩinĩ gũtiarĩ kĩndũ tiga o ihengere icio igĩrĩ cia mahiga iria Musa ekĩrire kuo arĩ Horebu, hĩndĩ ĩrĩa Jehova aarĩkanĩire kĩrĩkanĩro na ciana cia Isiraeli, o ihinda rĩrĩa cioimire bũrũri wa Misiri.

¹⁰Na gũgĩkinya atĩrĩ, atĩ hĩndĩ ĩrĩa athĩnjĩri-Ngai moima handũ hau hatheru, itu rĩgĩkĩiyũra nyũmba ĩo ya Jehova,

¹¹o nginya athĩnjĩri-Ngai makĩremwo nĩ kũrũgama kuo marute wĩra nĩ ũndũ wa itu rĩu; nĩ gũkorũo riri wa Jehova nĩwaiyũrĩte nyũmba ĩo ya Jehova.

¹²Hĩndĩ ĩo Suleimani agĩkĩaria, akiuga atĩrĩ, Jehova oigĩte atĩ arĩikaraga nduma-inĩ ĩrĩa ndumanu mũno.

¹³Tondũ ũcio wee, Jehova, ti-itherũ rĩu nĩngwakĩire nyũmba ya gũikara, nĩguo ĩtuĩke handũ haku ha gũtũũra tene na tene.

¹⁴Nake mũthamaki agĩkĩhũgũra ũthiũ, akĩrathima kĩrĩndĩ gĩothe gĩa Isiraeli; nakĩo kĩrĩndĩ kĩu gĩothe gĩa Isiraeli gĩgĩkorũo kĩrũngiĩ.

¹⁵Agĩkiuga atĩrĩ, Jehova, Ngai wa Isiraeli, arogathwo, o we ũcio waarĩirie awa Daudi na kanua gake, naguo ũndũ ũcio aamwarĩirie akĩũhingia, akiuga atĩrĩ,

¹⁶Gwata mũthenya ũrĩa ndoimagaririe andũ akwa Isiraeli ngĩmaruta bũrũri wa Misiri-rĩ, ndirĩ ndathura itũũra o na rĩmwe mĩhĩrĩga-inĩ yothe ya Isiraeli atĩ nĩguo njake nyũmba kuo, nĩ getha atĩ rĩĩtwa rĩakwa rĩikarage kuo; no rĩrĩ, nĩndathurire Daudi atuĩke mwathi wa andũ akwa Isiraeli.

¹⁷Na rĩrĩ, awa Daudi nĩaacirĩire na ngoro yake gwakĩra Jehova, Ngai wa Isiraeli, nyũmba ĩĩtanĩtio na rĩĩtwa rĩake.

¹⁸No rĩri, Jehova nĩerire awa Daudi ũũ: Kuona atĩ nĩwacirĩire na ngoro yaku gwaka nyũmba ĩĩtanĩtio na rĩĩtwa rĩakwa-rĩ, nĩwekire wega nĩ ũndũ wa kũgĩa na ũhoro ũcio ngoro-inĩ yaku;

¹⁹no rĩrĩ, wee tiwe ũgaaka nyũmba ĩo, no nĩ mũrũguo ũrĩa ũkoima mũthimo waku; ũcio nĩwe ũgaaka nyũmba ĩĩtanĩtio na rĩĩtwa rĩakwa.

²⁰Naguo ũhoro ũcio Jehova aaririe nĩatũire aũrũmĩtie; nĩ gũkorũo nĩ niĩ njarahũrĩtwo njoke ithenya rĩa awa Daudi, na ngaikarĩra gĩtĩ kĩa ũnene gĩa Isiraeli, o ta ũrĩa Jehova eranĩire, na nĩnjakĩire Jehova, Ngai wa Isiraeli, nyũmba ĩno ĩĩtanĩtio na rĩĩtwa rĩake.

²¹Nakuo kũu nĩkuo ’thondekete handũ ha kũiga ithandũkũ rĩrĩa, rĩĩ na kĩrĩkanĩro kĩa Jehova, kĩrĩa aarĩkanĩire na maithe maitũ hĩndĩ ĩrĩa aamarutire bũrũri wa Misiri.

