2 Samuel 2

¹Na gũgĩkinya atĩrĩ, atĩ thutha wa maũndũ macio Daudi agĩtuĩria ũhoro he Jehova, akĩũria atĩrĩ, Nĩngwambata nginye itũũra rĩmwe rĩa Juda, kana aca? Jehova agĩkĩmwĩra atĩrĩ, Ambata. Ningĩ Daudi akĩũria atĩrĩ, Nĩ rĩrĩkũ ngũthiĩ? Nake Jehova agĩkiuga atĩrĩ, Ũgũthiĩ Hebironi.

²Daudi agĩkĩambata agĩkinya kuo; o nao aka ake erĩ, Ahinoamu, Mũjezireeli, na Abigaili ũrĩa warĩ mũka wa Nabali, Mũkarimeli, agĩgĩthiĩ nao.

³Ningĩ Daudi akĩambatia andũ arĩa maamũrũmĩrĩire, mũndũ o mũndũ me na andũ a nyũmba yake; nao magĩgĩtũũra kũu matũũra-inĩ ma Hebironi.

⁴Nao andũ a Juda magĩthiĩ kuo, magĩitĩrĩria Daudi maguta me kuo atuĩke mũthamaki wa gũthamakĩra nyũmba ya Juda. Nao andũ magĩkĩarĩria Daudi, makĩmwĩra atĩrĩ, Andũ a Jabeshi-gileadi nĩo maathikire Saulu.

⁵Nake Daudi agĩkĩrekeria andũ acio a Jabeshi-gileadi andũ, makamere ũũ: Jehova aromũrathima nĩ ũndũ wa ũndũ ũcio mwega wa gĩtĩo mwekire mwathi wanyu, ti Saulu, mũk��mũthika.

⁶Nake Jehova rĩu aromwĩka maũndũ mega ma tha, na ma kĩhooto; niĩ o na niĩ-rĩ, nĩngũmwĩka maũndũ mega ma tha nĩ ũndũ wa ũndũ ũcio mwekire.

⁷Na tondũ ũcio rĩu wĩũmĩrĩriei mwĩtue njamba ki; nĩ gũkorũo Saulu mwathi wanyu nĩakuĩte, nao andũ a nyũmba ya Juda makanjitĩrĩria maguta nduĩke mũthamaki wao.

⁸Na rĩrĩ, Abineri wa Neri, mũnene wa ita ya Saulu, nĩaakorirũo oete Ishi-boshethu, mũrũ wa Saulu, akamũtwara Mahanaimu;

⁹nake agĩkĩmũtua mũthamaki wa Gileadi, na wa Aashuri, na wa Jezireeli, na wa Efiraimu, na wa Benjamini, o na wa Aisiraeli othe.

¹⁰(Nake Ishi-boshethu ũcio wa Saulu aarĩ wa mĩaka mĩrongo ĩna hĩndĩ ĩrĩa aambĩrĩirie gũthamakĩra Isiraeli; agĩgĩthamaka mĩaka ĩĩrĩ.) No rĩrĩ, nyũmba ya Juda yarũmĩrĩire Daudi.

¹¹Narĩo ihinda rĩrĩa Daudi aaikarire kũu Hebironi e mũthamaki wa nyũmba ya Juda, rĩarĩ mĩaka mũgwanja na mĩeri ĩtandatũ.

¹²Nake Abineri wa Neri, o na ndungata cia Ishi-boshethu wa Saulu, makiuma Mahanaimu magĩthiĩ Gibeoni.

¹³Nake Joabu wa Zeruia o na ndungata cia Daudi makiumagara, magĩtũngana nao karia-inĩ ka Gibeoni; nao magĩgĩikara thĩ karia-inĩ kau, aya mwena ũyũ, na aya angĩ mwena ũcio ũngĩ wako.

¹⁴Nake Abineri agĩkĩĩra Joabu atĩrĩ, Ndagũthaitha ũreke aanake mokĩre mathukanie me mbere iitũ. Nake Joabu akiuga atĩrĩ, Nĩmagĩũkĩre.

¹⁵Magĩgĩũkĩra, magĩthiĩ marĩ atare, ikũmi na erĩ a mwena wa Benjamini na Ishi-boshethu wa Saulu; o na ikũmi na erĩ a ndungata cia Daudi.

¹⁶Nao othe, mũndũ o mũndũ akĩnyita mũndũ ũrĩa merekaine nake mũtwe, akĩmũtheca na rũhiũ rũake mbaru; na tondũ ũcio, magĩkĩgũanĩra thĩ othe o hamwe; nakuo kũndũ kũu gũgĩgĩtuwo Helikathu-hazurimu; na gwĩ kũu Gibeoni.

¹⁷Nayo mbaara ĩgĩkĩĩha mũno mũthenya ũcio; nake Abineri o na andũ a Isiraeli magĩtorio nĩ ndungata cia Daudi.

