2 Samuel 3

¹Na atĩrĩrĩ, nyũmba ya Saulu na nyũmba ya Daudi igĩtũũra irũaga mbaara hĩndĩ ndaya; nake Daudi agĩkĩrĩrĩria kũgĩa na hinya, no nyũmba ya Saulu ĩgĩkĩrĩrĩria kwaga hinya.

²Nake Daudi agĩciarĩra ihĩĩ kũu Hebironi; nake mũrũwe wa irigithathi nĩ Amunoni, ũrĩa waciarĩtwo nĩ Ahinoamu, Mũjezireeli;

³na wa kerĩ nĩ Kileabu, ũrĩa waciarĩtwo nĩ Abigaili, ũrĩa warĩ mũka wa Nabali, Mũkarimeli; na wa gatatũ nĩ Abisalomu, ũrĩa waciarĩtwo nĩ Maaka, mwarĩ wa Talimai, mũthamaki wa Geshuru;

⁴na wa kana nĩ Adonija, ũrĩa waciarĩtwo nĩ Hagithu; na wa gatano, nĩ Shefatia, ũrĩa waciarĩtwo nĩ Abitali;

⁵na wa gatandatũ, nĩ Ithireamu, ũrĩa waciarĩtwo nĩ Egila, mũka wa Daudi. Acio nĩo maaciarĩirũo kũu Hebironi nĩ Daudi.

⁶Na gũgĩkinya atĩrĩ, atĩ hĩndĩ ĩrĩa nyũmba ya Saulu, o na nyũmba ya Daudi ciatũire na mbaara-rĩ, Abineri akĩĩĩkĩra hinya thĩinĩ wa nyũmba ya Saulu.

⁷Na rĩrĩ, Saulu aarĩ na thuriya yetagwo Rizipa, mwarĩ wa Aia; nake Ishi-boshethu akĩũria Abineri atĩrĩ, Nĩ kĩ gĩatũmire ũkonane na thuriya ya baba?

⁸Abineri agĩkĩrakara mũno mũno nĩ ũndũ wa ũhoro ũcio wa Ishi-boshethu, akiuga atĩrĩ, Hĩ! Kaĩ ndĩkĩrĩ mũtwe wa ngui wa Juda? Kaĩ ũtekũmenya atĩ matukũ maya ndũire njĩkaga andũ a nyũmba ya Saulu, thoguo, o na ariũ a ithe, o na arata ake, maũndũ ma tha? Na ningĩ wee mwene, Ishibothethu, ndirĩ ndakũrekereria ngĩkũneana moko-inĩ ma Daudi. Na no kũnjĩra ũranjĩra atĩ ndĩ na ihĩtia ũhoro-inĩ wa mũndũ-wa-nja ũcio.

⁹Ngai aro’thũũra niĩ, Abineri, o na anjĩke ũũru makĩria, ingĩaga gwĩka Daudi o ta ũrĩa Jehova aamwĩrire na mwĩhĩtwa atĩ nĩakamwĩka;

¹⁰naguo nĩ atĩ ndute ũthamaki ũyũ uume thĩinĩ wa nyũmba ya Saulu, o naguo ũhoro wa gũikarĩra gĩtĩ kĩa ũnene gĩa ũthamaki-rĩ, ndĩũhe Daudi, atuĩke mũthamaki wa gũthamakĩra Isiraeli, o na Juda, kuuma Dani o nginya Biri-shiba.

¹¹Nake Ishi-boshethu ndaigana kũhota gũcokeria Abineri kiugo kĩngĩ, nĩ ũndũ nĩaamwĩtigĩrire.

¹²Nake Abineri agĩkĩrekia andũ mathiĩ kwĩ Daudi makamũhe ũhoro ũrĩa aarĩ naguo, akiuga atĩrĩ, Bũrũri ũyũ ũkĩrĩ wa ũ hihi? O na ningĩ akiuga atĩrĩ, Nĩtũgĩe na kĩrĩkanĩro niĩ nawe, na atĩrĩrĩ, guoko gwakwa gũkũgĩa hamwe nawe, nĩguo ndehe Isiraeli othe mwena waku.

¹³Nake Daudi akĩmũcokeria atĩrĩ, Nĩ wega; nĩtũkũgĩa na kĩrĩkanĩro nawe; no rĩrĩ, nĩharĩ ũndũ ũmwe ũkwamba kũnjĩka, naguo nĩ wa atĩ ndũkanyona ũthiũ, tiga o wambire kũndehere Mikali, mwarĩ wa Saulu, ũgĩũka kũnyona ũthiũ wakwa.

