2 Chronicles 33

¹Na rĩrĩ, Manase aarĩ wa mĩaka ikũmi na ĩĩrĩ hĩndĩ ĩrĩa aambĩrĩirie gũthamaka; agĩthamaka mĩaka mĩrongo ĩtano na ĩtano kũu Jerusalemu.

²Nake agĩĩka maũndũ marĩa monagwo marĩ moru nĩ Jehova, o ta ũrĩa maũndũ marĩa me thahu ma ndũrĩrĩ maatariĩ, o ndũrĩrĩ icio Jehova aaingatire agĩcieheria mbere ya ciana cia Isiraeli.

³Nĩ ũndũ nĩaacokire gwaka matĩri marĩa ithe Hezekia aatharĩtie; o na agĩakithia igongona cia kũhoerũo Mabaali, o na agĩthondekithia Maasherothu, na akĩinamĩrĩra mbũtũ yothe ya igũrũ akĩmĩhoya, na akĩmĩtungatĩra.

⁴Ningĩ agĩakithia igongona kũu nyũmba ya Jehova thĩinĩ, o nyũmba ĩo Jehova oigĩte ũhoro wayo atĩrĩ, Kũu Jerusalemu nĩkuo rĩĩtwa rĩakwa rĩrĩtũũraga tene na tene.

⁵Nake agĩakithĩria mbũtũ yothe ya igũrũ igongona o kũu nja cier�� cia nyũmba ya Jehova.

⁶O na ningĩ akĩhĩtũkithĩria ciana ciake mwaki-inĩ kũu gĩtuamba-inĩ kĩa mũrũ wa Hinomu, na agĩtũũra aragũragia, o na agatuĩragia nyoni yake, o na agĩtuĩka mũrogi, o na agathiaga kũrĩ andũ arĩa marĩ na maroho maragũraga, o na arogi; nake agĩkĩrĩrĩria gwĩka maũndũ maingĩ marĩa monagwo marĩ moru nĩ Jehova, agĩkĩmũthirĩkia nĩguo arakare.

⁷Naguo mũhianano wa gwacũhio, o ũcio wa kũhoyũo ũrĩa aathondekete, akĩũiga nyũmba ya Ngai thĩinĩ, o ĩo Ngai aaheete Daudi, o na Suleimani mũrũwe, ũhoro wayo, akoiga atĩrĩ, Nyũmba ĩno, o na gũkũ Jerusalemu, itũũra rĩrĩ ’thurĩte mĩhĩrĩga-inĩ yothe ya Isiraeli-rĩ, nĩkuo ngũtũũria rĩĩtwa rĩakwa tene na tene;

⁸na ndĩgatũma magũrũ ma Aisiraeli macoke kũũrũra o na hanini moime bũrũri ũrĩa ndatuire wa maithe manyu, mangĩkorũo nĩmarĩĩkaga o ũndũ ũyũ, atĩ mamenyagĩrĩre gwĩka maũndũ mothe marĩa ndamaathire, namo nĩmo watho wothe, o na irĩra cia watho wa kũrũmĩrĩrũo, o na mĩtugo ĩrĩa ĩtuĩtwo ya kũrũmĩrĩrũo, o maũndũ marĩa maaheirũo ũhoro wamo nĩ Musa.

⁹Nake Manase agĩkĩhĩtithia Juda, o na andũ arĩa maatũũraga Jerusalemu, o nginya magĩgĩĩka ũũru gũkĩra ũrĩa wekagwo nĩ ndũrĩrĩ icio Jehova aainire ciehere mbere ya ciana cia Isiraeli.

¹⁰Nake Jehova akĩarĩria Manase, o na andũ ake; no matiigana kũigua o na hanini.

¹¹Na tondũ ũcio Jehova agĩkĩmarehĩthirie anene a mbũtũ cia ita cia mũthamaki wa Ashuri, nao makĩnyita Manase, makĩmuoha na mĩnyororo, magĩkĩmũtwara Babuloni ohetwo na bĩngũ.

¹²Na rĩrĩa aagwatirũo nĩ thĩna ũcio agĩgĩthaitha Jehova, Ngai wake, o na akĩĩnyihĩria Ngai wa maithe mũno.

¹³Nake akĩmũhoya, nake Ngai agĩĩtĩkĩra ihoya rĩake, akĩigua gũthaithana gwake, akĩmũcokithia Jerusalemu ũthamaki-inĩ wake. Hĩndĩ ĩo Manase agĩkĩmenya atĩ ti-itherũ Jehova nĩwe Ngai.

