2 Samuel 1

¹NA GŨGĨKINYA atĩrĩ, atĩ Saulu aarĩkia gũkua, nake Daudi agĩkorũo ahũndũkĩte akoima kũũraga Aamaleki, na agaikara mĩthenya ĩĩrĩ kũu Zikilagi-rĩ,

²mũthenya ũyũ ũngĩ wa ĩtatũ hagĩũka mũndũ oimĩte kĩraaro-inĩ gĩa Saulu, arĩ na nguo ndembũkangu, na akeitĩrĩria tĩri mũtwe; nake aakinya he Daudi, agĩkĩgũa thĩ, akĩmũinamĩrĩra, amwĩnyihĩrie.

³Nake Daudi agĩkĩmũũria atĩrĩ, Uuma kũ? Nake akĩmwĩra atĩrĩ, Nĩ kũũra njũrĩte ngoima kĩraaro-inĩ gĩa Isiraeli.

⁴Nake Daudi agĩkĩmũũria atĩrĩ, Ũhoro ũgĩkinyĩte atĩa? Ta njĩra, ndagũthaitha. Nake agĩcokia atĩrĩ, Andũ nĩ kũũra morĩte makoima ita-inĩ, o na ningĩ andũ aingĩ nĩmagũĩte magakua, nake Saulu, na Jonathani, mũriũ, o nao nĩmakuĩte.

⁵Daudi agĩkĩũria mwanake ũcio wamũheaga ũhoro ũcio atĩrĩ, Ũmenyithĩtio nĩ kĩ atĩ Saulu na Jonathani, mũriũ, mĩmakuĩte?

⁶Ningĩ mwanake ũcio wamũheaga ũhoro akiuga atĩrĩ, Ndĩrakorirũo ndĩ hau kĩrĩma-inĩ kĩa Giliboa, ndĩrona Saulu etiiranĩtie na itimũ rĩake; nacio ngari cia ita, o na andũ arĩa mathiaga mahaicĩte mbarathi, makamũrũmĩrĩra na ihenya mũno.

⁷Na rĩrĩa aracũthĩrĩirie na thutha wake-rĩ, aranyona, aranjĩta. Na niĩ ndĩragĩcokia atĩrĩ, Niĩ ũyũ haha.

⁸Nake arakĩnjũria atĩrĩ, Wĩ mũndũũ? Na niĩ ndĩragĩcokia atĩrĩ, Ndĩ Mũamaleki.

⁹Arakĩnjĩra atĩrĩ, Ta rũgama haha mwena-inĩ wakwa, ũnjũrage, ndagũthaitha, amu ndĩ mũtubunyĩku, na ndĩ o muoyo.

¹⁰Tondũ ũcio ndĩrakĩrũgama mwena-inĩ wake, ndĩramũũraga; nĩ ũndũ nĩndĩramenyire na ma, o ma, atĩ ndangĩcoka kũhona arĩkĩtie kũgũa ita-inĩ; ndĩrakĩruta tanji ĩrĩa ararĩ nayo mũtwe, o na gĩturo kĩrĩa ararĩ nakĩo guoko; nacio indo icio nĩcio ici ndakũrehere haha, wee mwathi wakwa.

¹¹Daudi agĩkĩnyita nguo ciake, agĩcitembũranga; o nao andũ othe arĩa maarĩ hamwe nake magĩĩka o taguo;

¹²nao magĩkĩĩhũra ithũri nĩ kĩeha, makĩrĩra, o na makĩĩhinga kũrĩa irio nginya o hwaĩ-inĩ, nĩ ũndũ wa Saulu, o na mũrũwe Jonathani, o na ũndũ wa andũ a Jehova, o na wa nyũmba ya Isiraeli; nĩ ũndũ nĩmoragĩtwo na hiũ cia njora.

¹³Nake Daudi agĩkĩũria mwanake ũcio wamũheire ũhoro ũcio atĩrĩ, Uumĩte kũ? Nake agĩcokia atĩrĩ, Ndĩ mũrũ wa mũgeni, Mũamaleki.

