2 Samuel 11

¹Na gũgĩkinya atĩrĩ, atĩ mwaka ũyũ ũngĩ wakinya, o ihinda rĩrĩa athamaki mahũthĩire kuumagara mathiĩ ita-inĩ-rĩ, Daudi akĩrekia Joabu, o na ndungata iria ingĩ ciake, mathiĩ me rũmwe, o na Isiraeli othe, nao makĩnina ciana cia Amoni; magĩcoka makĩrigicĩria Raba marĩtunyane. No Daudi we mwene aaikarĩte Jerusalemu.

²Na gũgĩkinya atĩrĩ, atĩ o gũgĩthiĩ gũtuka-rĩ, Daudi agĩũkĩra, akiuma gĩtanda-inĩ gĩake, agĩceeranga kũu igũrũ nyũmba-inĩ yake ya ũthamaki; nake arĩ kũu igũrũ akĩona mũndũ-wa-nja agĩĩthamba; nake mũndũ-wa-nja ũcio agĩkorũo arĩ mũthaka mũno akĩonwo.

³Nake Daudi agĩkĩrekia andũ magatuĩrie ũhoro wa mũndũ-wa-nja ũcio. Nake mũndũ ũmwe akiuga atĩrĩ, Githĩ ũcio ti Bathi-sheba, mwarĩ wa Eliamu, mũka wa Uria ũrĩa Mũhiti?

⁴Nake Daudi agĩkĩrekia andũ, makamũgĩre; nake mũndũ-wa-nja ũcio agĩtonya harĩ we, nake akĩonana nake (nĩ gũkorũo nĩaakorirũo etheretie ihinda rĩake rĩa mweri); nake agĩgĩcoka kwao mũciĩ.

⁵Nake mũndũ-wa-nja ũcio agĩkĩgĩa ihu, akĩrekeria Daudi mũndũ, akiuga atĩrĩ, Ndĩ ihu.

⁶Nake Daudi agĩkĩrekeria Joabu mũndũ, akĩmwĩra atĩrĩ, Ndehithĩrie Mũhiti ũrĩa wĩtagwo Uria. Nake Joabu agĩgĩtwarithia Uria he Daudi.

⁷Na rĩrĩ, hĩndĩ ĩrĩa Uria aakinyire harĩ we, Daudi akĩmũhoya ũhoro wa ũrĩa Joabu atariĩ, na wa ũrĩa ũhoro wa andũ arĩa angĩ ũtariĩ, o na ũhoro wa ũrĩa ita irathiĩ.

⁸Nake Daudi agĩkĩĩra Uria atĩrĩ, Gĩikũrũke ũthiĩ gwaku mũciĩ, wĩthambe magũrũ. Nake Uria agĩgĩĩthiĩra akiuma he mũthamaki nyũmba; agĩkĩrũmĩrĩrio irio iria aaheetwo nĩ mũthamaki.

⁹No rĩrĩ, Uria aakomire mũromo-inĩ wa nyũmba ya mũthamaki hamwe na ndungata cia mwathi wake ciothe, na ndaigana gũikũrũka gwake mũciĩ.

¹⁰Na rĩrĩ, hĩndĩ ĩrĩa Daudi aaheirũo ũhoro ũcio, atĩ Uria ndanaikũrũka gwake mũciĩ-rĩ, Daudi agĩkĩũria Uria atĩrĩ, Githĩ ndũkiumĩte rũgendo-inĩ? Nĩ kĩ gĩkĩgirĩtie ũikũrũke gwaku mũciĩ?

¹¹Nake Uria agĩkĩĩra Daudi atĩrĩ, Ithandũkũ rĩa Ngai, o na Isiraeli na Juda, maikarĩte ithũn��-inĩ, o nake Joabu, mwathi wakwa, o na ndungata cia mwathi wakwa, maikarĩte kĩraaro-inĩ kĩao kũu werũ-inĩ; kuona nĩ ũguo-rĩ, kaĩ niĩ ngũgĩthiĩ gwakwa mũciĩ, ngarĩe na nganyue, o na nyonane na mũka wakwa atĩa? O ta ũrĩa wee ũtũũraga muoyo, o na ta ũrĩa ngoro yaku ĩtũũraga muoyo-rĩ, ndingĩĩka ũndũ ũcio.

¹²Ningĩ Daudi agĩkĩĩra Uria atĩrĩ, O naguo ũmũthĩ gĩikare haha, na rũciũ ndoke gũkũreka wĩthiĩre. Tondũ ũcio Uria agĩgĩikara Jerusalemu mũthenya ũcio, o na mũthenya ũyũ ũngĩ wa ĩĩrĩ.

¹³Na hĩndĩ ĩrĩa Daudi aamwĩtire, nĩaarĩire, o na akĩnyua arĩ harĩ we; nake Daudi agĩgĩtũma arĩwo nĩ njohi; na hwaĩ-inĩ akiuma kũu agĩthiĩ gũkoma gĩtandainĩ gĩake me na ndungata cia mwathi wake; no rĩrĩ, ndaaikũrũkire gwake mũciĩ.

