Colossians 3

¹HAKĨRĨ ũguo-rĩ, mũngĩkorũo nĩmwariũkirio hamwe na Kristo, no kĩmathagei maũndũ marĩa marĩ Igũrũ, kũrĩa Kristo arĩ, aikaire guoko-inĩ kwa ũrĩo kwa Ngai.

²Rũmbũyagiai maũndũ marĩa marĩ Igũrũ, na mũtigage kũrũmbũria marĩa marĩ thĩ.

³Nĩ ũndũ nĩmwakuire, naguo muoyo wanyu nĩ mũhithe hamwe na Kristo thĩinĩ wa Ngai.

⁴Na rĩrĩa Kristo, o we ũrĩ muoyo witũ, akonanio, hĩndĩ ĩo o na inyuĩ nĩmũkonanio hamwe nake mwĩ na riri.

⁵Nĩ ũndũ ũcio, tuagai ciĩga cianyu iria irĩ gũkũ thĩ ta ikuĩte; nacio nĩ ici, atĩrĩ, ũmaraya, na meciria mathũku, na thuti njũru, na kwĩrirĩria maũndũ moru, na gũcumĩkĩra, nakuo no ũndũ ũmwe na kũinamĩrĩra mĩhianano na kũmĩhoya.

⁶Maũndũ macio-rĩ, nĩmo matũmaga marakara ma Ngai makinyagĩre andũ a rũciaro rũrĩa rũremu;

⁷namo nĩmo mwathiaga namo rĩa mbere, hĩndĩ ĩrĩa mwatũire mũmekaga.

⁸No rĩu kĩeheriei maya mothe o namo: marakara, na mang’ũrĩka, na muku, na kũrumana, na kwaria maũndũ ma thoni na kanua.

⁹Tigagai kũhenania na kanua o mũndũ na ũrĩa ũngĩ, kuona atĩ nĩmwĩaũrĩte mũndũ ũrĩa wa tene, o na ciĩko ciake

¹⁰na mũkehumba mũndũ ũngĩ mwerũ, ũrĩa werũhagio o nginya agĩe na ũmenyo, agakĩgĩa na mũhianĩre wa ũrĩa wamũũmbire.

¹¹Na ũhoro-inĩ ũcio-rĩ, gũtingĩgĩa na Mũyunani kana Mũyahudi; mũndũ ũruĩte kana mũndũ ũtaruĩte, mũndũ mũcenji kana Mũsikuthi; o na ngombo kana mũndũ ũtarĩ ngombo; no Kristo wiki na nĩwe ũiyũire guothe.

¹²Tondũ ũcio-rĩ, kuona atĩ mũrĩ athure nĩ Ngai, mũgagĩtuĩka andũ atheru mendetwo nĩwe, wĩhumbei mwĩhumbĩre wa ngoro ũrĩa wa kũiguanĩra tha, na wa gũtugana, na kwĩnyihia, na kũhorera, o na gũkirĩrĩria,

¹³mũgĩkiranagĩra na mũkĩohanagĩra o mũndũ na ũrĩa ũngĩ, angĩkorũo nĩharĩ mũndũ matetanĩtie na ũrĩa ũngĩ-rĩ; kĩohanagĩrei inyuene o ta ũrĩa Mwathani nake aamuoheire inyuĩ.

¹⁴Ningĩ gũkĩra maũndũ macio mothe-rĩ, gĩagai na wendani, na nĩguo wohanagia maũndũ mothe hamwe nĩguo maagĩrĩre kũna.

¹⁵Rekei thayũ wa Kristo ũteithũranage maũndũ mothe ngoro-inĩ cianyu; na nĩguo mwetĩirũo mwathagwo nĩguo, kuona atĩ mũrĩ a mwĩrĩ ũmwe; ningĩ mũgĩage na ngatho.

¹⁶Rekei Ũhoro wa Kristo ũikarage ũingĩhĩte mũno thĩinĩ wanyu, ũkĩmũũhĩgagia na ũũgĩ wothe; na mũrutanage inyuĩ ene, mũgĩtaaranaga na thaburi, na nyĩmbo cia Ngai, o na nyĩmbo cia kũguna maroho ma andũ, mũkĩinagĩra Ngai mũrĩ na Wega wake thĩinĩ wa ngoro cianyu.

¹⁷Na ningĩ atĩrĩ, maũndũ marĩa mothe mũrĩĩkaga, mũkĩaria o na kana mũgĩĩka ũndũ o ũrĩkũ-rĩ, mekagei na rĩĩtwa rĩa Mwathani Jesu, mũgĩcokagĩria Ngai Ithe witũ ngatho na ũndũ wake.

¹⁸Inyuĩ atumia-rĩ, athĩkagĩrai athuri anyu o ta ũrĩa kwagĩrĩire andũ arĩa maikaraga thĩinĩ wa Mwathani.

¹⁹Na inyuĩ athuri-rĩ, endagai atumia anyu, na tigagai kũmakũũma.

²⁰O na inyuĩ ciana, iguagai aciari anyu maũndũ-inĩ mothe, nĩ ũndũ ũguo nĩguo ũkenagia Mwathani.

²¹Na inyuĩ maithe-rĩ, tigagai kũrakaria ciana cianyu, mũtigatũme igĩe na kĩnyiria.

²²Na inyuĩ ngombo-rĩ, athĩkagai maũndũ-inĩ mothe nĩ aathani arĩa mamwathaga ũhoro-inĩ wa mwĩrĩ; to hĩndĩ ĩrĩa mekũmũrora na maitho, o ta mũgwĩcukumithania nao, no makĩria maathĩkagĩrei mũtarĩ na ũhinga ngoro, mũgĩĩtigagĩra Mwathani.

²³Na rĩrĩ, ũndũ o wothe mũgwĩka-rĩ, wĩkagei na ngoro o ta arĩ wĩra wa Mwathani mũraruta, na ti wa andũ,

²⁴mũkĩmenyaga atĩ nĩ Mwathani ũkamũhe kĩrĩa mwĩrĩirũo, arĩ kĩo igai rĩanyu: nĩ Mwathani Kristo mũtungatagĩra.

²⁵Tondũ-rĩ, mũndũ ũrĩa wĩkaga ũũru nĩagathukĩrũo na ũũru o ta ũcio ekĩte: na gũtirĩ ũhoro wa gũtĩĩra andũ maũthĩ.