2 Samuel 12

¹Nake Jehova agĩkĩrekia Nathani he Daudi. Nake agĩgĩthiĩ agĩkinya harĩ we akĩmwĩra atĩrĩ, Itũũra-inĩ rĩmwe nĩkwarĩ andũ erĩ; nao ũmwe aarĩ gĩtonga, nake ũrĩa ũngĩ aarĩ mũkĩa.

²Mũndũ ũcio wakĩrĩ gĩtonga-rĩ, aarĩ na ndũru nyingĩ mũno cia mbũri, o na ng’ombe;

³no mũndũ ũcio mũkĩa ndaarĩ na kĩndũ o na kĩ, tiga o kamwatĩ kamwe kanini karĩa aagũrĩte agakarera; nako gaakũrĩire o kũu gwake hamwe na ciana ciake; nako kaarĩaga kĩenyũ gĩake we mwene kĩa irio, o na gakanyuagĩra gĩkombe gĩake, o na ningĩ gaakomaga gĩthũri-inĩ gĩake, nako gaatuĩkĩte o ta mwarĩ.

⁴Nakĩo gĩtonga kĩu gĩgĩkorũo nĩ mũndũ wathiaga ũgeni, nakĩo gĩgĩcaĩra ũhiũ wakĩo wa mbũri o na wa ng’ombe nĩguo gĩthĩnjĩre mũgendi ũcio wakinyĩte gwakĩo mũciĩ; gĩgĩkĩnyita kamwatĩ ka mũndũ ũcio warĩ mũkĩa, gĩgĩthĩnjĩra mũgendi ũcio wakinyĩte gwakĩo mũciĩ.

⁵Nake Daudi agĩgĩcinwo nĩ marakara manene nĩ ũndũ wa mũndũ ũcio, nake akĩĩra Nathani atĩrĩ, O ta ũrĩa Jehova atũũraga muoyo-rĩ, mũndũ ũrĩa wĩkĩte ũguo aagĩrĩirũo no gũkua;

⁶nĩakarĩha kamwatĩ kau maita mana nĩ ũndũ wa ũndũ ũcio ekĩte, o na ũndũ wa ũrĩa aagĩte kũiguanĩra tha.

⁷Nake Nathani agĩkĩĩra Daudi atĩrĩ, Wee nĩwe mũndũ ũcio. Na atĩrĩrĩ, Jehova, o we ũrĩa Ngai wa Isiraeli, oiga ũũ: Atĩrĩrĩ, nĩ niĩ ndagũitĩrĩirie maguta ũtuĩke mũthamaki wa gũthamakĩra Isiraeli, na ngĩkũhonokia ngĩkũruta guoko-inĩ gwa Saulu,

⁸na ngĩkũhe nyũmba ya mwathi waku, o nao atumia a mwathi waku ngĩkũhe maikare gĩthũri-inĩ gĩaku, o na ngĩkũhe nyũmba ya Isiraeli, o na ya Juda; o na ningĩ atĩrĩ, maũndũ macio mangĩakorũo me manyinyi makaaga gũkũigana-rĩ, nĩingĩakuongerera maũndũ mangĩ mana na mana.

⁹Rĩu-rĩ, nĩ kĩ gĩgĩtũmĩte ũmene ũhoro wa Jehova, ũgeka ũndũ ũrĩa onaga wĩ mũũru? Ũtemengithĩtie Uria ũrĩa Mũhiti na rũhiũ rũa njora, na ũgathiĩ na mũka nĩguo atuĩke mũkaguo, ũgakĩmũũragithia na rũhiũ rũa njora rũa ciana cia Amoni.

¹⁰Rĩu-rĩ, tondũ wa ũhoro ũcio rũhiũ rũa mbaara rũtigacoka gũthenga thĩinĩ wa nyũmba yaku o na rĩ, nĩ ũndũ nĩũ’menete, na ũgathiĩ na mũka wa Uria, ũrĩa Mũhiti, atuĩke mũkaguo.

¹¹Ningĩ Jehova oiga ũũ: Atĩrĩrĩ, ngakũrehithĩrie ũũru ũgũkore uumĩte o thĩinĩ wa nyũmba yaku wee mwene, o nao atumia aku ngagũtunya ũkĩĩonagĩra na maitho maku, ndĩmahe mũndũ ũngĩ, nake nĩagakoma na atumia acio aku mũthenya barigici.

¹²Nĩ ũndũ-rĩ, wee wekire ũndũ ũcio na hitho; no rĩrĩ, niĩ ngeka ũndũ ũcio ũngĩ ũkĩonagwo nĩ Aisiraeli othe, o mũthenya barigici.

¹³Nake Daudi agĩkĩĩra Nathani atĩrĩ, Nĩnjĩhĩtie Jehova. Nathani agĩkĩĩra Daudi atĩrĩ, o nake Jehova nĩakwehereirie wĩhia ũcio waku, na ndũkua.

¹⁴No rĩrĩ, tondũ wa ũrĩa ũtũmĩte thũ cia Jehova cione ũndũ wa gũtũma imũrume nĩ ũndũ wa ũndũ ũcio wĩkĩte-rĩ, no mũhaka kaana kau gaciarĩtwo gagakua.

¹⁵Nake Nathani agĩcoka agĩĩthiĩra, akĩinũka gwake mũciĩ. Nake Jehova agĩgĩtũma kaana kau mũka wa Uria aaciarĩire Daudi karũare mũno.

