2 Samuel 15

¹Na gũgĩkinya atĩrĩ, atĩ thutha wa maũndũ macio, Abisalomu agĩĩthondekithĩria ngari ya ita, o na mbarathi, o na akĩgĩa na andũ mĩrongo ĩtano a gũthiaga mbere yake mateng’erete.

²Nake Abisalomu akarokaga gũũkĩra rũcinĩ tene, akarũgama mũkĩra-inĩ wa njĩra, o kũu kĩhingo-inĩ; na gũgĩtuĩka atĩrĩrĩ, atĩ hĩndĩ ĩrĩa mũndũ o na ũrĩkũ aagĩa na cira wa gũcirũo nĩ mũthamaki-rĩ, Abisalomu agakĩmwĩta, akamũũria atĩrĩ, Wĩ wa itũũra rĩrĩkũ? Nake akoiga atĩrĩ, Niĩ ndungata yaku ndĩ wa mũhĩrĩga mũna wa mĩhĩrĩga ya Isiraeli.

³Nake Abisalomu agakĩmwĩra atĩrĩ, Ti-itherũ ũhoro waku, ũcio ũrehete, nĩ mwega, o na wĩ kĩhooto; no rĩrĩ, hatirĩ mũndũ ũthurĩtwo nĩ mũthamaki wa gũthikĩrĩria ũrĩa ũkuuga.

⁴O na ningĩ Abisalomu akoigaga ũũ: Atĩrĩrĩ, na arĩ korũo ndatuwo mũciri wa bũrũri ũyũ, nĩ getha mũndũ o wothe ũrĩa wĩ na cira, o na kana ũndũ o na ũrĩkũ ekwenda ũthondekwo, okage harĩ niĩ, na niĩ ngamũcirĩra na kĩhooto!

⁵Na gũgĩtuĩka atĩrĩ, atĩ o hĩndĩ ĩrĩa mũndũ o na ũrĩkũ aamũkuhĩhĩria amũinamĩrĩre amwĩnyihĩrie-rĩ, Abisalomu agatambũrũkia guoko, akamũnyita, akamũmumunya.

⁶Ũguo nĩguo Abisalomu aagĩĩkaga andũ othe a Isiraeli arĩa maathiaga harĩ mũthamaki gũtuithanio macira mao; na tondũ ũcio akĩgucĩrĩria ngoro cia andũ a Isiraeli irore harĩ we.

⁷Na gũgĩgĩkinya atĩrĩ, atĩ mĩaka ĩna yathira, Abisalomu akĩĩra mũthamaki atĩrĩ, Ndagũthaitha ũreke ’thiĩ Hebironi ngahingĩrie Jehova mwĩhĩtwa ũrĩa ndehĩtire.

⁸Nĩ gũkorũo niĩ ndungata yaku nĩndehĩtire mwĩhĩtwa hĩndĩ ĩrĩa ndatũire Geshuru, o kũu Suriata, ngiuga atĩrĩ, Ti-itherũ Jehova angĩkanjokia Jerusalemu, nĩngatungatĩra Jehova.

⁹Nake mũthamaki agĩkĩmwĩra atĩrĩ, Thiĩ na ũhoreri. Tondũ ũcio agĩkĩarahũka agĩthiĩ agĩkinya Hebironi.

¹⁰No rĩrĩ, Abisalomu akĩrekia athigani mahurunjũkĩre mĩhĩrĩga-inĩ yothe ya Isiraeli, moige atĩrĩ, O hĩndĩ ĩrĩa mũkaigua coro wahuhwo-rĩ, nĩmũkaanĩrĩra muuge atĩrĩ, Abisalomu nĩwe ũtuĩkĩte mũthamaki kũu Hebironi.

¹¹Nake Abisalomu agĩgĩthiĩ na andũ magana merĩ arĩa etire, moimĩte Jerusalemu, nao magĩthiĩ o ro ũguo matekũmenya atĩ nĩ ũũru mareka; na gũtirĩ ũndũ o na ũmwe wa ũhoro ũcio maamenyaga.

¹²Nake Abisalomu, hĩndĩ ĩrĩa aarutaga magongona make, akĩrekania atĩ Ahithofeli, Mũgiloni ũrĩa waheaga Daudi kĩrĩra, agetwo oime itũũra rĩao, narĩo nĩrĩo Gilo. Nayo ndundu ya gũũkĩrĩra mũthamaki ĩgĩkĩgĩa na hinya, nĩ ũndũ andũ a mwena wa Abisalomu nĩmaakĩrĩrĩirie kũingĩha o kũingĩha mũno.

¹³Na rĩrĩ, hagĩgĩthiĩ mũndũ agĩkinya he Daudi, akĩmũhe ũhoro, akiuga atĩrĩ, Ngoro cia andũ a Isiraeli ciendete kũrũmĩrĩra Abisalomu.

