1 Thessalonians 5

¹NO rĩrĩ, ariũ a Ithe witũ, ha ũhoro wa mahinda na ciathĩ-rĩ, mũtirĩ na bata mũtinde mũkĩandĩkĩrũo.

²Nĩ gũkorũo nĩmũũĩ wega inyuene atĩ Mũthenya wa Mwathani nĩũgoka o ta ũrĩa mũici okaga ũtukũ.

³Hĩndĩ ĩrĩa andũ moigaga atĩ, Nĩkũrĩ thayũ, na gũtirĩ mburuga-rĩ, o hĩndĩ ĩo nĩyo makahobanĩrio nĩ kwanangwo kwa narua, o ta ũrĩa mũtumia wĩ na ihu akoragĩrĩrũo nĩ ruo rũa kũrũmwo; nao matikahonoka o na atĩa.

⁴No inyuĩ, ariũ a Ithe witũ-rĩ, mũtikĩrĩ nduma-inĩ, atĩ mũthenya ũcio ũmũkorerere ta mũici;

⁵nĩ gũkorũo inyuothe mũrĩ ciana cia ũtheri na ciana cia mũthenya. Tũtikĩrĩ a ũtukũ kana a nduma;

⁶nĩ ũndũ ũcio nĩtũtigei gũkoma toro ta acio angĩ, no makĩria nĩtũikarage twĩiguĩte na tũterigĩtwo.

⁷Nĩ gũkorũo andũ arĩa makomaga toro-rĩ, makomaga ũtukũ; nao andũ arĩa arĩu marĩagwo ũtukũ.

⁸No ithuĩ-rĩ, kuona atĩ tũrĩ a mũthenya, nĩtũikaragei tũterigĩtwo, twĩohete gako ga kũgitĩra gĩthũri karĩa ka wĩtĩkio na ka wendani; na tũgekĩra ũhoro wa kwĩrĩgĩrĩra ũhonokio ta arĩ gĩtukũ.

⁹Tondũ Ngai ndaatũtuire a kũrakarĩrũo, no gũtua aatũtuire a kũhonokio nĩ ũndũ wa Mwathani witũ Jesu Kristo,

¹⁰o we wakuire nĩ ũndũ witũ, nĩ getha tũgatũũrania nake, o na tũngĩkorũo twĩiguĩte kana tũkomete.

¹¹Tondũ wa ũguo-rĩ, ũmanagĩrĩriai o mũndũ na mũndũ ũrĩa ũngĩ, na mwĩkanagĩre hinya, o ta ũrĩa mũtũire mwĩkaga.

¹²Na rĩrĩ, ariũ a Ithe witũ, twamũthaitha atĩ mũtĩage andũ arĩa mamũnogagĩra makĩmũrutĩra wĩra, o arĩa matuĩtwo arori anyu maũndũ-inĩ ma Mwathani, makamũtaaraga,

¹³na mũmekagĩrĩre mũno makĩria, mũkĩmendaga, nĩ ũndũ wa wĩra ũcio marutaga. Gĩagai na ũiguano thiritũ-inĩ yanyu.

¹⁴Na ningĩ twamũhatĩrĩria, ariũ a Ithe witũ, atĩrĩ, atĩ mũtaarage andũ arĩa mathiaga na mĩthiĩre ĩtaagĩrĩire, na mũũmagĩrĩrie arĩa ahũthũ ngoro, na mũtiiragĩrĩre arĩa maagĩte hinya, nao othe-rĩ, mũtige kũmathethũkĩra.

¹⁵Menyai mũndũ o na ũrĩkũ akanerĩhĩria ũũru na ũũru kũrĩ mũndũ ũngĩ; no hingo ciothe mũrũmanagĩrie gwĩkana wega inyuene, o na gwĩkaga andũ othe wega.

¹⁶Kenagai hingo ciothe;

¹⁷hoyagai mũtegũtigithĩria;

¹⁸maũndũ-inĩ mothe-rĩ, cokagĩriai Ngai ngatho; nĩ ũndũ ha ũhoro wanyu-rĩ, ũguo noguo Ngai endaga, e thĩinĩ wa Kristo Jesu.

¹⁹Mũtikanahorie mwaki wa Roho;

²⁰mũtikanararie mohoro marĩa marathagwo;

²¹roranagiai maũndũ mothe; mũrũmagie ũndũ o wothe ũrĩa mwega;

²²na mũthemage ũndũ o wothe ũngĩonwo wĩ mũũru.

²³Nake Ngai Mwene thayũ we mwene aromwamũra amũtherie kũna. Namo maroho manyu, na ngoro cianyu, o na mĩĩrĩ yanyu iroikario irĩ ng’ima, na igakorũo itarĩ na ũcuke, hĩndĩ ĩrĩa Mwathani witũ Jesu Kristo akoneka.

²⁴Ũcio ũmwĩtaga nĩ wa kwĩhokeka, nake nĩakahingia ũhoro ũcio.

²⁵Ariũ a Ithe witũ, tũhoyagĩrei.

²⁶Geithiai ariũ a Ithe witũ othe na ngeithi theru cia kũmumunyana.

²⁷Nĩndamwĩhĩtithia na Mwathani atĩ mũtikaage gũthomera ariũ a Ithe witũ othe marũa maya.

²⁸Wega wa Mwathani witũ Jesu Kristo ũrogĩa na inyuĩ.