¹⁴Nake Daudi agĩkĩrekeria Ishi-hoshethu wa Saulu andũ, makamwĩre atĩrĩ, Nengera mũka wakwa, Mikali, ũrĩa ndagũrire na ikonde igana cia Afilisiti.

¹⁵Nake Ishi-boshethu agĩkĩrekania, akĩmũtunya mũrũme, ũrĩa wetagwo Palitieli wa Laishi.

¹⁶Nake mũthuriwe agĩgĩtwarana nake, agĩthiĩ akĩrĩraga, akĩmũrũmĩrĩra o nginya Bahurimu. Hĩndĩ ĩo Abineri akĩmwĩra atĩrĩ, Ta hũndũka, wĩthiĩre; nake agĩkĩhũndũka.

¹⁷Nake Abineri agĩkĩaria na athuri a Isiraeli, akĩmera atĩrĩ, O na tene no mweriragĩria Daudi amũthamakagĩre;

¹⁸ta ĩkai ũndũ ũcio rĩu; nĩ ũndũ Jehova nĩaarĩtie ũhoro wa Daudi, akoiga ũũ: Atĩrĩrĩ, ngahonokia andũ akwa Isiraeli ndĩmarute moko-inĩ ma Afilisiti, o na moko-inĩ ma thũ ciao ciothe, na guoko kwa Daudi, ndungata yakwa.

¹⁹Ningĩ Abineri agĩkĩaria na andũ a Benjamini, o na agĩthiĩ kwaria ũhoro o ro ũcio ũkĩĩiguagĩrũo nĩ Daudi, o kũu Hebironi, akĩmwĩra maũndũ mothe marĩa andũ a Isiraeli o na andũ othe a nyũmba ya Benjamini monete atĩ nĩmo maagĩrĩire gwĩkwo.

²⁰Nake Abineri agĩgĩthiĩ agĩkinya he Daudi o kũu Hebironi, me na andũ mĩrongo ĩĩrĩ. Nake Daudi akĩrugithĩria Abineri na andũ acio maarĩ hamwe nake iruga.

²¹Nake Abineri akĩĩra Daudi atĩrĩ, Nĩngũũkĩra ’thiĩ, ngagĩcokererie Isiraeli othe harĩ wee, mwathi wakwa, mũthamaki, nĩ getha marĩkanĩre nawe, na nĩguo ũthamakagĩre arĩa othe ũkwĩendera wee mwene. Daudi agĩkĩreka Abineri ethiĩre; nake agĩgĩĩthiĩra na thayũ.

²²Na atĩrĩrĩ, ndungata cia Daudi, irĩ hamwe na Joabu, igĩgĩũka ciumĩte tũita-inĩ, nacio ikĩinũkia indo nyingĩ iria ciatahĩtwo; no rĩrĩ, hĩndĩ ĩo Abineri ndaakorirũo me na Daudi kũu Hebironi; nĩ ũndũ nĩaamũreketie ethiĩre, nake agethiĩra na thayũ.

²³Na rĩrĩ, hĩndĩ ĩrĩa Joabu, o na mbũtũ yothe ya ita ĩrĩa yarĩ hamwe nake, yagĩkinyire, andũ arĩa maarĩ kuo makĩhe Joabu ũhoro makĩmwĩra atĩrĩ, Abineri wa Neri, nĩokire agĩkinya gũkũ kwa mũthamaki, nake nĩamũrekete ethiĩre, na agethiĩra na thayũ.

²⁴Hĩndĩ ĩo Joabu agĩgĩthiĩ agĩkinya he mũthamaki, akĩmũũria atĩrĩ, Wagĩĩka atĩa? Abineri agĩũkĩte harĩ wee-rĩ, nĩ kĩ gĩtũmire ũmũreke ethiĩre, na rĩu nĩagĩthiĩte o gũthiĩ?

²⁵Githĩ ndũũĩ atĩ Abineri wa Neri okĩte gũkũhenia nĩguo atuĩrie maũndũ mothe ma ũrĩa wĩkaga ũkiuma itũũra-inĩ rĩaku, o na ũkĩinũka gwaku mũciĩ?

²⁶Na rĩrĩ, hĩndĩ ĩrĩa Joabu oimire he Daudi-rĩ, agĩkĩrekia andũ marũmĩrĩre Abineri, makĩmũhũndũra akinyĩte gĩthima-inĩ gĩa Sira; no rĩrĩ, Daudi ndaamenyete ũhoro ũcio.