²²Nake Suleimani agĩkĩrũgama hau mbere ya kĩgongona kĩa Jehova, akĩonagwo nĩ kĩrĩndĩ gĩothe gĩa Isiraeli, agĩtambũrũkia moko amaroretie igũrũ;

²³agĩkiuga atĩrĩrĩ: Wee, Jehova, Ngai wa Isiraeli, gũtirĩ ngai ĩngĩ ĩhaana tawe kũu matu-inĩ igũrũ, kana gũkũ thĩ mũhuro wamo, wee ũtũũraga ũrũmĩtie kĩrĩkanĩro kĩrĩa ũrĩkanĩire na ndungata ciaku iria ikũrũmagĩrĩra na ngoro ciacio ciothe, o na ũgaciiguĩra tha;

²⁴wee ũtũũraga ũrũmĩtie kĩĩranĩro kĩrĩa werĩire awa, Daudi, ndungata yaku; na ti-itherũ nĩwe waaririe na kanua gaku ũkĩheana ũhoro, naguo ũhoro ũcio ũkĩũhingia o ta ũrĩa kuonekete ũmũthĩ.

²⁵Tondũ ũcio wee, Jehova Ngai wa Isiraeli, rĩu tũma atĩ ũndũ ũrĩa werĩire awa Daudi, ndungata yaku, ũtũũre ũrũmĩtio, o ũhoro ũcio waaririe ũkiuga ũũ: Wee-rĩ, ndũkaaga mũndũ wa gũikarĩra gĩtĩ gĩa ũthamaki gĩa Isiraeli akĩonwo nĩ niĩ, kũngĩkorũo ti-itherũ ciana ciaku nĩirĩmenyagĩrĩra mĩthiĩre ĩrĩa irĩthiaga nayo, nĩ getha ithiage na mĩthiĩre ĩrĩa nguona yerekereire o ta ũrĩa nyonaga atĩ wee nĩũthiaga nayo.

²⁶Na rĩrĩ, tondũ ũcio wee, Ngai wa Isiraeli, ndagũthaitha ũtũme atĩ ũhoro waku ũcio waaririe na awa Daudi, ndungata yaku, ũmenyeke atĩ warĩ wa ma.

²⁷No rĩrĩ, anga ti-itherũ Ngai aagĩtũũra gũkũ thĩ? Atĩrĩrĩ, matu-inĩ, o na matu-inĩ marĩa ma igũrũ mũno, ndũngĩiganĩra kuo; kuona nĩ ũguo-rĩ, kaĩ akĩrĩ maita maigana atĩa hihi ũngĩkĩaga kũiganĩra nyũmba ĩno njakĩte!

²⁸No rĩrĩ, wee, Jehova Ngai wakwa, ĩtĩkĩra gũthikĩrĩria ihoya rĩrĩ rĩakwa, niĩ ndungata yaku, o na gũthaithana gwakwa, nĩ getha ũigue kũrĩra kũrĩa ndĩrarĩra, o na ihoya rĩrĩ, niĩ ndungata yaku ndĩrahoya harĩ wee ũmũthĩ;

²⁹nĩ getha maitho maku maikarage maracũrĩirio nyũmba ĩno ũtukũ na mũthenya, o handũ haha waaririe ũhoro waho ũkiuga ũũ: Rĩĩtwa rĩakwa rĩrĩikaraga ho; nĩ getha ũthikagĩrĩrie ihoya rĩrĩa niĩ, ndungata yaku, ndĩrĩhoyaga ndorete handũ haha.

³⁰Na ũthikagĩrĩrie gũthaithana gwakwa, niĩ ndungata yaku, o na kwa andũ aku Isiraeli, o hĩndĩ ĩrĩa makahoya marorete handũ haha. Ĩĩ, ndagũthaitha ũkaigua ũrĩ o kũu igũrũ matu-inĩ, o kũndũ kũrĩa ũtũũraga. Na watũigua ũtuohere.

³¹Mũndũ angĩkehia mũndũ ũrĩa ũngĩ, nake aigĩrũo mwĩhĩtwa atĩ nĩguo ehĩte, na acoke ehĩtĩre mbere ya kĩgongona gĩaku nyũmba-inĩ ĩno-rĩ,

³²ndagũthaitha ũkaigua ũhoro ũcio ũrĩ o kũu igũrũ, na ũrore ũhoro ũcio, ũtuithanie ndungata ciaku cira wacio, ũtuĩre mũndũ ũrĩa mwaganu cira wake ũũru, ũtũme acokererũo nĩ ũũru ũcio wake nake mũndũ ũrĩa mũthingu ũtue atĩ ti mwĩhia, ũmũheithie maũndũ maringaine na ũthingu wake.

