2 Samuel 8

¹Na gũgĩkinya atĩrĩ, atĩ thutha wa maũndũ macio, Daudi akĩhũra Afilisiti akĩmatoria biũ; agĩkĩmatunya itũũra rĩao rĩrĩa rĩohete marĩa mangĩ na hinya, agĩgĩathana kuo ithenya rĩao.

²Ningĩ akĩhũra Amoabi, agĩcoka akĩmaara mĩhari makometio thĩ, nao andũ a mĩhari ĩĩrĩ akĩmathura a kũũragwo, na a mũhari ũmwe mũgima a gũtigwo muoyo. Nao Amoabi magĩgĩtuĩka ndungata cia Daudi, makamũrutagĩra igoti.

³Ningĩ Daudi akĩhũra Hadadezeri, mũrũ wa Rehobu, mũthamaki wa Zoba, e ithiĩro rĩa gũcokithia bũrũri wake ũrĩa aatunyĩtwo gũkuhĩ na Rũũĩ rũa Farati.

⁴Nake Daudi agĩkĩmũtunya andũ ngiri ĩmwe na magana mũgwanja arĩa mathiaga mahaicĩte mbarathi, na andũ arĩa metwaraga na magũrũ ngiri mĩrongo ĩĩrĩ; nacio mbarathi ciao ciothe cia ngari cia ita agĩcitemenga magũrũ agĩcithuithia; no rĩrĩ, nĩaatigirie imwe cia kũigana gũkururagia ngari cia ita igana rĩmwe.

⁵Na rĩrĩ, hĩndĩ ĩrĩa Asuriata a Dameski maathiire gũteithia Hadadezeri, mũthamaki wa Zoba, Daudi akĩũraga Asuriata ngiri mĩrongo ĩĩrĩ na igĩrĩ thĩinĩ wao.

⁶Thutha wa ũguo Daudi agĩkĩiga athigari a kũrangĩra kũndũ o kũndũ kũu Suriata ya Dameski; nao Asuriata magĩgĩtuĩka ndungata cia Daudi, makamũrutagĩra igoti. Nake Jehova agĩgĩtũma Daudi ahootane kũndũ guothe kũrĩa aathiaga.

⁷Nake Daudi akĩoya ngo cia thahabu iria ndungata cia Hadadezeri ciarĩ nacio, agĩcitwara Jerusalemu.

⁸Ningĩ mũthamaki, ti Daudi, akĩruta icango nyingĩ mũno Beta, na Bethorai, matũũra ma Hadadezeri.

⁹Na hĩndĩ ĩrĩa Toi, mũthamaki wa Hamathu, aaiguire atĩ Daudi nĩaahũrĩte ita yothe ya Hadadezeri,

¹⁰agĩkĩrekia Joramu, mũriũ, he mũthamaki Daudi, akamũgeithie, o na amũrathimithie, nĩ ũndũ wa ũrĩa aarũĩte na Hadadezeri, akamũhũra biũ; nĩ gũkorũo Hadadezeri na Toi nĩmaagĩaga na mbaara kaingĩ. Nake Joramu agĩthiĩ akuuĩte indo cia betha, o na cia thahabu, o na cia icango.

¹¹O nacio indo icio, Daudi agĩciamũrĩra Jehova, igĩgĩturanĩrũo na indo iria ingĩ cia betha, o na cia thahabu, iria aamũrĩire Jehova cia ndũrĩrĩ ciothe iria aahootete;

¹²nacio indo icio cioimĩte Suriata, o na Moabi, o na gwa ciana cia Amoni, o na kwa Afilisiti, o na kwa Amaleki, o na indo-inĩ iria ciatahĩtwo Hadadezeri wa Rehobu, mũthamaki wa Zoba.

¹³Nake Daudi agĩkĩgĩa igweta mũno hĩndĩ ĩrĩa oimire kũhũra Asuriata andũ ngiri ikũmi na inyanya o kũu Gĩtuamba gĩa Cumbĩ.

¹⁴Ningĩ agĩkĩiga athigari a kũrangĩra kũu Edomu; nakuo kũu Edomu akĩiga athigari acio kũndũ guothe, nao Aedomu othe magĩgĩtuĩka ndungata cia Daudi. Nake Jehova agĩgĩtũma Daudi ahootane kũndũ guothe kũrĩa aathiaga.

¹⁵Daudi agĩgĩthamaka bũrũri wothe wa Isiraeli, o na agatuithanagia andũ ake othe macira, namo macira macio akamatuithanagia na kĩhooto.

¹⁶Nake Joabu wa Zeruia nĩwe warĩ mũnene wa mbũtũ cia ita; nake Jehoshafatu wa Ahiludu nĩwe warĩ mwandĩki maũndũ ma ihinda rĩu;

¹⁷nake Zadoku wa Ahitubu, na Ahimeleku wa Abiatharu, nĩo maarĩ athĩnjĩri-Ngai; nake Seraia nĩwe warĩ mwandĩki marũa;

¹⁸nake Benaia wa Jehoiada nĩwe warĩ mũrori wa Akerethi na Apelethi; nao ariũ a Daudi maarĩ athĩnjĩri-Ngai.