2 Samuel 14

¹Na rĩrĩ, Joabu wa Zeruia akĩona atĩ mũthamaki nĩaroretie ngoro yake mũno he Abisalomu.

²Nake Joabu akĩrekania itũũra rĩa Tekoa, akĩgĩrithia mũndũ-wa-nja mũũgĩ kuo, akĩmwĩra atĩrĩ, Ndagũthaitha wĩke maũndũ wĩtuĩte ta wĩ na kĩrĩro, na wĩhumbe nguo iria ciĩhumbagwo nĩ mũndũ-wa-nja wĩ na maithori, na ndũkehake maguta; no wĩtue ta mũndũ-wa-nja ũtũũrĩte hĩndĩ ndaya na maithori, akĩrĩrĩra mũndũ ũkuĩte;

³ũcoke ũtonye he mũthamaki, warie nake ũmwĩre ũna na ũna. Nake Joabu agĩkĩmũtaara akĩmwĩra ndeto ciothe iria arĩaria.

⁴Na rĩrĩ, hĩndĩ ĩrĩa mũndũ-wa-nja ũcio wa Tekoa aaririe na mũthamaki-rĩ, nĩ kwĩgũithia egũithirie agĩturumithia ũthiũ thĩ, akĩmwĩnyihĩria, akiuga ũũ: Mũthamaki ũyũ, ndeithia.

⁵Nake mũthamaki akĩmũũria atĩrĩ, Kaĩ wĩ na kĩeha gĩa kĩ? Nake agĩgĩcokia atĩrĩ, Ti-itherũ ndĩ mũndũ-wa-nja wa ndigwa, na mũthuri wakwa nĩakuĩte.

⁶Na niĩ ndungata yaku ya mũndũ-wa-nja ndĩrarĩ na ariũ erĩ, nao marogitanĩra gĩthaka-inĩ, na harakĩaga mũndũ wa kũmateithũrana; na rĩrĩ, ũmwe aragũtha ũrĩa ũngĩ, aramũũraga.

⁷Na atĩrĩrĩ, andũ othe a nyũmba iitũ nĩmaarahũkĩte manjũkĩrĩre, niĩ, ndungata yaku ya mũndũ-wa-nja, magakiuga atĩrĩ, Neana mũndũ ũcio ũũragĩte mũrũ wa nyina tũmũũrage, nĩ ũndũ nĩarutĩte mũrũ wa nyina muoyo, nĩguo o nake ũcio mũgai tũmũnine. Nao mangĩgĩĩka ũguo-rĩ, nĩ ta maahoria ikara rĩakwa rĩrĩa rĩtigarĩte, o nake mũthuri wakwa matimũtigĩria rĩĩtwa, o na kana mbeũ, gũkũ thĩ guothe.

⁸Nake mũthamaki agĩkĩĩra mũndũ-wa-nja ũcio atĩrĩ, Wĩinũkĩre gwaku mũciĩ, na nĩngwathana ũhoro-inĩ waku njuge ũrĩa gũgwĩkwo.

⁹Nake mũndũ-wa-nja ũcio wa Tekoa agĩcoka akĩĩra mũthamaki atĩrĩ, Mũthamaki ũyũ, mwathi wakwa, ũũru ũcio ũronjokerera niĩ mwene, o na nyũmba ya baba; nawe wee mwene, mũthamaki ũyũ, o na gĩtĩ gĩaku gĩa ũthamaki, ũroaga gũcokererũo nĩ ũũru o na ũrĩkũ.

¹⁰Nake mũthamaki akiuga atĩrĩ, Mũndũ ũrĩa wothe ũrĩkwĩra kaũndũ-rĩ, mũrehe harĩ niĩ, na ndagacoka gũkũhutia rĩngĩ o na atĩa.

¹¹Mũtumia ũcio agĩcokia atĩrĩ, Jehova Ngai waku aroririkanwo nĩwe, wee mũthamaki ũyũ, ndagũthaitha, nĩguo wathane atĩ mwĩrĩhĩria wa thakame ĩo ĩitĩtwo ndagacoke kũũragana o na atĩa nĩ getha matikorage mũrũ wakwa. Nake mũthamaki agĩkiuga atĩrĩ, O ta ũrĩa Jehova atũũraga muoyo-rĩ, hatirĩ rũcuĩrĩ o na rũmwe rũa mwana waku rũngĩgũa thĩ.