¹⁴Na rĩrĩ, thutha wa maũndũ macio Manase agĩaka rũthingo rũa na nja o kũu itũũra rĩa Daudi, mwena wa ithũĩro wa Gihoni, kũu kĩanda-inĩ o nginya itonyero-inĩ rĩa kĩhingo kĩrĩa gĩĩtagwo Kĩhingo gĩa Ciũngũyũ, akĩrũthiũrũrũkia Ofeli; nake akĩrũambatia na igũrũ handũ haraya ma; na ningĩ akĩiga anene a mbũtũ cia ita arĩa njamba matũũra-inĩ ma Juda marĩa maairigĩtwo.

¹⁵O nacio ngai iria cia kũngĩ agĩciruta nyũmba ya Jehova, agĩcieheria kuo, o na mũhianano ũcio aaigĩte kuo, o na igongona ciothe iria aakĩte kĩrĩma-inĩ kĩa nyũmba ya Jehova, o na kũu Jerusalemu, agĩciikia na kũu nja ya itũũra.

¹⁶Ningĩ agĩcokereria kĩgongona kĩa Jehova, o na akĩrutĩra magongona ma ũiguano igũrũ rĩakĩo, o na ma gũcokeria Ngai ngatho, nake agĩgĩatha Ajuda matungatagĩre Jehova, Ngai wa Isiraeli.

¹⁷No rĩrĩ, andũ no maatũire marutagĩra magongona matĩri-inĩ ma kũndũ gũtũũgĩru, no maamarutagĩra Jehova Ngai wao wiki.

¹⁸Na rĩrĩ, ciĩko iria ingĩ cia Manase, o na ihoya rĩake rĩrĩa aahoire Ngai wake, o na ciugo cia andũ arĩa oni maũndũ arĩa maaririe nake rĩĩtwa-inĩ rĩa Jehova, Ngai wa Isiraeli-rĩ, atĩrĩrĩ, maũndũ macio nĩmaandĩkanĩirio hamwe na ciĩko cia athamaki a Isiraeli.

¹⁹O narĩo ihoya rĩake, na ũrĩa Ngai aarĩĩtĩkĩrire, o na kwĩhia kũrĩa guothe ehirie, o na kwagarara watho, o na kũndũ kũrĩa aakire matĩri ina kũndũ gũtũũgĩru, o na kũrĩa ehandĩire Maashera, o na mĩhianano ya gwacũhio, o mbere ya ataanenyihia-rĩ, atĩrĩrĩ, maũndũ macio nĩ maandĩke ibuku-inĩ rĩa ũhoro wa arĩa oni maũndũ.

²⁰Nake Manase agĩkoma hamwe na maithe, nao andũ makĩmũthika nyũmba yake we mwene thĩinĩ; nake Amoni, mũrũwe, agĩthamaka ithenya rĩake.

²¹Na rĩrĩ, Amoni aarĩ wa mĩaka mĩrongo ĩĩrĩ na ĩĩrĩ hĩndĩ ĩrĩa aambĩrĩirie gũthamaka, agĩthamaka mĩaka ĩĩrĩ Jerusalemu.

²²Nake agĩgĩĩka maũndũ marĩa monagwo marĩ moru nĩ Jehova, o ta ũrĩa ithe, Manase, ekire; nake Amoni agĩkĩrutĩra mĩhianano yothe ya gwacũhio magongona, o ĩo ithe, Manase, aathondekithĩtie, o na akĩmĩtungatĩra.

²³Nake ndaigana kwĩnyihĩria Jehova, ta ũrĩa ithe, Manase, aamwĩnyihĩirie; no rĩrĩ, Amoni ũcio nĩ gũkĩrĩrĩria aakĩrĩrĩirie kwagarara watho.

²⁴Nacio ndungata ciake igĩkĩmũgĩĩra ndundu imũũkĩrĩre, nacio igĩkĩmũũragĩra o kũu nyũmba yake mwene thĩinĩ.

²⁵No rĩrĩ, andũ a bũrũri ũcio nĩmoragire andũ othe arĩa maagĩĩrĩire mũthamaki ũcio ti Amoni ndundu ya kũmũũkĩrĩra; nao andũ acio a bũrũri wake magĩgĩtua Josia, mũrũwe, mũthamaki ithenya rĩake.