2 Samuel 7

¹Na gũgĩkinya atĩrĩ, atĩ hĩndĩ ĩrĩa mũthamaki Daudi aatũũrire nyũmba yake, o nake Jehova agĩkorũo atũmĩte ahurũke agatiga gũũkĩrĩrũo nĩ thũ ciake iria ciamũrigicĩirie na mĩena yothe-rĩ,

²agĩkĩĩra Nathani, ũrĩa mũnabii, atĩrĩ, Ta rora wone atĩ rĩu niĩ ndũũraga nyũmba yakĩtwo na mĩtarakwa, no rĩrĩ, ithandũkũ rĩa Ngai rĩtũũraga o matama-inĩ marĩa ma kũrĩhumbĩra.

³Nake Nathani agĩkĩĩra mũthamaki atĩrĩ, Thiĩ, ũgeke ũndũ o wothe ũrĩa wĩ ngoro-inĩ yaku; nĩ gũkorũo Jehova arĩ hamwe nawe.

⁴Na gũgĩkinya atĩrĩ, atĩ ũtukũ o ro ũcio, ndũmĩrĩri ya Jehova ĩgĩkinyĩrĩra Nathani, akĩĩrũo atĩrĩ,

⁵Thiĩ ũkere ndungata yakwa Daudi atĩrĩ, Jehova oiga ũũ: Atĩrĩrĩ, anga nĩ wega ũnjakĩre nyũmba nĩguo ndĩmĩtũũre,

⁶kuona atĩ ndirĩ ndaikara nyũmba kuuma mũthenya ũrĩa ndaambatirie ciana cia Isiraeli, ciume Misiri, o na ũmũthĩ, nĩ gũtũũra ndũire ’thiaga ndĩ hema-inĩ, o na g��ikaro-inĩ?

⁷Atĩrĩrĩ, kũndũ kũrĩa guothe ndanathiĩ na ciana cia Isiraeli ciothe-rĩ, ndĩ ndaaria kiugo o na kĩmwe hihi na mũtiirĩrĩri o na ũmwe wa mĩhĩrĩga ya ciana cia Isiraeli ĩrĩa ndaathire ĩrĩithagie andũ akwa Isiraeli, ngĩũria ũũ: Nĩ kĩ kĩanagiria mũnjakĩre nyũmba ya mĩtarakwa?

⁸Na rĩu tondũ ũcio nĩ wega ũkere Daudi ndungata yakwa atĩrĩ, Jehova Mũnene wa Ita, oiga ũũ: Atĩrĩrĩ, ndakũrutire ciugũ-inĩ cia mbũri ũtige gũcirũmĩrĩra, nĩ getha ũtuĩke mũnene wa gwathaga andũ akwa Isiraeli;

⁹na nĩnjikarĩte hamwe nawe kũndũ kũrĩa guothe wanathiĩ, na nĩ’ninĩte thũ ciaku ciothe, ikehera mbere yaku; na nĩngatũma ũgĩe igweta mũno o ta andũ a gũkũ thĩ arĩa marĩ igweta mũno.

¹⁰Nao andũ akwa Isiraeli nĩngũmathurĩra handũ ndĩmahande ho, nĩ getha matũũrage handũ hao kĩũmbe, na matigacoka gũthamio rĩngĩ o na rĩ; o na kana ciana iria njaganu icoke kũmanyarira o na atĩa, o ta ũrĩa ciekaga tene,

¹¹o na ta ũrĩa gwatariĩ kuuma mũthenya ũrĩa ndaathanire ngiuga atĩ atiirĩrĩri-bũrũri matuĩke a gũtiirĩrĩra andũ akwa Isiraeli. Na nĩngũkũhurũkia, ũtige kũnyarirũo nĩ thũ ciaku ciothe. O na ningĩ Jehova egũkwĩra atĩrĩ, atĩ Jehova nĩakahanda nyũmba yaku.

¹²Na rĩrĩ, hĩndĩ ĩrĩa matukũ maku makahingio nawe ũkome hamwe na mathoguo, nĩngahanda mũndũ wa mbeũ yaku ĩrĩa ĩgoka thutha waku, yumĩte mũthimo waku; o naguo ũthamaki wake nĩngatũma ũikare ũrũmĩte mũno.

¹³Mũndũ ũcio nĩwe ũgaakĩra rĩĩtwa rĩakwa nyũmba, na nĩngatũma gĩtĩ gĩa ũthamaki wake gĩtũũre kĩrũmĩte mũno tene na tene.

¹⁴Na nĩ niĩ ngatuĩka ithe, nake atuĩke mũrũ wakwa; na angĩkehia-rĩ, ngamũhũraga na rũthanju ta rũrĩa andũ a gũkũ thĩ mahũragwo naruo, o na mahũra ta marĩa ciana cia andũ a gũkũ thĩ ihũragwo.

¹⁵No rĩrĩ, tha ciakwa itikamũthengera ta ũrĩa ndacithengirie harĩ Saulu, o ũcio ndeheririe mbere yaku.

¹⁶Naruo rũciaro rũaku, o na ũthamaki waku, nĩũkona ihandĩtwo igatũũra irũmĩte mũno, tene na tene; o naguo ũhoro waku wa gũikarĩra gĩtĩ-gĩa-ũthamaki nĩũkahandwo ũtũũre ũrũmĩte wega tene na tene.