¹²Nake mũndũ-wa-nja ũcio agĩkiuga atĩrĩ, Ndagũthaitha, niĩ ndungata yaku ya mũndũ-wa-nja, ũnjĩtĩkĩrie ngwĩre kiugo kĩmwe, wee mũthamaki ũyũ, mwathi wakwa. Nake mũthamaki akiuga atĩrĩ, No kiuge.

¹³Mũndũ-wa-nja ũcio agĩkiuga atĩrĩ, Nĩ kĩ gĩtũmĩte ũcirĩre atĩ andũ a Ngai mekwo ũndũ ta ũcio? Tondũ-rĩ, ũkĩaria ũhoro ũcio nĩ ta kuonania atĩ wee mũthamaki nĩũtuĩkĩte o ta mũndũ mwĩhia, kuona atĩ wee, mũthamaki ũyũ, nĩũregete kũgĩrithia mũndũ waku ũrĩa ũingatĩtwo, ũmũcokie mũciĩ.

¹⁴Nĩ ũndũ ithuĩ no mũhaka tũkuage, na tũtariĩ o ta maĩ maitĩku thĩ, marĩa matangĩcokerereka; ningĩ Ngai ndarutaga mũndũ muoyo; no rĩrĩ, ũndũ ũrĩa aciragĩra nĩ atĩ mũndũ ũrĩa ũingatĩtwo ndagaikare ta ateetwo biũ, agathengio harĩ we.

¹⁵Na rĩu, mũthamaki ũyũ, mwathi wakwa-rĩ, ũndũ ũrĩa ũtũmĩte njũke njarie ũhoro ũcio nawe nĩ atĩ andũ acio aitũ nĩmanjĩkĩrĩte guoya; o na niĩ, ndungata yaku ya mũndũ-wa-nja, ngoiga atĩrĩ, Rĩu nĩngwaria na mũthamaki witũ; no gũkorũo hihi nĩekũnjĩka ũndũ ũrĩa niĩ, ndungata yake, nyendete.

¹⁶Nĩ ũndũ mũthamaki nĩekũnjigua, a’honokie niĩ ndungata yake, andute guoko-inĩ kwa mũndũ ũrĩa ũkwenda gũtũnina, twĩ na mũrũ wakwa, atweherie ũgai-inĩ wa Ngai.

¹⁷Tondũ ũcio niĩ, ndungata yaku ya mũndũ-wa-nja, ngĩkiuga atĩrĩ, Ũhoro waku, wee mwathi wakwa mũthamaki, ũrotuĩka wa kũ’horeria; nĩ gũkorũo o ta ũrĩa mũraika wa Ngai atariĩ, ũguo noguo mwathi wakwa mũthamaki atariĩ, ũhoro-inĩ wa gũkũũrana wega na ũũru; nake Jehova Ngai waku aroikara hamwe nawe.

¹⁸Hĩndĩ ĩo mũthamaki agĩgĩcokia akĩĩra mũndũ-wa-nja ũcio atĩrĩ, Ndagũthaitha ndũka’hithe ũndũ o na ũmwe ũrĩa ndĩrĩkũũria. Nake mũndũ-wa-nja ũcio akiuga atĩrĩ, Ta kĩarie, wee mũthamaki ũyũ, mwathi wakwa.

¹⁹Mũthamaki agĩkĩmũũria atĩrĩ, Mwĩ ndundu na Joabu hihi ũhoro-inĩ ũcio wothe? Nake mũndũ-wa-nja ũcio agĩcokia akiuga atĩrĩ, O ta ũrĩa wee ũtũũraga muoyo, mũthamaki ũyũ mwathi wakwa-rĩ, ti-itherũ gũtirĩ mũndũ o na ũrĩkũ ũngĩhota gũkararia ũhoro ũcio warĩtio nĩwe mũthamaki witũ, wee mwathi wakwa, oige tiguo, aũrorie na mwena wa ũrĩo, o na kana wa ũmotho; nĩ ũndũ ndungata yaku Joabu, nĩyo ĩnjathĩte niĩ, ndungata yaku ya mũndũ-wa-nja, ĩkanjira ndeto ciothe icio ndaaria.

²⁰Nake Joabu, ndungata yaku, nĩwe wĩkĩte ũndũ ũcio, akĩenda kũgarũra ũrĩa ũhoro ũcio ũtariĩ; nawe mwathi wakwa wĩ mũũgĩ o ta mũraika wa Ngai, ũhoro-inĩ wa kũmenya ũrĩa maũndũ mothe marĩa me gũkũ thĩ matariĩ.

²¹Nake mũthamaki agĩkĩĩra Joabu ũũ: Atĩrĩrĩ, ũndũ ũcio nĩndawĩtĩkĩra; na tondũ ũcio gĩthiĩ ũgĩre mwanake ũcio, ti Abisalomu, ũmũcokie gũkũ.