¹⁴Na gũgĩkinya atĩrĩ, atĩ rũcinĩ Daudi akĩroka kwandĩka marũa akĩmatwarithĩria Joabu na guoko kwa Uria.

¹⁵Agĩkĩandĩka marũa macio akiuga atĩrĩ, Twara Uria handũ ha mbere mũno, harĩa mbaara ĩĩhĩte mũno, nawe na andũ arĩa angĩ mũhũndũke na thutha mũmũtigĩrĩre agũthwo oragwo.

¹⁶Gũgĩgĩkinya atĩrĩ, atĩ hĩndĩ ĩrĩa Joabu aarangagĩra itũũra rĩu, akĩiga Uria handũ harĩa aamenyete atĩ nĩho njamba irĩ.

¹⁷Nao andũ a itũũra rĩu makiumagara, makĩhũrana na Joabu; na andũ amwe thĩinĩ wa ndungata cia Daudi makĩũragwo; o nake Uria ũcio Mũhiti agĩgĩkua.

¹⁸Hĩndĩ ĩo Joabu akĩrekia mũndũ akahe Daudi ũhoro wothe wa maũndũ marĩa mekĩkĩte mbaara-inĩ ĩo;

¹⁹nake agĩgĩatha mũndũ ũcio aareketie, akĩmwĩra atĩrĩ, Warĩkia kũhe mũthamaki ũhoro wothe wa maũndũ marĩa mekĩkĩte ita-inĩ-rĩ,

²⁰nĩgũgakinya atĩrĩ, atĩ mũthamaki angĩkarakara, nake acoke akũũrie atĩrĩ, Nĩ kĩ gĩatũmire mũkuhĩhĩrie itũũra rĩu ũguo, mũhũrane narĩo? Kaĩ mũtaamenyete atĩ nĩmekũrathana na mĩguĩ me rũthingo-inĩ rũa itũũra igũrũ?

²¹Tene-rĩ, mũndũ ũrĩa wagũthire Abimeleku wa Jerub-beshethu, akĩmũũraga-rĩ, nĩ ũrĩkũ? Githĩ ti mũndũ-wa-nja wamũikĩirie thĩo, ĩkĩmũgũĩra yumĩte rũthingo igũrũ, nake agĩgĩkuĩra kũu Thebezu? Hĩ! Nĩ kĩ gĩagĩtũmire mũkuhĩhĩrie rũthingo ũguo? Ũgĩcoke uuge atĩrĩ, O nayo ndungata yaku, Uria, ũrĩa Mũhiti, nĩĩkuĩte.

²²Tondũ ũcio mũrekio ũcio agĩthiĩ, agĩkinya he Daudi, akĩmũhe ũhoro wa maũndũ mothe macio maatũmĩte Joabu amũrekie.

²³Nake mũndũ ũcio wareketio akĩĩra Daudi atĩrĩ, Andũ a itũũra rĩu nĩ hinya maatũkĩririe, nao makiumagara magĩũka magĩtũkora o kũu werũ-inĩ, na ithuĩ tũgĩkĩmatindĩka na thutha tũkĩmakinyia o itonyero-inĩ rĩa kĩhingo.

²⁴Nao andũ arĩa maarathanaga na mĩguĩ me rũthingo-inĩ igũrũ magĩikia ndungata ciaku mĩguĩ; nacio ndungata imwe ciaku, mũthamaki ũyũ, nĩĩkuĩte, o nayo ndungata yaku ĩrĩa ĩĩtagwo Uria nĩĩkuĩte.

²⁵Hĩndĩ ĩo Daudi agĩkĩĩra mũndũ ũcio wareketio atĩrĩ, Ũhoro ũrĩa ũkahe Joabu nĩ ũyũ: Atĩrĩrĩ, ũndũ ũcio nĩũtige gũkũiguithia ũũru, nĩ gũkorũo rũhiũ rũninaga mũndũ ũmwe o ta ũrĩa ũngĩ; gũtirĩ ũndũ; mbaara-inĩ ĩo mũrĩ nayo na itũũra rĩu-rĩ, rũmanĩriai kũmĩĩkĩra hinya, nĩguo mũrĩanange biũ. Wee ũkĩũmĩrĩrie Joabu na ciugo icio.

²⁶Na rĩrĩ, mũka wa Uria aaigua atĩ Uria, mũthuriwe, nĩ mũkuũ-rĩ, akĩmũrĩrĩra.

²⁷Na rĩrĩ, kĩrĩro gĩatuĩka, Daudi akĩrekia mũndũ agĩre mũndũ-wa-nja ũcio, agĩkĩmũinũkia gwake mũciĩ, nake agĩtuĩka mũka, akĩmũciarĩra kahĩĩ. No ũndũ ũcio Daudi ekĩte nĩwarakaririe Jehova.