Colossians 4

¹Inyuĩ aathani-rĩ, ĩkagai ngombo cianyu maũndũ marĩa marĩ kĩhooto, na marĩa merekereire, mũkĩmenyaga atĩ o na inyuĩ mwĩ na Mwathi wanyu wĩ kũrĩa Igũrũ.

²Rũmanagĩriai kũhoya na kĩyo, na mũhoyage mwĩiguĩte, mũgĩcokagĩria Ngai ngatho,

³na ningĩ mũtũhoyagĩre o na ithuĩ, atĩ Ngai atũtiirũrĩrie riigĩ nĩguo tũhunjanagĩrie Ũhoro wake, na tũheanage ũhoro wa hitho ũrĩa wa Kristo, o ũcio ndũire njohetwo nĩ ũndũ waguo;

⁴nĩguo ndĩũtaũranagĩre na mĩario o ĩrĩa njagĩrĩirũo nĩ kwaria nayo.

⁵Thiagai na mĩthiĩre ya ũũgĩ hĩndĩ ĩrĩa mũkoragwo mwĩ na andũ arĩa matarĩ a thiritũ iitũ, mũtegũte ihinda rĩrĩa rĩagĩrĩru rĩa gwĩkaga wega.

⁶Na mũkĩaria-rĩ, aragiai hingo ciothe na mĩario o ĩrĩa ĩrĩ na Wega wa Ngai, ĩtuĩke ta ĩĩkĩrĩtwo cumbĩ, nĩ getha mũmenyage ũrĩa mũngĩcokagĩria mũndũ o mũndũ ũhoro o ũrĩa ekũmũũria.

⁷Mohoro makwa mothe nĩmũkamenyithio nĩ Tukiko, mũrũ wa Ithe witũ ũrĩa twendete mũno, o we ndungata ya kwĩhokeka na ngombo ya Mwathani hamwe na niĩ

⁸Nĩwe ndatũma kũrĩ inyuĩ nĩ ũndũ wa ũhoro ũyũ kĩũmbe, atĩ mũmenyithio wega ũrĩa tũtariĩ, na ningĩ atĩ amũũmĩrĩrie ngoro.

⁹Megũũka na Onesimo, mũrũ wa Ithe witũ ũrĩa wĩhokekete, na ũrĩa twendete mũno, nake nĩ mũndũ wanyu. Acio nĩo makamũmenyithia ũhoro wa ũrĩa maũndũ mothe marathiĩ gũkũ.

¹⁰Nĩmwageithio nĩ Arisitariko ũrĩa twohetwo hamwe nake, o na Mariko, mũihawe wa Baranaba. (Nĩwe mwathĩrĩirũo ũrĩa mũkamwĩka; angĩũka-rĩ, mũkũngũĩrei.)

¹¹Ningĩ mũkageithio nĩ Jesu ũrĩa wĩtagwo Jusito. Acio nĩo oiki a thiritũ ya andũ arĩa maruaga tũrutithanagia wĩra nao wa ũthamaki wa Ngai: nao nĩo matũire manyũmagĩrĩria.

¹²Ningĩ nĩmwageithio nĩ Epafara, ũrĩa wanyu, nake nĩ ngombo ya Kristo Jesu. Ũcio nĩegiaga hingo ciothe nĩ ũndũ wanyu mahoya-inĩ make, nĩ getha mũikarage mwĩhandĩte ta andũ agima, na mũkinyanĩire wega maũndũ-inĩ mothe marĩa Ngai endaga.

¹³Amu ndĩ mũira wake wa ũrĩa enogagia mũno nĩ ũndũ wanyu, na andũ a Laodikia, o na arĩa matũire Hierapoli.

¹⁴Nĩmwageithio nĩ Luka, mũthondekani ũrĩa mwende mũno, o na Dema.

¹⁵Geithiai ariũ a Ithe witũ arĩa matũire Laodikia, o na Numifa, o na andũ a kanitha ũrĩa wĩ kwao mũciĩ.

¹⁶Na rĩrĩ, mwarĩkia gũthomerũo marũa maya, matũmei magathomerũo andũ a kanitha wa Laodikia o nao; o ũndũ ũmwe na inyuĩ mũthome marũa marĩa makoima Laodikia.

¹⁷Na mwĩre Arikipo atĩrĩ, Wĩmenyagĩrĩre ũhingie wega wĩra wa gũtungatanĩra ũrĩa waheirũo nĩ Mwathani.

¹⁸Ngeithi ciakwa, niĩ Paulo, nĩ ici ndaandĩka na guoko gwakwa mwene. Ririkanagai ũrĩa njohetwo. Wega wa Ngai ũroikaraga na inyuĩ.