²⁷Na rĩrĩ, Abineri aacoka Hebironi, Joabu akĩmuoya, akĩmũtwara keheri-inĩ kĩhingo-inĩ, nĩguo makaarĩrie ho me ndundu, nake akĩmũthecera nda hau, nĩ ũndũ wa thakame ĩrĩa aaitire ya Asaheli mũrũ wa nyina, nake Abineri agĩgĩkua.

²⁸Na rĩrĩ, thutha-inĩ, hĩndĩ ĩrĩa Daudi aaiguire ũhoro ũcio, akiuga atĩrĩ, Niĩ, na andũ arĩa ’thamakagĩra, tũtirĩ na wĩhia o na ũrĩkũ mbere ya Jehova tene na tene ũkoniĩ thakame ya Abineri wa Neri, ĩrĩa ĩitĩtwo;

²⁹ũndũ ũcio ũrocokerera Joabu na nyũmba ya ithe yothe; ningĩ thĩinĩ wa nyũmba ya Joabu gũtikanaage mũndũ ũkuura mwĩrĩ wake nĩ ũndũ wa mũthiori, kana mũndũ mũrũaru mangũ, kana mũndũ ũgũthiĩ etirimĩtie na mũtirima, kana mũndũ ũũragĩtwo na rũhiũ rũa njora, o na kana mũndũ wagĩte irio.

³⁰Ũguo nĩguo Joabu na Abishai, mũrũ wa nyina, moragire Abineri, nĩ ũndũ wa ũrĩa oragĩire Asaheli, mũrũ wa nyina wao, o kũu Gibeoni ita-inĩ.

³¹Nake Daudi agĩkĩĩra Joabu, o na andũ othe arĩa maarĩ hamwe nake, atĩrĩ, Tembũrangai nguo cianyu, mwĩhotore nguo cia makũnia, mũrĩrĩre haha mbere ya kĩimba kĩa Abineri. Nake Daudi, ũcio mũthamaki, akĩrũmĩrĩra gĩtanda kĩrĩa gĩakuuĩte kĩimba gĩake.

³²Abineri agĩgĩthikwo kũu Hebironi, nake mũthamaki akĩanĩrĩra na mũgambo mũnene, akĩrĩrĩra hau mbĩrĩra-inĩ ya Abineri; o nao andũ othe makĩrĩra.

³³Nake mũthamaki agĩkĩrĩrĩra Abineri na ciugo ici: Hĩ, githĩ Abineri aagĩkuaga o ta mũndũ mũkĩgu?

³⁴Moko maku ti kuohwo maarĩ mohe, o na kana magũrũ maku makohanio na bĩngũ. O ta ũrĩa mũndũ oragagwo nĩ ciana cia waganu-rĩ, ũguo noguo nawe woragirũo. Nao andũ acio othe magĩcoka makĩmũrĩrĩra rĩngĩ.

³⁵Ningĩ andũ acio othe magĩthengerera harĩ Daudi mamũringĩrĩrie arĩe irio gũtanatuka; no rĩrĩ, Daudi akĩĩhĩta, akiuga atĩrĩ, Ngai aro’thũũra, o na anjĩke ũũru makĩria, ingĩcama irio, kana kĩndũ o na kĩ, nginya o riũa rĩthũe.

³⁶Nao andũ othe makĩona ũrĩa ũndũ ũcio wathiĩ, ũgĩkĩmakenia, o ta ũrĩa ũndũ o wothe ũrĩa mũthamaki ũcio ekaga wamakenagia othe.

³⁷Tondũ ũcio, andũ othe a Isiraeli magĩkĩmenya mũthenya o ro ũcio atĩ ũhoro wa kũũraga Abineri wa Neri ndwoimanĩte na mũthamaki.

³⁸Nake mũthamaki agĩkĩĩra ndungata ciake atĩrĩ, Kaĩ mũtoĩ atĩ ũmũthĩ nĩhoragĩtwo mũnene, na mũndũ wĩ igweta mũno thĩinĩ wa Isiraeli?

³⁹Na rĩrĩ, ũmũthĩ-rĩ, niĩ o na niĩ, o na harĩa ndĩ mũitĩrĩrie maguta ngatuĩka mũthamaki, ’haana o ta njagĩte hinya; nao andũ aya, ariũ a Zeruia, nĩmanyũmĩire mũno. Mũndũ ũrĩa wĩkaga waganu-rĩ, Jehova aromũhe kĩrĩa aagĩrĩirũo nĩ kũheo, o ta ũrĩa waganu ũcio wake ũtariĩ.