³³Ningĩ-rĩ, hĩndĩ ĩrĩa andũ aku Isiraeli mangĩhũrũo matorio biũ nĩ thũ ciao nĩ ũndũ wa ũrĩa makwĩhĩtie, mangĩgakũgarũrũkĩra, moimbũranĩre atĩ nĩ aku makĩgwetaga rĩĩtwa rĩaku, makũhoere nyũmba ĩno o na magũthaithĩre kuo;

³⁴ndagũthaitha ũkamaigua, ũrĩ o kũu igũrũ, na wohanĩre mehia ma andũ aku Isiraeli, na ũmacokie bũrũri ũrĩa waheire maithe mao.

³⁵Ningĩ-rĩ, matu mangĩkahingwo, mbura yage kuura nĩ ũndũ wa ũrĩa makwĩhĩtie-rĩ, mangĩgakũhoya marorete handũ haha, na moimbũranĩre atĩ nĩ aku makĩgwetaga rĩĩtwa rĩaku, na magarũrũke matige wĩhia wao hĩndĩ ĩo wamanyarira,

³⁶ndagũthaitha ũkamaigua ũrĩ o kũu igũrũ, na wohanĩre mehia ma ndungata ciaku, o na ma andũ aku Isiraeli, ũkĩmarutaga mĩthiĩre mĩega ĩrĩa maagĩrĩirũo nĩ gũthiaga nayo; na ũcoke uurie mbura bũrũri waku, ũcio ũheete andũ aku ũtuĩke igai rĩao.

³⁷Na rĩrĩ, bũrũri ũyũ ũngĩkagĩa ng’aragu, kana mũrimũ mũũru, kana rũhuho rũhiũ rũa gũcina irio mĩgũnda, kana mbuu, kana ngigĩ, kana igunyũ njũru; o na mangĩkarigicĩrio nĩ thũ ciao o kũu ihingo-inĩ cia matũũra mao thĩinĩ nĩguo imatunyane; kana mangĩkorũo nĩ mũthiro, kana mũrimũ o na ũrĩkũ-rĩ,

³⁸ihoya rĩrĩa rĩkahoyũo hĩndĩ ĩo, kana gũthaithana kwa mũndũ o na ũrĩkũ, kana kwa andũ aku othe Isiraeli nĩ ũndũ wa kũmenya mĩrimũ ya ngoro ciao o ene, mũndũ o mũndũ, mangĩhoya magũtambũrũkĩirie moko mao mamaroretie nyũmba ĩno-rĩ,

³⁹ndagũthaitha ũkamaigua ũrĩ o kũu igũrũ handũ haku harĩa ũtũũraga, na wohanĩre, na ũrore ũhoro wao, ũtũme mũndũ o mũndũ acokererũo nĩ maũndũ maringaine na ũrĩa mĩthiĩre yake yothe ĩtariĩ, o ta ũrĩa wee ũũĩ ngoro yake; (nĩ ũndũ wee, o wee wiki nĩũũĩ ngoro cia ciana cia Adamu ciothe;)

⁴⁰nĩ getha igwĩtigagĩre matukũ mothe marĩa igũtũũra bũrũri ũyũ waheire maithe maitũ.

⁴¹O na ningĩ atĩrĩ, ha ũhoro wa mũndũ wa kũngĩ ũrĩa ũtarĩ wa andũ aku Isiraeli-rĩ, angĩgoka oimĩte bũrũri wa kũraya nĩ ũndũ wa ngumo ya rĩĩtwa rĩaku,

⁴²(tondũ andũ nĩmakaigua ngumo ya rĩĩtwa rĩu rĩaku inene, o na ũhoro wa maũndũ marĩa wĩkaga ma hinya, guoko gwaku gũtambũrũkĩtio;) hĩndĩ ĩrĩa mũndũ ũcio wa kũngĩ agoka ahoe arorete nyũmba ĩno,

⁴³ndagũthaitha ũkamũigua ũrĩ o kũu igũrũ handũ haku harĩa ũtũũraga, na wĩke maũndũ mothe marĩa maatũmire mũndũ ũcio wa kũngĩ agũkaĩre; nĩguo andũ othe a gũkũ thĩ mamenye rĩĩtwa rĩaku, nĩ getha magwĩtigĩre o ta ũrĩa andũ aku Isiraeli magwĩtigĩrĩte, o na ningĩ nĩ getha mamenye atĩ nyũmba ĩno njakĩte ĩĩtanĩtio na rĩĩtwa rĩaku.

