1 Thessalonians 4

¹NAGUO ũhoro wa kũrigĩrĩria nĩ atĩrĩ, ariũ a Ithe witũ, twamũthaitha na twamũringĩrĩria thĩinĩ wa Mwathani Jesu, atĩ o ta ũrĩa mwarutirũo nĩ ithuĩ ũhoro wa mĩthiĩre ĩrĩa mwagĩrĩirũo nĩ gũthiaga nayo nĩguo mũkenagie Ngai, (na noguo mwĩkaga-rĩ), mũkĩragĩrĩrie gwĩka ũguo mũno.

²Tondũ nĩmũũĩ maũndũ marĩa twamũtaarire namo nĩ ũndũ wa Mwathani Jesu.

³Tondũ rĩrĩ, ũũ nĩguo Ngai enda, atĩ mũtuĩke andũ aamũre; atĩ mũthemage ũmaraya;

⁴na atĩ o mũndũ wanyu amenyage ũrĩa angĩhota gũikaragia mwĩrĩ wake mwene wĩ mũtheru, akĩũtĩaga,

⁵atekwĩrirĩria maũndũ ma ũmaramari ta andũ a Ndũrĩrĩ iria itoĩ Ngai;

⁶na ningĩ atĩ mũndũ o na ũrĩkũ ndakanatwarĩrĩrie mũrũ wa ithe ũhoro-inĩ wa indo ciake, o na kana amuogoge; nĩ ũndũ Mwathani nĩwe ũrĩhagia andũ arĩa mekaga maũndũ macio mothe, o ta ũrĩa twamwĩraga mbere na tũkamuumbũragĩra.

⁷Amu Ngai ndaatwĩtĩire maũndũ ma waganu, tiga o marĩa ma ũtheru.

⁸Nĩ ũndũ ũcio-rĩ, mũndũ wa gũkararia ũhoro ũcio, ti mũndũ akararagia, no Ngai ũrĩa ũmũheaga inyuĩ Roho wake Mũtheru.

⁹No rĩrĩ, ha ũhoro wa kwendana na ariũ a Ithe witũ-rĩ, mũtirĩ na bata mũtindage mũkĩandĩkĩrũo, nĩ ũndũ inyuene nĩmũrutĩtwo kwendana nĩ Ngai:

¹⁰na ti-itherũ ũguo noguo mwĩkaga ariũ a Ithe witũ othe marĩ Makedonia guothe. No rĩrĩ, ariũ a Ithe witũ, twamũhatĩrĩria atĩ mũkĩragĩrĩrie gwĩka ũguo mũno;

¹¹ningĩ atĩ mwĩkagĩre kĩyo gĩa gũkindĩria, na mũhang’agĩre o mabata marĩa mamũkoniĩ, na mũrutage wĩra na moko manyu, o ta ũrĩa twamũtaarire;

¹²nĩ getha mũthiage na mĩthiĩre ĩrĩa ĩngĩtĩĩka, mũgĩtwarana na andũ arĩa matarĩ a thiritũ iitũ, na ningĩ mũikarage mwĩhotete, mũtekwaga kĩndũ.

¹³No rĩrĩ, ariũ a Ithe witũ, tũtikwenda mũikare mũrigĩtwo nĩ ũhoro wa andũ arĩa makomete, nĩ getha mũtikae kũgĩa na kĩeha, ta andũ arĩa angĩ matarĩ na ũndũ merĩgĩrĩire.

¹⁴Nĩ ũndũ tũngĩkorũo nĩtwĩtĩkĩtie atĩ Jesu nĩaakuire na agĩcoka kũriũka, no twĩtĩkie atĩ ũguo noguo Ngai akarehanĩrie hamwe na Jesu arĩa makomete me thĩinĩ wake.

¹⁵Nĩkĩo twamwĩra na ũhoro wa Mwathani atĩrĩ, atĩ ithuĩ arĩa tũgakorũo tũtũire muoyo, o ithuĩ tũtigaire o nginya rĩrĩa Mwathani akoneka-rĩ, tũtikahĩta arĩa makomete o na hanini.

¹⁶Nĩ gũkorũo Mwathani we mwene nĩagaikũrũka oime Igũrũ agĩĩtanaga na kayũ, o na mũgambo wa mũraika ũrĩa mũnene, naguo coro wa Ngai ũkĩhuhagwo: nao andũ arĩa makuĩte me thĩinĩ wa Kristo nĩo makaamba kũriũka:

¹⁷na thutha wa ũguo, ithuĩ arĩa tũgakorũo tũrĩ muoyo, o ithuĩ tũtigaire-rĩ, nĩtũkoyanĩrio hamwe nao tũtwarũo matu-inĩ, nĩguo tũgacemanie na Mwathani o kũu rĩera-inĩ: tũgagĩtũũrania ũguo na Mwathani o nginya tene.

¹⁸Hakĩrĩ ũguo-rĩ, ũmanagĩrĩriai o mũndũ na mũndũ ũrĩa ũngĩ na ciugo icio.