2 Samuel 4

¹Na rĩrĩ, hĩndĩ ĩrĩa Ishi-boshethu wa Saulu aaiguire atĩ Abineri nĩaakuĩrĩire Hebironi, agĩitĩka kũũrũo nĩ hinya, nao Isiraeli othe makĩgwatwo nĩ kĩeha.

²Nake Ishi-boshethu ũcio, mũrũ wa Saulu, agĩgĩkorũo arĩ na andũ erĩ arĩa maathaga itungati cia ita; na ũmwe etagwo Baana, nake ũrĩa ũngĩ agetwo Rekabu, nao maarĩ ariũ a Rimoni, Mũbeerothi, wa ciana cia Benjamini, (nĩ ũndũ Beerothi rĩatuĩtwo ta rĩrĩ rĩa Benjamini,

³nao Abeerothi magĩgĩkorũo morĩire Gitaimu, magatũũra marĩ ageni kuo o na ũmũthĩ.)

⁴Na rĩrĩ, Jonathani wa Saulu aarĩ na mũrũwe wathuaga magũrũ. Nake aarĩ mwana wa mĩaka ĩtano hĩndĩ ĩrĩa ũhoro wa gĩkuũ gĩa Saulu na Jonathani wamakinyĩire uumĩte Jezireeli, nake mũreri wake akĩmuoya akĩũra; na gũgĩkinya atĩrĩ, atĩ rĩrĩa aahiũhaga mũno ore-rĩ, mwana ũcio agĩkĩgũa, akĩgitũka magũrũ. Nake etagwo Mefiboshethu.

⁵Na rĩrĩ, Rekabu na Baana, ariũ acio a Rimoni Mũbeerothi, magĩgĩthiĩ magĩkinya nyũmba ya Ishi-boshethu ihinda ta rĩrĩa gũkoragwo kũrĩ ũrugarĩ mũthenya, o rĩrĩa aahurũkaga mĩaraho.

⁶Nao maathiire magĩtonya o kũu nyũmba thĩinĩ, metuĩte ta mekwenda kũgĩra ngano, nao makĩmũtheca nda; nao Rekabu na Baana mũrũ wa ithe makĩĩũrĩra.

⁷Na rĩrĩ, hĩndĩ ĩrĩa maakinyire nyũmba-inĩ ĩo, nake agĩkorũo akomete gĩtanda-inĩ gĩake kanyũmba gake ga toro-rĩ, magĩkĩmũgũtha, makĩmũũraga, magĩcoka makĩmũtinia mũtwe; thutha wa ũguo makĩoya mũtwe ũcio wake, makĩraara magĩthiĩ na njĩra ya Araba ũtukũ ũcio wothe.

⁸Naguo mũtwe ũcio wa Ishi-boshethu makĩũtwarĩra Daudi o kũu Hebironi, makĩĩra mũthamaki ũũ: Atĩrĩrĩ, mũtwe wa Ishi-boshethu wa Saulu, thũ yaku ĩrĩa yacaragia gũkũruta muoyo, nĩguo ũyũ; ũmũthĩ, mũthamaki ũyũ, mwathi witũ, nĩguo Jehova aakũrĩhĩria gwĩ Saulu o na rũciaro rũake.

⁹Nake Daudi agĩcokeria Rekabu, na mũrũ wa nyina Baana, ariũ acio a Rimoni Mũbeerothi, akĩmera atĩrĩ, O ta ũrĩa Jehova atũũraga muoyo, ũrĩa ũtũire a’honokagia muoyo wakwa maũndũ-inĩ mothe marĩa ma’nyarirĩte-rĩ,

¹⁰hĩndĩ ĩrĩa mũndũ aanjarĩirie akĩnj��ra ũũ: Atĩrĩrĩ, Saulu nĩakuĩte, ecirĩtie atĩ nĩ ũhoro mwega mũno andeheire-rĩ, nĩ kũnyita ndamũnyitire, ngĩmũũragĩra o kũu Zikilagi; naguo ũndũ ũcio ũgĩtuĩka irĩhi rĩrĩa ndamũrĩhire nĩ ũndũ wa ũhoro ũcio aandeheire.

¹¹Kũngĩkorũo nĩ ũguo-rĩ, kaĩ akĩrĩ maita maigana ma ũndũ ũcio hihi ingĩmwĩka inyuĩ, andũ aya aaganu, o inyuĩ mũũragĩte mũndũ mũthingu arĩ kanyũmba gake mwene, akomete gĩtanda-inĩ gĩake? Githĩ ndingĩgĩtũma thakame yake ĩmũcokerere inyuĩ o moko-inĩ manyu, ndĩmweherie muume gũkũ thĩ?

¹²Nake Daudi agĩgĩatha aanake ake, nao makĩmoraga, na makĩmatinia moko na magũrũ, magĩcoka makĩmacuuria handũ igũrũ hakuhĩ na karia ga kũu Hebironi. No rĩrĩ, mũtwe wa Ishi-boshethu makĩũkuua, magĩthiĩ makĩũthika mbĩrĩra-inĩ ya Abineri, o kũu Hebironi.