¹⁸Nao ariũ arĩa atatũ a Zeruia maarĩ ho, nao nĩ Joabu, na Abishai, na Asaheli; nake Asaheli aarĩ mũhũthũ magũrũ, akagĩa ihenya o ta thwariga.

¹⁹Nake Asaheli ũcio agĩgĩteng’eria Abineri, na ndaigana kũgarũrũka na mwena wa ũrĩo, o na kana wa ũmotho, atĩ atige kũmũrũmĩrĩra.

²⁰Hĩndĩ ĩo Abineri agĩkĩrora na thutha wake, akiuga atĩrĩ, Hĩ, ĩ nĩwe Asaheli? Nake agĩcokia atĩrĩ, Ĩĩ, nĩ niĩ.

²¹Ningĩ Abineri akĩmwĩra atĩrĩ, Garũrũka na mwena wa ũrĩo, o na kana wa ũmotho, ũnyite mũndũ ũmwe wa aanake aya, ũmũtunye indo ciake cia mbaara. No rĩrĩ, Asaheli ndaigana kũgarũrũka na mwena, atĩ nĩguo atige kũrũmĩrĩra Abineri.

²²Ningĩ Abineri agĩkĩĩra Asaheli atĩrĩ, Ndũkĩgarũrũke na mwena ũtige kũnũmĩrĩra; kĩrĩa gĩgũgĩtũma ngũgũthe ngũite thĩ-rĩ, nĩ kĩ? Ningĩ ingĩĩka ũguo-rĩ, kaĩ ingĩgĩĩtiirĩra Joabu, mũrũ wa nyũkwa, ũthiũ wakwa atĩa?

²³No rĩrĩ, nĩaaregire kũgarũrũka na mwena; na tondũ ũcio, Abineri akĩmũtheca nda na mũra wa itimũ rĩake ũkiumĩrana na thutha wake; nake akĩgũa thĩ o hau aarĩ, agĩkuĩra o ho; na gũgĩkinya atĩrĩ, atĩ andũ arĩa othe maakinyaga hau Asaheli aagũĩte arĩ mũkuũ, makarũgama ho.

²⁴No rĩrĩ, Joabu na Abishai magĩteng’eria Abineri; narĩo riũa rĩkĩmathũĩra maakinya kĩrĩma-inĩ kĩa Ama, kĩrĩa kĩrĩ mwena wa na mbere wa Gia, o kũu njĩra ya werũ-inĩ wa Gibeoni.

²⁵Nacio ciana cia Benjamini igĩĩcokanĩrĩria hamwe, ĩkĩrũmĩrĩra Abineri, nacio igĩtuĩka gĩtutu kĩmwe, igĩkĩrũgama o igũrũ gacũmbĩrĩ ga kĩrĩma.

²⁶Hĩndĩ ĩo Abineri agĩkĩanĩrĩra akĩĩra Joabu atĩrĩ, Anga rũhiũ rũa njora rũgũtũũra o rũninanaga tene na tene? Anga ndũũĩ atĩ ũndũ ũcio ũkarigĩrĩria na ruo? Ningĩ-rĩ, ũgũtũũra nginya hĩndĩ ĩ ũgĩkera andũ mahũndũke matige gũcoka gũteng’eria ariũ a ithe wao?

²⁷Nake Joabu akiuga atĩrĩ, O ta ũrĩa Ngai atũũraga muoyo-rĩ, ũtangĩaririe, ti-itherũ andũ aya nĩmangĩkorirũo maharaganĩtie magathiĩ o rũcinĩ, na matingĩteng’eririe mũndũ o mũndũ mũrũ wa ithe.

²⁸Joabu agĩkihuha coro, nao andũ othe makĩrũgama mehandĩte o ro ũguo, nao matiigana gũcoka gũteng’eria Isiraeli, o na kana kũhũrana.

²⁹Nake Abineri na andũ ake makĩraara magĩthiĩ makĩgera Araba; magĩkĩringa Jorodani, makĩgera Bithironi guothe, magĩgĩkinya Mahanaimu.

³⁰Nake Joabu agĩtiga gũteng’eria Abineri, akĩhũndũka; na rĩrĩ, hĩndĩ ��rĩa aacokanĩrĩirie andũ othe hamwe, hakĩagwo andũ ikũmi na kenda thĩinĩ wa ndungata cia Daudi, o na Asaheli.

³¹No rĩrĩ, ndungata cia Daudi nĩcioragĩte andũ magana matatũ ma mĩrongo ĩtandatũ a andũ a Benjamini na Abineri.

³²Nao magĩkĩoya kĩimba gĩa Asaheli magĩgĩthika mbĩrĩra ya ithe, ĩrĩa yarĩ Bethi-lehemu. Nake Joabu na andũ ake makĩraara magĩthiĩ, gũkĩmakĩĩra me gũkuhĩ na Hebironi.