1 Thessalonians 1

¹NĨ ithuĩ, Paulo na Silivano na Timotheo, twatũma marũa maya kũrĩ kanitha wa Athesalonike, ũrĩa ũtũire thĩinĩ wa Ngai Ithe witũ o na Mwathani Jesu Kristo. Mũrogĩa na Wega wa Ngai, o na thayũ.

²Nĩtũcokagĩria Ngai ngatho hĩndĩ ciothe nĩ ũndũ wanyu inyuothe, tũkĩmũgwetaga mahoya-inĩ maitũ;

³na rĩrĩa tũmũhoyagĩra twĩ mbere ya Ngai Ithe witũ-rĩ, nĩtũririkanaga ciĩko cianyu tũtegũtigithĩria, o iria ciumanaga na wĩtĩkio wanyu, o na mawĩra manyu ma kwĩnogia marĩa mũrutaga nĩ ũndũ wa wendani, na ningĩ ũrĩa mũkiragĩrĩria mũkĩĩrĩgagĩrĩra Mwathani witũ Jesu Kristo.

⁴Ariũ a Ithe witũ, inyuĩ mwendetwo nĩ Ngai-rĩ, nĩtũũĩ atĩ nĩmwathurirũo nĩwe,

⁵tondũ Ũhoro-ũrĩa-Mwega twahunjagia ndwakinyire kũrĩ inyuĩ ta arĩ o ciugo theri, no gũkinya wakinyire wĩ na hinya, na wĩ na Roho Mũtheru, na wĩ na ihooto itangĩthanganio; na inyuĩ nĩmũũĩ mĩthiĩre ĩrĩa twonekaga nĩ inyuĩ tũgĩthiĩ nayo nĩ ũndũ wanyu.

⁶Na inyuĩ mũgĩgĩtuĩka a kwĩgerekanagia na ithuĩ o na Mwathani, mwarĩkia gwĩtĩkĩra Ũhoro wake mwĩ na mathĩna maingĩ o hamwe na gĩkeno kĩrĩa kiumaga kwĩ Roho Mũtheru.

⁷Mũgĩgĩtuĩka kĩonereria kũrĩ andũ arĩa othe metĩkĩtie o kũrĩa Makedonia na Akaia.

⁸Tondũ rĩrĩ, Ũhoro wa Mwathani nĩũmemerekete uumĩte kũrĩ inyuĩ, na to Makedonia na Akaia gwiki, no rĩrĩ, ngumo ya ũrĩa mwĩtĩkĩtie Ngai nĩĩhurunjũkĩire kũndũ guothe; tũgakĩaga bata wa kwaria kiugo kĩngĩ o na kĩrĩkũ.

⁹Amu ha ũhoro witũ-rĩ, andũ acio nĩmaheanaga o ene ũhoro wa mũkinyĩre ũrĩa twakinyire naguo kwanyu; na wa ũrĩa mwagarũrũkĩire Ngai, mũgĩtigana na mĩhianano, nĩ getha mũtungatagĩre Ngai ũrĩa ũrĩ muoyo, na nĩwe wa ma,

¹⁰na mwetagĩrĩre Mũriũ oime Igũrũ, o ũcio aariũkirie akĩmũruta kũrĩ arĩa akuũ, nake nĩwe Jesu, ũrĩa ũtũhonokagia harĩ marakara marĩa magoka.