2 Samuel 6

¹Ningĩ Daudi agĩgĩcokereria njamba ciothe iria thure cia Isiraeli hamwe; nacio ciarĩ ngiri mĩrongo ĩtatũ.

²Agĩgĩũkĩra, agĩthiĩ na andũ acio othe maarĩ hamwe nake, makiuma Baale Juda, makaambatie ithandũkũ rĩa Ngai, marĩrute kuo, o rĩu rĩĩtanĩtio na Rĩĩtwa Rĩake, naguo nĩ ta kuuga rĩĩtwa rĩa Jehova Mũnene wa Ita, we ũrĩa ũikaraga gatagatĩ-inĩ ka makerubi.

³Narĩo ithandũkũ rĩu rĩa Ngai makĩrĩigĩrĩra igũrũ rĩa ngari njerũ, makĩrĩruta nyũmba ya Abinadabu ĩrĩa yarĩ hau kĩrĩma igũrũ; nao Uza na Ahio, ariũ a Abinadabu, nĩo maatuĩkire atwari a ngari ĩo njerũ.

⁴Magĩkĩmĩruta kũu mũciĩ wa Abinadabu kĩrĩma-inĩ kĩu, ĩĩ na ithandũkũ rĩu rĩa Ngai igũrũ rĩayo; nake Ahio agĩthiĩ mbere ya ithandũkũ rĩu.

⁵Nake Daudi, o na andũ othe a nyũmba ya Isiraeli, magĩkĩinĩra mbere ya Jehova makĩhũraga inanda cia mĩthemba mĩingĩ, o iria ithondeketwo na mũtĩ wa mũthengera, na inanda cia mũgeto iria nene, na inanda cia kĩnubi, na tũhembe, na njingiri, na thani iria ihũrithanagio ikagamba.

⁶Nao maakinya kĩhuhĩro-inĩ kĩa ngano kĩa Nakoni-rĩ, Uza agĩtambũrũkĩria ithandũkũ rĩu rĩa Ngai guoko akĩrĩnyita, nĩ ũndũ ndegwa nĩciahĩngĩtwo.

⁷Nake Jehova agĩgĩcinwo nĩ marakara nĩ ũndũ wa Uza; Ngai akĩmũhũrĩra o ro hau nĩ ũndũ wa ihĩtia rĩu rĩake, agĩgĩkuĩra o hau ithandũkũ-inĩ rĩu rĩa Ngai.

⁸Nake Daudi agĩkĩigua ũũru nĩ ũndũ wa ũguo Jehova aaguthũkĩire Uza, agĩgĩtua handũ hau Perezu-uza; naho hatũire hetagwo ũguo o na ũmũthĩ.

⁹Nake Daudi agĩgĩĩtigĩra Jehova mũthenya ũcio, akĩũria atĩrĩ, Ĩ ithandũkũ rĩrĩ rĩa Jehova rĩgagĩkinya gwakwa atĩa hihi?

¹⁰Na tondũ ũcio Daudi ndetĩkĩrire gũthamĩria ithandũkũ rĩu rĩa Jehova kũu aatũire, itũũra rĩa Daudi; no aarĩkerũrithirie akĩrĩtonyia mũciĩ wa Obedi-edomu, ũrĩa Mũgiti.

¹¹Narĩo ithandũkũ rĩu rĩa Jehova rĩgĩikara kũu mũciĩ wa Obedi-edomu, ũcio Mũgiti, mĩeri ĩtatũ; nake Jehova agĩkĩrathima Obedi-edomu, o na nyũmba yake yothe.

¹²Naguo ũhoro ũcio ũgĩkĩheo mũthamaki Daudi, akĩĩrũo atĩrĩ, Jehova nĩarathimĩte nyũmba ya Obedi-edomu, o na kĩrĩa gĩothe e nakĩo, nĩ ũndũ wa ithandũkũ rĩu rĩa Ngai. Nake Daudi agĩgĩthiĩ akĩruta ithandũkũ rĩu rĩa Ngai mũciĩ wa Obedi-edomu, akĩrĩambatia itũũra rĩa Daudi akenete.