¹⁶Na tondũ ũcio Daudi agĩgĩthaitha Ngai mũno nĩ ũndũ wa kaana kau; agĩkĩĩhinga kũrĩa irio, agĩtonya nyũmba, akĩraara akomete thĩ ũtukũ ũcio wothe.

¹⁷Nao athuri a gwake mũciĩ magĩũkĩra, makĩmũrũgama mwena-inĩ nĩ getha mamũrũgamie na igũrũ; no nĩaaregire gũũkĩra, o na ndaigana kũrĩanĩra irio nao.

¹⁸Na gũgĩkinya atĩrĩ, atĩ mũthenya wa kũhingia matukũ mũgwanja wakinya-rĩ, kaana kau gagĩkua. Nacio ndungata cia Daudi igĩĩtigĩra kũmwĩra atĩ kaana nĩgakuĩte; nĩ ũndũ cioigire ũũ: Atĩrĩrĩ, hĩndĩ ĩrĩa kaana kararĩ muoyo, nĩtũraaragia nake, na ndaigue mĩgambo iitũ; rĩu hihi ekwĩgera ngero ĩrĩkũ, twamwĩra atĩ kaana nĩgakuĩte?

¹⁹No rĩrĩ, hĩndĩ ĩrĩa Daudi onire atĩ ndungata ciake nĩiraheehana, akĩmenya atĩ kaana nĩgakuĩte agĩkĩũria ndungata ciake atĩrĩ, Anga kaana nĩgakuĩte? Nao makiuga atĩrĩ, Ĩĩ, nĩgakuĩte.

²⁰Hĩndĩ ĩo Daudi agĩgĩũkĩra, agĩĩthamba o na akĩĩhaka maguta, akĩgarũrĩra nguo ciake, agĩtonya nyũmba ya Jehova, akĩinamĩrĩra akĩhoya; thutha wa ũguo agĩcoka gwake mũciĩ; na etia irio-rĩ, andũ ake magĩciiga mbere yake, nake agĩkĩrĩa.

²¹Hĩndĩ ĩo ndungata ciake igĩkĩmũũria atĩrĩ, Ĩ ũndũ ũyũ weka nĩ ũrĩkũ? Hĩndĩ ĩrĩa kaana kararĩ muoyo-rĩ, nĩguo ũrehingĩte kũrĩa irio, na ũgakarĩrĩra; no rĩrĩa gaakua nĩ gũũkĩra wokĩra warĩa irio.

²²Nake akiuga atĩrĩ, Hĩndĩ ĩo kaana kararĩ muoyo, nĩndĩrehingĩte kũrĩa irio, na ngakarĩrĩra, nĩ ũndũ ndĩroigaga atĩrĩ, Nũ ũũĩ kana hihi Jehova nĩekũnjiguĩra tha nĩguo kaana gakwa gatũũre muoyo?

²³No rĩrĩ, rĩu kuona atĩ nĩgagĩkuĩte-rĩ, kaĩ ngũgĩtũũra ndĩĩhingĩte kũrĩa irio nĩ ũndũ kĩ? Ndakĩhota gũkariũkia? Niĩ nĩngathiĩ kũrĩ ko, no ko gatigacoka kũrĩ niĩ.

²⁴Nake Daudi akĩhoreria mũka, Bathi-sheba, agĩcoka agĩtonya gwake, akĩonana nake; nake agĩgĩciara kahĩĩ, agĩgeta Suleimani. Nake Jehova agĩkenda,

²⁵agĩgĩtwarithia ũhoro wako na Nathani ũrĩa mũnabii; nake Nathani agĩgatua Jedidia, nĩ ũndũ wa Jehova.

²⁶Na rĩrĩ, Joabu akĩhũrana na Raba, itũũra rĩa ciana cia Amoni, nake agĩgĩtunyana itũũra rĩrĩa rĩa ũthamaki.

²⁷Nake Joabu agĩkĩrekeria Daudi andũ akiuga atĩrĩ, Nĩ’hũranĩte na Raba, o na ngatunyana itũũra rĩa maĩ ngarĩĩgwatĩra.

²⁸Na tondũ ũcio rĩu cokanĩrĩria andũ arĩa angĩ mũkaambe hema cianyu mũhũrane na itũũra rĩrĩ, mũrĩtunyane; nĩ getha ndigatunyane itũũra rĩrĩ niĩ mwene, narĩo hihi rĩcoke gwĩtanio na niĩ.

²⁹Daudi agĩgĩcokanĩrĩria andũ othe hamwe, nao magĩthiĩ Raba, makĩhũrana narĩo, makĩrĩtunyana.

³⁰O na ningĩ mũthamaki wao akĩmũruta tanji mũtwe; naguo ũritũ wayo warĩ wa taranda ĩmwe ya thahabu ĩgĩthimwo; na nĩyathecereirũo tũhiga twa goro; nayo ĩgĩgĩĩkĩrũo Daudi mũtwe. Nacio indo cia itũũra rĩu iria ciatahĩtwo agĩciumagaria; na ciarĩ nyingĩ mũno igakĩrĩrĩria.

³¹O nao andũ arĩa maarĩ kuo thĩinĩ akĩmoimagaria, akĩmatua arengi mĩtĩ na mĩthumeno, o na aruti wĩra na harũ o na mathanwa ma igera, o na aruti wĩra icua-inĩ rĩa mwaki wa gũcina matubarĩ; naguo ũguo noguo ekire matũũra mothe ma ciana cia Amoni. Nake Daudi, hamwe na andũ ake othe, magĩgĩcoka Jerusalemu.