Colossians 2

¹TONDŨ rĩrĩ, ngwenda mũmenye ũrĩa ndĩĩgiaga nĩ ũndũ wanyu na kwĩgia kũnene ma, gwata arĩa a Laodikia, o na andũ arĩa othe matarĩ maanyona ũrĩa ’haana ũthiũ.

²Na ndĩĩgiaga ũguo nĩ getha ngoro ciao ciũmagĩrĩrio, tondũ wa ũrĩa mohanĩtio na wendani, nĩguo matũũre maingĩ hĩirio mũno ũmenyi hatarĩ na mathangania o na hanini, o nginya makamenya wega ũhoro ũrĩa wa hitho wa Ngai, na nĩguo Kristo.

³Nake nĩwe mĩthithũ yothe ya ũũgĩ na ya ũmenyi ĩhithĩtwo thĩinĩ wake.

⁴Ngũkiuga ũguo nĩ getha mũndũ o na ũrĩkũ ndakanamũhenererie na ciugo cia wara.

⁵Nĩ gũkorũo o na itarĩ hamwe na inyuĩ na mwĩrĩ, ndĩ hamwe na inyuĩ na ngoro, ngaikara ngĩkenaga nĩ ũrĩa nyonaga mũtabarĩre wanyu, o na ũrĩa mũrũmĩte wega ũhoro-inĩ wa kwĩhoka Kristo.

⁶Nĩ ũndũ wa ũguo, o ta ũrĩa mwamũkĩrĩte Kristo Jesu Mwathani, thiagai o ũguo mũrĩ thiritũ nake,

⁷mwĩhandĩte wega thĩinĩ wake, na mũkĩongagĩrĩrũo hinya nĩwe, o na mũgwatĩirie ũhoro ũrĩa mwĩtĩkĩtie, o ta ũrĩa mwarutirũo, mũgĩkĩragĩrĩria gũcokia ngatho.

⁸Wĩmenyagĩrĩrei mũtikanatahwo nĩ mũndũ o na ũrĩkũ na maũũgĩ make na mathara ma tũhũ, marĩa marũmanĩrĩire na irĩra cia andũ, na makaringana na maũndũ marĩa ma ndũire ma gũkũ thĩ, na matirũmanĩrĩire na Kristo.

⁹Nĩ gũkorũo ũiyũru wothe wa Ũngai nĩũtũire thĩinĩ wake arĩ na mwĩrĩ,

¹⁰na inyuĩ mũkaiyũrũo nĩ muoyo ũrĩa mwagĩrĩru nĩ ũrĩa mũtũire thĩinĩ wake, o we ũrĩ mũnene igũrũ rĩa ũhoro wothe wa gwathana na wa kũgĩa na hinya.

¹¹Na mũkĩrĩ thĩinĩ wake, mwaruithirio irua rĩrĩa rĩtaruithanagio na moko, o rĩo rĩrĩa rĩa kũmwehereria maũndũ ma mwĩrĩ wa gũkũ thĩ, kũringana na ũrĩa ũhoro wa kũrua ũtariĩ thĩinĩ wa Kristo.

¹²Nĩ gũthikwo mwathikirũo hamwe nake hĩndĩ ĩrĩa mwabatithirio; na nĩ thĩinĩ wa ũhoro o ũcio mwariũkanĩirio nake, nĩ ũndũ wa kwĩhoka wĩra ũrĩa Ngai aarutire rĩrĩa aamũriũkirie oime kũrĩ arĩa akuũ.

¹³Na inyuĩ mwatũire mũrĩ akuũ nĩ ũndũ wa mehia manyu, na tondũ wa gũikara mũtaruĩte mĩĩrĩ yanyu-rĩ, nĩ inyuĩ Ngai ekĩrire muoyo hamwe na Kristo, nĩ ũndũ wa ũrĩa aatuoheire mahĩtia maitũ mothe;

¹⁴na tondũ wa ũrĩa aahuurire ũhoro wa gũtũcuka ũrĩa waandĩkĩtwo mawatho-inĩ, na warĩ wa gũtũhoota-rĩ, agĩkĩweheria akĩũhũrĩrĩra mĩcumarĩ mũtharaba-inĩ wake;

¹⁵na aarĩkia gwĩthengeria monene macio o na mahinya, akĩmonania mbere ya mũingĩ, akĩrũhagia nĩ ũrĩa aamatoririe mũtharaba-inĩ.

¹⁶Hakĩrĩ ũguo-rĩ, mũtikanareke mũndũ o na ũrĩkũ amũcirithie ũhoro-inĩ wa irio iria mũrĩaga, kana wa kĩrĩa mũnyuaga, o na kana wa mũthenya mwamũre, kana wa karũgamo ka mweri, o na kana wa mũthenya wa thabatũ:

¹⁷nĩ gũkorũo maũndũ macio no kĩĩruru kĩa maũndũ marĩa magoka; ĩndĩ ma yamo nĩ ya Kristo.

¹⁸Mũtikanareke mũndũ amũtunye kĩheo kĩrĩa mũtanyĩte kuona nĩ ũndũ wa ũrĩa endaga gwĩtua o mũnyinyi, agathathayagia araika, na agatũũra arũmĩtie cioneki iria eoneire, agĩĩtĩaga tũhũ nĩ ũndũ wa meciria make ma kĩĩmwĩrĩ.

¹⁹Mũndũ ta ũcio ndatũire egwatanĩtie na Mũtwe, o we ũtũmaga mwĩrĩ wothe ũgĩe na hinya, na ũgwatanio na nyunĩro ciohanĩtio na nga, na ũkũrakũrage mũkũrĩre o ũrĩa uumaga kwĩ Ngai.

²⁰Mũngĩkorũo nĩmwakuire hamwe na Kristo, mũgĩtigana na maũndũ marĩa ma ndũire ma gũkũ thĩ-rĩ, nĩ kĩ gĩgĩtũmaga mwathĩkĩre irĩra, o ta mũtũire gũkũ thĩ?

²¹Nacio nĩ ta ici: Ndũkananyite na guoko, kana ũcame, kana ũhutie.

²²Na rĩrĩ, gwathanĩtwo ũguo ũhoro wa indo iria ininagwo ikĩhũthĩrũo; nacio irĩra icio no cia ũtaarani na ũrutani wa andũ.

²³Nacio-rĩ, ti-itherũ ciĩonanagia ta arĩ cio ũũgĩ, nĩ ũndũ wa mũndũ gwĩtuĩra mĩhoere ĩrĩa arĩhoyaga Ngai nayo, na kwĩnyihagia na kũhinyĩrĩria mwĩrĩ wake; no ha ũhoro wa kũgiria mũndũ ehũnĩrĩrie merirĩria ma mwĩrĩ-rĩ, itikĩrĩ kĩene.