⁴⁴Ningĩ andũ aku mangĩkoimagara mathiĩ ita-inĩ makahũrane na thũ ciao-rĩ, o njĩra ĩrĩa yothe ũkamatwarithĩria, nao mahoe Jehova marorete itũũra rĩrĩ ũthurĩte, na marorete nyũmba ĩno njakĩte ĩĩtanĩtio na rĩĩtwa rĩaku;

⁴⁵ndagũthaitha ũkaigua ihoya rĩao, o na gũthaithana kwao, ũrĩ o kũu igũrũ, na ũmatiirĩrĩre ũhoro-inĩ ũcio wao.

⁴⁶Na mangĩgakwĩhia, (tondũ hatikĩrĩ mũndũ o na ũmwe ũtehagia), nawe ũrakario nĩo, ũmarekererie, ũmaneane harĩ thũ ciao, na tondũ wa ũguo matahwo nĩcio, matwarũo bũrũri wacio kũndũ kũraya, kana o gũkuhĩ;

⁴⁷mangĩgakorũo megwĩciria ũrĩa ũhoro wao ũtariĩ, marĩ o kũu bũrũri ũrĩa maatwarirũo maatahwo, nao magarũrũke, magũthaithe marĩ o kũu bũrũri wa andũ acio maamatahire, makiugaga atĩrĩ, Nĩtwĩhĩtie, na tũgeka maũndũ ma ũkĩgu na ma waganu;

⁴⁸nao magũcokerere na ngoro ciao ciothe, o na mĩoyo yao yothe, marĩ o kũu bũrũri wa thũ ciao iria ciamatahire, nao makũhoe marorete bũrũri ũyũ wao ũrĩa waheire maithe mao, o itũũra rĩrĩ wee wathurire, o na nyũmba ĩno njakĩte rĩĩtanĩtio na rĩĩtwa rĩaku;

⁴⁹hĩndĩ ĩo ndagũthaitha ũkaigua ihoya rĩao, o na gũthaithana kwao, ũrĩ o kũu igũrũ handũ haku harĩa ũtũũraga, ũtiirĩrĩre ũhoro wao,

⁵⁰o na wohere andũ aku, o acio makwĩhĩtie, o na ũmohere mahĩtia mao mothe marĩa makwĩhĩtie; o na warahũre ngoro cia andũ arĩa maamatahire igĩe na tha, nĩ getha mamaiguĩre tha;

⁵¹nĩ gũkorũo andũ acio nĩ aku, na nĩo igai rĩaku, o acio woimagaririe ũkĩmaruta Misiri, o na ũkĩmaruta icua-inĩ rĩa mwaki wa gũtwekia igera.

⁵²Na arĩ korũo waracũria maitho maku manyone niĩ, ndungata yaku, o na andũ aku Isiraeli tũgĩgũthaitha, nĩ getha ũtũigue hĩndĩ ĩrĩa yothe tũgũgũkaĩra!

⁵³Nĩ ũndũ wee, nĩwe watũmire andũ aya aku magĩe ngũũrani na andũ arĩa angĩ othe a gũkũ thĩ, matuĩke igai rĩaku o ta ũrĩa waaririe na kanua ka Musa, ndungata yaku, hĩndĩ ĩrĩa wee, Mwathani Jehova, warutire maithe maitũ moime Misiri.

⁵⁴Na gũgĩkinya atĩrĩ, atĩ Suleimani aarĩkia kũhoya ihoya rĩu rĩothe, o na gũthaithana kũu aathaithire Jehova, agĩũkĩra agĩtiga gũturia ndu o hau mbere ya kĩgongona kĩa Jehova atambũrũkĩtie moko amaroretie igũrũ.