¹⁴Daudi agĩkĩmũũria atĩrĩ, Nĩ kĩ kĩagiririe wĩtigĩre gũtambũrũkia guoko gwaku ũũrage mũitĩrĩrio maguta wa Jehova?

¹⁵Daudi agĩgĩĩta mwanake ũmwe wa arĩa maarĩ hau, akĩmwĩra atĩrĩ, Thiathia hakuhĩ, ũmũguthũkĩre. Nake agĩkĩmũgũtha, agĩkua.

¹⁶Daudi agĩkĩmwĩra atĩrĩ, Thakame yaku ĩrogũcokerera wee mwene, nĩ ũndũ kanua gaku wee mwene nĩko gakuumbũrĩte koiga atĩrĩ, Nĩnjũragĩte mũitĩrĩrio maguta wa Jehova.

¹⁷Nake Daudi akĩrĩrĩra Saulu, o na mũrũwe Jonathani, akĩmarĩrĩra na ciugo ici:

¹⁸nake agĩathana atĩ ciana cia Juda ikarutwo rũĩmbo rũrũ, rũĩtagwo Rũĩmbo rũa Ũta; na atĩrĩrĩ, rũĩmbo rũu rũandĩkĩtwo ibuku-inĩ rĩa Jasharu.

¹⁹Atĩrĩrĩ, wee Isiraeli, andũ aku arĩa marĩ igweta moragĩirũo ithũngũri-inĩ ciaku! Hĩ! Kaĩ andũ arĩa marĩ hinya nĩmagũĩte-ĩ!

²⁰Menyai mũheane ũhoro ũcio kũu Gathu, Kana mũũhunjanĩrie njĩra-inĩ cia Ashikeloni; Nĩ getha airĩtu a Afilisiti matigakene, Na nĩ getha airĩtu a andũ acio mataruaga matikagĩe na ndũrũhĩ.

²¹Atĩrĩrĩ, inyuĩ irĩma cia Giliboa, Mũroaga kũgĩa ireera, kana mbura, O na mwage mĩgũnda ĩrĩa ĩngĩrutwo indo cia igongona; Nĩ gũkorũo kũu nĩkuo ngo ya ũrĩa warĩ hinya mũno yaikirio ta kĩndũ gĩtarĩ bata, Ĩĩ-ni, ngo ĩo ya Saulu ĩgaikara o ta ya mũndũ ũtaitĩrĩirio maguta.

²²Ũta wa Jonathani ndwahũndũkaga ũtarĩ thakame ya arĩa moragĩtwo, O na ya njamba noru, o naruo rũhiũ rũa njora rũa Saulu rũtiahũndũkaga ũtheri.

²³Saulu na Jonathani marĩ muoyo maarĩ a kwendeka, na maarĩ ega mũno, O na gĩkuũ-inĩ kĩao, matiatigithũkanirio. Gũthiĩ maathiaga na ihenya magakĩria nderi, Naguo hinya wao ũgakĩra wa mũrũthi.

²⁴Atĩrĩrĩ, inyuĩ airĩtu a Isiraeli, rĩrĩrai Saulu, O we ũrĩa wamũgemagia na kũmũhumba nguo ndune, O nacio nguo cianyu, agacitumĩrĩrithia indo cia thahabu cia gũcigemia.

²⁵Hĩ! Kaĩ andũ arĩa marĩ hinya nĩmagũĩte ita-inĩ thĩinĩ-ĩ! Jonathani nĩ mũũrage, akoragĩrũo ithũngũri-inĩ ciaku.

²⁶Ndĩ na kĩeha kĩnene mũno nĩ ũndũ waku, wee Jonathani mũrũ-wa-iya. Wee ũratũire ũnjĩkaga maũndũ mega mũno; Wendani wa ũrĩa ũranyendete-rĩ, ũrarĩ wa kũgegania; Nĩũrakĩrĩte wendani ũrĩa andũ-a-nja magĩaga naguo.

²⁷Hĩ! Kaĩ andũ arĩa marĩ hinya nĩmagũĩte-ĩ! O nacio indo cia ita-rĩ, kaĩ nĩciũrĩte o kũũra biũ-ĩ!