2 John 1

¹NĨ niĩ, mũthuri wa kanitha, ndatũma marũa maya kũrĩ mũtumia ũrĩa mũthure na ciana ciake, arĩa nyendete na ma; o na ti niĩ nyiki, nĩ arĩa othe mamenyete ũhoro-ũrĩa wa-ma,

²tũgakĩmwenda nĩ ũndũ wa ũhoro-ũcio-wa-ma ũtũũraga ngoro-inĩ ciitũ, o na nĩũgũikara na ithuĩ nginya tene na tene.

³Wega, na tha, o na thayũ, ciumĩte kwĩ Ngai Ithe witũ, na kwĩ Jesu Kristo, Mũriũ wa Ithe witũ, irĩikaraga hamwe na ithuĩ tũrĩ o na ũhoro-ũrĩa-wa-ma na tũrĩ o na wendani.

⁴Nĩngenete mũno nĩ ũndũ nĩngorete ciana ciaku imwe igĩthiĩ na njĩra ĩrĩa ya ma, o ta ũrĩa twaathirũo nĩ Ithe witũ.

⁵Na rĩu, mũtumia ũyũ, ngũgũthaitha, na ti ta arĩ rĩathani rĩerũ ndĩrakwandĩkĩra, tiga o rĩrĩa tũtũire narĩo kuuma kĩambĩrĩria, ngĩgũthaithe atĩ twendanage.

⁶Nakuo kwendana nĩ atĩrĩ, nĩ gũthiaga twerekanĩrĩire na maathani make. Rĩathani-rĩ, nĩrĩo rĩu, o ta ũrĩa mwarutirie kũigua o kĩambĩrĩria, atĩ mũthiage mũrĩ o naguo, wendani ũcio.

⁷Nĩ gũkorũo ahenania aingĩ nĩmoimĩrĩire gũkũ thĩ, arĩa matangĩĩtĩkia atĩ Jesu Kristo nĩokĩte na mwĩrĩ. Mũndũ ta ũcio nĩwe mũhenania ũrĩa, o na mũmena Kristo.

⁸Wĩmenyagĩrĩrei, mũtikae kũũrũo tũhũ nĩ wĩra ũrĩa mũrutĩte, no rĩrĩ, mũgakĩgwata ũtungati mũhingu.

⁹Mũndũ o wothe ũrĩa ũkĩraga njano akarega gũikara ũrutani-inĩ wa Kristo-rĩ, we ndarĩ na Ngai; ũrĩa ũikaraga o ũrutani-inĩ ũcio, we arĩ o na Ithe witũ o na Mũriũ.

¹⁰Mũndũ angĩũka kwanyu, na ndoke na ũrutani ũcio, mũtikamũgwate ũgeni, o na mũtikamũgeithie;

¹¹amu ũrĩa wamũgeithia nĩ kũgwatanĩra maagwatanĩra nake mawĩko macio make moru.

¹²Na tondũ ndĩ na maũndũ maingĩ ma kũmwĩra-rĩ, ndikwenda kũmaandĩka na karatathi na rangi, nĩ kwenda nyendaga njũke kwanyu, twarie tũng’ethanĩire, nĩ getha gĩkeno kĩanyu kĩiganĩre.

¹³Nĩwageithio nĩ ciana cia mwarĩ wa nyũkwa ũrĩa mũthure.