⁵⁵Agĩkĩĩhanda arũngiĩ, akĩrathima kĩrĩndĩ kĩu gĩothe gĩa Isiraeli na mũgambo mũnene, akiuga atĩrĩ,

⁵⁶Jehova arogoocwo, o we ũcio ũheete andũ ake Isiraeli ũhoro wa kũhurũka, o ta ũrĩa maũndũ mothe marĩa eranĩira matariĩ; na hatirĩ kiugo o na kĩmwe kĩagĩte kuoneka kĩa maũndũ macio mothe mega eranĩire, o macio eranĩire na kanua ka Musa, ndungata yake.

⁵⁷Jehova Ngai witũ aroikara hamwe na ithuĩ, o ta ũrĩa aaikaraga hamwe na maithe maitũ. Aroaga gũtũtiga kana atũthengere;

⁵⁸nĩ getha endithie ngoro ciitũ harĩ we, nĩguo tũthiage na njĩra ciake ciothe, na tũmenyagĩrĩre maathani make, o na irĩra cia watho wake wa kũrũmĩrĩrũo, o na matuĩro make ma cira, marĩa aathire maithe maitũ.

⁵⁹Na rĩu ngũhoya atĩ ciugo ici ciakwa iria ’thaithĩte Jehova nacio, ndĩ mbere yake, ikuhagĩrĩrie Jehova Ngai witũ, mũthenya o na ũtukũ, nĩ getha atiiragĩrĩre ũhoro wa ndungata yake o na wa andũ ake Isiraeli, o ta ũrĩa mabata mao ma mũthenya o mũthenya magaikara;

⁶⁰nĩ getha andũ othe a gũkũ thĩ mamenye atĩ Jehova nĩwe Ngai; na gũtirĩ ũngĩ o na ũrĩkũ.

⁶¹Na tondũ ũcio wĩmenyererei atĩ mũtũũre mũrũmĩrĩire Jehova Ngai witũ na ngoro cianyu ciothe, nĩguo mũthiage mũrũmĩtie irĩra cia watho wake wa kũrũmĩrĩrũo, na mũmenyagĩrĩre maathani make, o ta ũrĩa gũtariĩ ũmũthĩ.

⁶²Nake mũthamaki, o na andũ othe a Isiraeli me hamwe nake, makĩrutĩra igongona o hau mbere ya Jehova.

⁶³Nake Suleimani aarutĩire Jehova indo cia magongona ma ũiguano ndegwa ngiri mĩrongo ĩĩrĩ na igĩrĩ, na ndũrũme ngiri igana rĩmwe na mĩrongo ĩĩrĩ. Ũguo nĩguo mũthamaki, o na andũ othe a ciana cia Isiraeli, maarugũrĩirie Jehova nyũmba ĩo, makĩmĩamũra.

⁶⁴Naguo mũthenya o ro ũcio, mũthamaki akĩamũra o kũu gatagatĩ ka nja ĩrĩa yarĩ mwena wa na mbere wa nyũmba ĩo ya Jehova; nĩ ũndũ hau nĩho aarutĩire mahaki ma njino, o na igongona rĩa mũtu, o na maguta ma magongona ma ũiguano; nĩ gũkorũo kĩgongona kĩrĩa gĩathondeketwo na gĩcango kĩrĩa kĩarĩ mbere ya Jehova nĩkĩaagire kũiganĩra ihaki rĩa njino, o na igongona rĩa mũtu, o na maguta ma magongona ma ũiguano, nĩ ũndũ wa kũnyiha.

⁶⁵Ũguo nĩguo Suleimani aathondekire gĩathĩ kĩu mbere ya Jehova, Ngai witũ, mĩthenya mũgwanja ihinda rĩu, o na ĩngĩ mũgwanja, naguo ũguo nĩ ta kuuga mĩthenya ikũmi na ĩna; nao Aisiraeli othe maarĩ hamwe nake, me kĩrĩndĩ kĩingĩ mũno kĩoimĩte o gwata itonyero-inĩ rĩa Hamathu, nginya o karũũĩ ka Misiri.

⁶⁶Naguo mũthenya wa ĩnana agĩkĩĩra andũ mainũke, nao magĩkĩrathima mũthamaki, magĩcoka magĩĩthiĩra hema-inĩ ciao makenete mũno, o na makaigua wega ngoro nĩ ũndũ wa maũndũ marĩa mothe mega Jehova ekĩte Daudi, ndungata yake, o na andũ ake Isiraeli.