1 Thessalonians 3

¹NĨ ũndũ wa ũguo, rĩrĩa twakĩremirũo nĩ gũcoka gweterera o tũkirĩrĩirie, tũkĩona arĩ wega tũtigwo Athene ithuiki,

²tũgĩgĩtũma Timotheo, mũrũ wa Ithe witũ na ndungata ya Ngai ya kũheana Ũhoro-ũrĩa-Mwega wa Kristo, nĩguo amuongerere hinya na amũũmĩrĩrie ũhoro-inĩ wa wĩtĩkio wanyu,

³nĩ getha mũndũ o wothe wanyu ndakae gũthũngũthagio nĩ mathĩna macio; nĩ gũkorũo nĩmũũĩ inyuene atĩ nĩmo twathĩrĩirio.

⁴Nĩ ũndũ-rĩ, o mbere, o hĩndĩ ĩrĩa twarĩ na inyuĩ, nĩtwamwĩrire atĩ tũtirĩ hĩndĩ tũtagathĩnio; na noguo gwagĩtuĩkire, ta ũrĩa mũũĩ.

⁵Nĩ ũndũ ũcio, rĩrĩa ndaremirũo nĩ gũcoka gweterera ngirĩrĩirie-rĩ, ngĩrekania nĩguo ’menye ũhoro wa wĩtĩkio wanyu, gũtigakorũo hihi atĩ mũgerania nĩaamũgeretie, naguo wĩra wa kwĩnogia ũrĩa twanaruta ũkaagio kĩene.

⁶No rĩrĩ, ariũ a Ithe witũ, Timotheo oka kũrĩ ithuĩ o ica-ikuhĩ oimĩte kũrĩ inyuĩ-rĩ, nĩaratũreheire ndeto njega cia ũrĩa mũtũire mwĩtĩkĩtie na mwendaine, aratwĩra atĩ nĩmũtũire mũtũririkanaga wega hingo ciothe, na mũkeriragĩria gũtuona rĩngĩ, o ta ũrĩa ithuĩ twĩriragĩria kũmuona inyuĩ.

⁷Twaigua ũguo-rĩ, o na twatũire tũiguĩte ũũru ngoro na twĩ na thĩna-rĩ, tũgĩkĩũmĩrĩrio ngoro nĩ ũndũ wanyu, tondũ wa ũrĩa mũtũire mwĩtĩkĩtie.

⁸Amu rĩu ithuĩ tũgũtũũra muoyo, inyuĩ mwatũũra o mũrũmĩte thĩinĩ wa Mwathani.

⁹Kaĩ tũngĩgĩcokeria Ngai ngatho ĩigana atĩa nĩ ũndũ wanyu, tondũ wa gĩkeno kĩrĩa gĩothe tũkenaga nakĩo nĩ ũndũ wanyu, twĩ mbere ya Ngai witũ?

¹⁰Ũtukũ o na mũthenya tũkĩragĩrĩria kũhoya atĩ nĩguo tũkonana na inyuĩ ũthiũ na ũthiũ, na tũmũhingĩrie ũndũ ũrĩa ũngĩkorũo ũtigaire ũhoro-inĩ wanyu wa gwĩtĩkia.

¹¹Rĩu-rĩ, Ngai we mwene, o we Ithe witũ, na Mwathani witũ Jesu arotũrũngĩrĩria njĩra tũkinye kũrĩ inyuĩ.

¹²Nake Mwathani aromuongerera na amũkĩrĩrĩrie wendani wa kwendana o mũndũ na mũndũ ũrĩa ũngĩ, o na wa kwendaga andũ othe, o ta ũrĩa na ithuĩ tũmwendete inyuĩ;

¹³nĩ getha agatũma ngoro cianyu ciikarage irũmĩte wega, na ikorũo itarĩ na ũcuke na ii na ũtheru mbere ya Ngai, o we Ithe witũ, hĩndĩ ĩrĩa Mwathani witũ Jesu akoneka me hamwe na andũ ake othe aamũre.