¹⁷Na rĩrĩ, o ta ũrĩa ũhoro ũcio wothe watariĩ, o na ta ũrĩa ũhoro wothe wa kĩoneki kĩa Nathani gĩa ũtukũ watariĩ, ũguo noguo Nathani aaririe akĩĩra Daudi.

¹⁸Hĩndĩ ĩo mũthamaki Daudi agĩtonya nyũmba thĩinĩ, agĩikara thĩ mbere ya Jehova, nake akiuga ũũ: Atĩrĩrĩ, Mwathani Ngai, niĩ ndĩ ũ, o nayo nyũmba yakwa nĩ ndũũ, atĩ nĩkĩo ũnginyĩtie o haha ndĩ?

¹⁹Na rĩrĩ, Mwathani Ngai, ũndũ ũcio ũwonete na maitho maku ta ũrĩ mũnyinyi, ũgagĩcoka kwaria ũhoro wa nyũmba yakwa niĩ ndungata yaku, wa ihinda iraya rĩrĩa rĩgoka thutha-inĩ o na ningĩ wee, Mwathani Ngai, ũndũ ũcio naguo nĩũwarĩtie o ta ũrĩa ũhoro wa andũ a gũkũ thĩ ũtariĩ!

²⁰Niĩ na niĩ Daudi-rĩ, nĩ ũndũ ũngĩ ũrĩkũ hihi ingĩgĩcoka gũkwĩra makĩria? Nĩ ũndũ-rĩ, wee, Mwathani Ngai nĩũnjũĩ niĩ ndungata yaku.

²¹Tondũ wa ũhoro ũcio warĩtie, o na ũndũ wa ũrĩa wendete gwĩka na ngoro yaku, nĩkĩo wĩkĩte maũndũ macio manene ũguo, nĩ getha ũ’menyithie niĩ, ndungata yaku, ũhoro wamo.

²²Tondũ ũcio, wee Jehova Ngai, ũrĩ mũnene mũno; nĩ gũkorũo gũtirĩ ũngĩ ũhaana tawe, o na kana gũkagĩa Ngai ũngĩ tiga wee, o ta ũrĩa ũhoro wothe ũrĩa twĩiguĩrĩire na matũ maitũ ũtariĩ.

²³Ningĩ-rĩ, nĩ rũrĩrĩ rũrĩkũ gũkũ thĩ rũtariĩ ta andũ aku o aya a Isiraeli, o aya Ngai aathiire gwĩkũũrĩra matuĩke rũrĩrĩ rũake kĩũmbe, nĩ getha atũme we mwene egĩĩre igweta; na eke maũndũ manene nĩ ũndũ wanyu, o na maũndũ ma kũmakania nĩ ũndũ wa bũrũri waku, o na mbere ya andũ aku, Ngai, aya wekũũrĩire wee mwene, ũkĩmaruta Misiri moime ndũrĩrĩ-inĩ ingĩ, na meherere ngai ciacio?

²⁴Na ningĩ nĩwatũmire andũ aku, Isiraeli, mehande maikare marũmĩte wega marĩ aku, matuĩke rũrĩrĩ rũaku kĩũmbe tene na tene; o nawe Jehova ũgĩtuĩka Ngai wao.

²⁵Na rĩu Jehova Ngai, ũhoro ũcio warĩtie ũngoniĩ niĩ ndungata yaku, o na ũkoniĩ nyũmba yakwa-rĩ, tũũra ũwĩkĩrĩte hinya tene na tene, na wĩke o ta ũguo uugĩte.

²⁶Narĩo rĩĩtwa rĩaku tũma rĩtũũre rĩnenehagio tene na tene, na kwĩragwo atĩrĩ, Jehova, Mũnene wa Ita, nĩwe Ngai ũrĩa wathaga Isiraeli; o nayo nyũmba ya ndungata yaku, Daudi, nĩĩkahandwo ĩtũũre ĩrũmĩte wega mbere yaku.

²⁷Nĩ gũkorũo wee Jehova, Mũnene wa Ita, Ngai wa Isiraeli, nĩũnguũrĩirie niĩ ndungata yaku ũndũ ũyũ, ũkoiga atĩrĩ, Nĩngakũhandĩra nyũmba; na tondũ ũcio niĩ, ndungata yaku, nĩnyonete arĩ wega na ngoro yakwa atĩ ngũhoe ihoya rĩu.

²⁸Na rĩu wee Mwathani Ngai, wee nĩwe Ngai, naguo ũhoro waku nĩ wa ma, o ma, na nĩũnjĩrĩire niĩ, ndungata yaku, ũndũ ũcio mwega.

²⁹Na tondũ ũcio, ndagũthaitha ũrathime nyũmba yakwa, niĩ ndungata yaku, nĩ getha ĩtũũre mbere yaku tene na tene; nĩ gũkorũo wee Mwathani Ngai nĩwe uugĩte ũndũ ũcio; nayo nyũmba yakwa niĩ ndungata yaku-rĩ, tũma ĩtũũre ĩrĩ ndathime na kĩrathimo gĩaku tene na tene.