²²Nake Joabu agĩkĩĩgũithia agĩturumithia ũthiũ thĩ, akĩĩnyihĩria mũthamaki, ningĩ Joabu akiuga atĩrĩ, Mũthamaki ũyũ, mwathi wakwa, ũmũthĩ niĩ ndungata yaku nĩndamenya atĩ nĩnjĩtĩkĩrĩkĩte nĩwe, nĩ ũndũ wee, mũthamaki ũyũ, nĩwĩkĩte ũndũ ũcio niĩ, ndungata yaku, ngũũrĩtie.

²³Tondũ ũcio Joabu agĩk��arahũka agĩthiĩ Geshuru, agĩcokia Abisalomu Jerusalemu.

²⁴Nake mũthamaki agĩkiuga atĩrĩ, Reke athiĩ na gwake mũciĩ, no ndakarekwo anyone ũthiũ. Tondũ ũcio Abisalomu agĩgĩthiĩ na gwake mũciĩ, no ndaigana kuona ũthiũ wa mũthamaki.

²⁵No rĩrĩ, Isiraeli guothe gũtiarĩ mũndũ ũngĩ o na ũmwe waganagwo gũthakara ta Abisalomu; kuuma o ikinya-inĩ rĩa kũgũrũ gwake o nginya rũcuĩrĩ-inĩ rũa mũtwe-rĩ, hatirĩ handũ o na hamwe haarĩ ũcuke.

²⁶Na rĩrĩ, hĩndĩ ĩrĩa enjagwo mũtwe, (na enjagwo o mwaka mũgima wathira, nĩ gũkorũo njuĩrĩ yake nĩyakoragwo ĩmũritũhĩire mũno, na ũndũ ũcio nĩguo watũmaga amĩenje-rĩ,) njuĩrĩ ĩo ya mũtwe wake ĩgagĩthimwo, ĩkonwo ĩrĩ ya cekeri magana merĩ o ta ũrĩa ratiri cia mũthamaki ciaiganaga.

²⁷Nake Abisalomu agĩciarĩrũo ihĩĩ ithatũ, na mũirĩtu ũmwe wetagwo Tamaru, na aarĩ mũndũ-wa-nja mũthaka mũno gĩthiithi.

²⁸Nake Abisalomu agĩgĩikara kũu Jerusalemu mĩaka ĩĩrĩ mĩgima atekuona ũthiũ wa mũthamaki.

²⁹Thutha ũcio Abisalomu agĩkĩrekania Joabu agetwo, nĩguo amũtũme he mũthamaki, no Joabu ndaigana gũthiĩ harĩ we; ningĩ akĩrekania ihinda rĩa kerĩ, no ndaigana gwĩtĩkĩra gũthiĩ.

³⁰Na tondũ ũcio agĩkĩĩra ndungata ciake atĩrĩ, Mũtikuona atĩ mũgũnda wa Joabu wĩ hakuhĩ na wakwa, na arĩ na cairi kuo; thiĩi mũkamĩikie mwaki, ĩhĩe. Nacio ndungata cia Abisalomu ĩgĩgĩikia mũgũnda ũcio mwaki.

³¹Hĩndĩ ĩo Joabu agĩgĩũkĩra, agĩthiĩ he Abisalomu o gwake mũciĩ, akĩmũũria atĩrĩ, Nĩ kĩ gĩtũmĩte ndungata ciaku ciikie mũgũnda wakwa mwaki?

³²Nake Abisalomu agĩcokeria Joabu, akĩmwĩra ũũ: Atĩrĩrĩ, nĩ andũ ndakũrekeirie, ngiuga atĩrĩ, Ũka gũkũ, nĩ getha ngũtũme he mũthamaki, ũkorie atĩrĩ, Nĩ kĩ gĩatũmire nyume Geshuru? Nĩ kaba ingĩtũire kuo o na rĩu; na tondũ ũcio reke nyone ũthiũ waku, wee mũthamaki ũyũ; na hangĩkorũo nĩharĩ ũũru o na ũrĩkũ ndĩ naguo, ũnjũrage.

³³Tondũ ũcio Joabu agĩgĩthiĩ he mũthamaki, akĩmũhe ũhoro ũcio; nake mũthamaki eta Abisalomu-rĩ, Abisalomu agĩthiĩ harĩ we, akĩinamĩrĩra aturumithĩtie ũthiũ thĩ e mbere ya mũthamaki; nake mũthamaki akĩmũmumunya.