2 Samuel 5

¹Hĩndĩ ĩo mĩhĩrĩga yothe ya Isiraeli ĩgĩgĩthiĩ he Daudi o kũu Hebironi, ĩkĩmwarĩria, ĩkĩmwĩra atĩrĩ, Tũrĩ a mũthimo ũmwe nawe, o na a mwĩrĩ ũmwe.

²Tene hĩndĩ ĩrĩa Saulu aarĩ mũthamaki wa gũtũthamakĩra-rĩ, wee nĩwe watongoragia mbũtũ cia Isiraeli igĩthiĩ ita, o na ikĩinũka; nake Jehova agĩkwĩra atĩrĩ, Wee nĩwe ũrĩrĩithagia andũ akwa Isiraeli, na nĩwe ũgatuĩka mũtongoria wa Isiraeli.

³Tondũ ũcio athuri othe a Isiraeli magĩthiĩ magĩkinya he mũthamaki o kũu Hebironi; nake Daudi ũcio mũthamaki akĩrĩkanĩrĩra nao kũu Hebironi mbere ya Jehova; nao magĩgĩitĩrĩria Daudi maguta atuĩke mũthamaki wa gũthamakĩra Isiraeli.

⁴Nake Daudi aakorirũo aninĩte mĩaka mĩrongo ĩtatũ hĩndĩ ĩrĩa aambĩrĩirie gũthamaka; agĩgĩthamaka mĩaka mĩrongo ĩna.

⁵Mĩaka mũgwanja na mĩeri ĩtandatũ agĩgĩthamakĩra Juda kũu Hebironi, nakuo Jerusalemu agĩthamakĩra Isiraeli othe, hamwe na Juda, mĩaka mĩrongo ĩtatũ na ĩtatũ.

⁶Nake mũthamaki na andũ ake a ita, magĩgĩthiĩ Jerusalemu makahũrane na Ajebusi arĩa maatũũraga bũrũri ũcio; nao Ajebusi acio makĩaria na Daudi, makiuga atĩrĩ, Ndũngĩtonya gũkũ, nĩ ũndũ andũ arĩa atumumu, o na arĩa mathuaga, nĩo megũkũgiria; naguo ũguo nĩ ta kuuga Daudi ndangĩhota gũtonya kuo.

⁷No rĩrĩ, o na moiga ũguo-rĩ, Daudi nĩaatunyanire kĩhingo kĩu kĩa hinya gĩa Zayuni; na nokĩo gĩĩtagwo itũũra rĩa Daudi.

⁸Naguo mũthenya ũcio Daudi akiuga atĩrĩ, Mũndũ ũrĩa wothe ũkũhũrana na Ajebusi-rĩ, nĩakĩambate agere mũtaro-inĩ wa maĩ, akahũre andũ acio mathuaga, o na acio atumumu, o acio athũũre nĩ Daudi na ngoro yake. Na tondũ ũcio, kwĩragwo atĩrĩ, Atumumu, o na andũ arĩa mathuaga me ho-rĩ, ndangĩhota gũtonya nyũmba.

⁹Nake Daudi agĩgĩtũũra kĩhingo-inĩ kĩu kĩa hinya, agĩgĩtua itũũra rĩa Daudi. Ningĩ Daudi akĩnenehia itũũra rĩu, akĩrĩaka, arĩrutĩtie Milo arĩcoketie na thĩinĩ.

¹⁰Daudi agĩgĩkĩrĩrĩria kũgĩa na ũnene, nĩ gũkorũo Jehova, Ngai Mũnene wa Ita, aarĩ hamwe nake.

¹¹Na rĩrĩ, Hiramu, mũthamaki wa Turo, akĩrekeria Daudi andũ, o na akĩmũtwarithĩria mĩtarakwa, na atharamara, na aaki na mahiga; nao magĩakĩra Daudi nyũmba.

¹²Nake Daudi agĩkĩona atĩ Jehova nĩamũhandĩte atũũre e mũthamaki wa gũthamakĩra Isiraeli, na atĩ nĩanenehetie ũthamaki wake mũno nĩ ũndũ wa andũ ake Isiraeli.

¹³Nake Daudi akĩĩhikĩria thuriya ingĩ, o na aka angĩ amarutĩte o kũu Jerusalemu, thutha wa aarĩkia kuuma Hebironi; na gũkĩgĩa ihĩĩ o na airĩtu angĩ maciarĩirũo Daudi.

¹⁴Namo maya nĩmo marĩĩtwa ma ihĩĩ ciake iria aaciarĩire kũu Jerusalemu; nĩ Shamua, na Shobabu, na Nathani, na Solomoni,

¹⁵na Ibiharu, na Elishua, na Nefegi, na Jafia,

¹⁶na Elishama, na Eliada, na Elifeleti.

¹⁷Na rĩrĩ, hĩndĩ ĩrĩa Afilisiti maaiguire atĩ andũ nĩmaaitĩrĩirie Daudi maguta atuĩke mũthamaki wa Isiraeli-rĩ, Afilisiti acio othe magĩkĩambata magacarie Daudi; nake Daudi akĩigua ũhoro ũcio, agĩikũrũka agĩthiĩ kĩhingo-inĩ kĩu kĩa hinya.

¹⁸Nao Afilisiti magĩgĩkorũo maambatĩte makaarania ita ciao gĩtuamba kĩa Refaimu,

¹⁹nake Daudi agĩgĩtuĩria ũhoro he Jehova, akĩũria atĩrĩ, Nĩngwambata ’thiĩ ngahũrane na Afilisiti? Ningĩ-rĩ, nĩũkũmarekereria ũmaneane moko-inĩ makwa hihi? Nake Jehova akĩĩra Daudi atĩrĩ, Ambata, nĩ gũkorũo ndirĩ hingo itekũrekereria Afilisiti ndĩmaneane moko-inĩ maku.

²⁰Nake Daudi agĩgĩthiĩ agĩkinya Baali-perazimu, akĩmahũrĩra kuo; agĩcoka akiuga ũũ: Jehova nĩahehenjangĩte thũ ciakwa irĩ mbere yakwa, o ta ũrĩa maĩ matathũragĩra handũ, makoina. Na tondũ ũcio agĩgĩĩta handũ hau Baali-perazimu.

²¹Nao Afilisiti magĩgĩtiga mĩhianano ya ngai ciao hau, nake Daudi na andũ ake makĩmĩoya magĩthiĩ nayo.

²²Ningĩ Afilisiti magĩgĩcoka makĩambata o rĩngĩ, makĩĩarania o kũu gĩtuamba-inĩ kĩu kĩa Refaimu.

²³Na rĩrĩ, hĩndĩ ĩrĩa Daudi aatuĩririe ũhoro ũcio he Jehova, Jehova akiuga atĩrĩ, Tiga kwambata; thiĩ ũmathiũrũrũke ũmoimĩte na thutha, ũmakore ũmarutĩtie na kũrĩa kũng’etheire mĩkũngũgũ-inĩ.

²⁴Na gũgatuĩka atĩrĩ, atĩ rĩrĩa ũrĩigua ta kũrĩ andũ megũthiĩ makĩrumagia thĩ mĩkũngũgũ-inĩ ĩo igũrũ-rĩ, ũkĩarahũke o narua; nĩ gũkorũo hĩndĩ ĩo nĩguo Jehova arĩkorũo oimagarĩte akũgĩe mbere nĩguo akahũre ita ya Afilisiti.

²⁵Nake Daudi agĩgĩĩka ũguo, o ta ũrĩa Jehova aamwathire; agĩkĩhũra Afilisiti amarutĩtie Geba o nginya Gezeri.