¹³Na gũgĩkinya atĩrĩ, atĩ andũ acio maakuuĩte ĩthandũkũ rĩa Jehova maakinya makinya matandatũ-rĩ, Daudi agĩkĩruta ndegwa, o na nyamũ noru ya gĩcegũ, ituĩke igongona.

¹⁴Ningĩ Daudi akĩinĩra mbere ya Jehova na hinya wake wothe, nake Daudi agĩkorũo ehotorete ebodi ya gatani.

¹⁵Ũguo nĩguo Daudi, na andũ othe a nyũmba ya Isiraeli, maambatirie ithandũkũ rĩu rĩa Jehova, makĩanagĩrĩra mũno, na gũkĩhuhagwo coro.

¹⁶Na gũgĩtuĩka atĩrĩ, atĩ ihinda rĩrĩa ithandũkũ rĩu rĩa Jehova rĩakinyaga itũũra-inĩ rĩa Daudi, Mikali, mwarĩ wa Saulu, agĩcũthĩrĩria na nja arĩ ndirica-inĩ, agĩkĩona mũthamaki Daudi agĩthiĩ agĩtũrũhaga, akĩinaga mbere ya Jehova; nake akĩmũnyarara na ngoro.

¹⁷Narĩo ithandũkũ rĩu rĩa Jehova rĩgĩgĩtonyio handũ harĩo, o hau gatagatĩ ka hema ĩrĩa Daudi aambĩte nĩ ũndũ warĩo; nake Daudi akĩrutĩra mahaki ma njino, o na magongona ma ũiguano, kũu mbere ya Jehova.

¹⁸Na rĩrĩ, aarĩkia kũruta mahaki macio ma njino, o na magongona ma ũiguano-rĩ, akĩrathima andũ acio rĩĩtwa-inĩ rĩa Jehova, Mũnene wa Ita.

¹⁹Ningĩ akĩgayanĩria andũ othe, o kĩrĩndĩ kĩu gĩothe gĩa Isiraeli, arũme o na aka, irio; o mũndũ agĩkĩmũhe mũgate ũmwe, na gĩcunjĩ kĩa nyama, o na gĩkũmba gĩa thabibu nyũmũ. Thutha wa ũguo andũ acio othe magĩĩthiĩra, o mũndũ akĩinũka gwake mũciĩ.

²⁰Nake Daudi agĩkĩhũndũka akĩinũka nĩguo akarathime andũ othe a nyũmba yake. Nake Mikali, mwarĩ wa Saulu, agĩkiumagara nĩguo agatũnge Daudi, akiuga atĩrĩ, Hĩ! Kaĩ mũthamaki wa Isiraeli nĩegoocithĩtie ũmũthĩ eguũrĩtie nguo yake ya ũthamaki akĩonagwo nĩ ndungata cia airĩtu cia ndungata ciake, ta ũrĩa mũndũ ũtarĩ kĩene eguũragia nguo orĩte thoni-ĩ!

²¹Nake Daudi agĩgĩcokeria Mikali atĩrĩ, Ũndũ ũcio ũgwĩkagwo mbere ya Jehova, o we ũcio wa’thurire ithenya rĩa thoguo, o na rĩa andũ othe a nyũmba yake, nĩ getha andue mũnene wa gwatha andũ a Jehova, naguo ũguo nĩ ta kuuga Isiraeli; na tond�� ũcio no mũhaka nyinĩre mbere ya Jehova.

²²Na nĩngwĩtua ta njagĩte gĩtĩo makĩria kũrĩ ũguo ndariĩ rĩu, na ndĩĩonage niĩ mwene o ta ndĩ mũnyinyi mũno; no rĩrĩ, ha ũhoro wa ndungata cia airĩtu icio wagweta-rĩ, niĩ nĩ gũtĩo ngũtĩo nĩcio.

²³Na rĩrĩ, Mikali, mwarĩ wa Saulu, ndaigana kũgĩa na kaana o nginya mũthenya ũrĩa aakuire.