¹⁴Nake Daudi agĩkĩĩra ndungata ciake ciothe iria aarĩ nacio kũu Jerusalemu atĩrĩ, Ũkĩrai twĩyũrĩre, nĩ ũndũ hihi hatirĩ mũndũ o na ũmwe witũ ũrĩhonoka kũũragwo nĩ Abisalomu; wĩhĩkei mũno twĩthiĩre, nĩ getha ndagatũkorerere na kĩguũ, atũreherere ũũru na ahũre itũũra rĩrĩ na hiũ cia njora.

¹⁵Nacio ndungata cia mũthamaki igĩkĩmwĩra ũũ: Atĩrĩrĩ, ithuĩ ndungata ciaku nĩtwĩhaarĩirie gwĩka ũndũ o wothe ũrĩa wee, mũthamaki ũyũ, mwathi witũ, ũgũthura wĩkwo.

¹⁶Mũthamaki agĩkiumagara, arũmĩrĩirũo nĩ andũ othe a nyũmba yake. Nake mũthamaki agĩtiga aka ikũmi mũciĩ, arĩa maarĩ thuriya ciake, nĩguo maikaragie mũciĩ.

¹⁷Mũthamaki agĩkiumagara, arũmĩrĩirũo nĩ andũ ake othe; nao makĩrũgamanga Bethi-merahaka.

¹⁸Nacio ndungata ciake ciothe igĩkĩmũhĩtũka ikĩmũthiĩ mbere, o na Akerethi othe, o na Apelethi othe, o na Agiti othe, andũ magana matandatũ arĩa maamũrũmĩrĩire moimĩte Gathu, othe makĩhĩtũka magĩthiĩ mbere ya mũthamaki.

¹⁹Hĩndĩ ĩo mũthamaki agĩkĩĩra Itai, ũrĩa Mũgiti, atĩrĩ, Wee nawe nĩ kĩ gĩtũmĩte ũtwarane na ithuĩ? Ta hũndũka ũgaikare na mũthamaki; nĩ ũndũ wee wĩ mũgeni, na wĩ mũndũ ũingatĩtwo bũrũri wanyu; coka handũ haku harĩa ũroimire.

²⁰Kuona atĩ kũhaana ta arĩ o ira ũragĩũkire-rĩ, kaĩ ingĩgĩkũreka ũthiĩ o ro ũmũthĩ ũkorũre hamwe na ithuĩ, ngĩthiaga o handũ harĩa ndĩrĩhota? Hũndũka, na woe ariũ a thoguo mũhũndũke nao; namo mohoro ma kũiguanĩra tha o na ma ma maroikara hamwe nawe.

²¹Nake Itai agĩcokeria mũthamaki akiuga atĩrĩ, O ta ũrĩa Jehova atũũraga muoyo, o na ta ũrĩa wee, mũthamaki ũyũ, mwathi wakwa, ũtũũraga muoyo-rĩ, nguuga atĩrĩ, atĩ ti-itherũ o harĩa wee, mũthamaki ũyũ, mwathi wakwa, ũgakorũo ũrĩ, o na hangĩgakorũo nĩ gĩkuũ-inĩ kana muoyo-inĩ-rĩ, hau noho niĩ o na niĩ, ndungata yaku, ngakorũo ndĩ.

²²Nake Daudi agĩkĩĩra Itai atĩrĩ, Gĩthiĩ ũringe mũrĩmo. Nake Itai, ũcio Mũgiti, agĩkĩringa mũrĩmo, o na andũ ake othe, o na twana tuothe tũrĩa aarĩ natuo tũnini

²³Nao andũ othe a bũrũri ũcio makĩringa mũrĩmo makĩrĩraga na mũgambo mũnene; o nake mũthamaki we mwene akĩringa mũrĩmo ũrĩa wa karũũĩ ga Kidironi, o nao andũ othe makĩringa mũrĩmo ũcio, magĩgĩthiĩ marorete na njĩra ya werũ.

²⁴Na atĩrĩrĩ, Zadoku nake, me hamwe na Alawii othe, magĩtwarana nake, makuuĩte ithandũkũ rĩa kĩrĩkanĩro kĩa Ngai; narĩo ithandũkũ rĩu rĩa Ngai makĩrĩiga thĩ, nake Abiatharu akĩrũgama handũ igũrũ, o nginya hĩndĩ ĩrĩa andũ othe maarĩkirie kuuma itũũra rĩu.

²⁵Nake mũthamaki agĩkĩĩra Zadoku atĩrĩ, Oyai ithandũkũ rĩrĩ rĩa Ngai, mũrĩcokie itũũra-inĩ; tondũ-rĩ, ingĩkorũo nĩngwĩtĩkĩrĩka nĩ Jehova-rĩ, nĩakanjokia gũkũ, na nĩagatũma njoke kuona ithandũkũ rĩrĩ hĩndĩ ĩngĩ, o na gĩikaro gĩake;

²⁶no rĩrĩ, angĩkanjĩra ũũ: Ndikenagio nĩwe, atĩrĩrĩ, gũtirĩ ũndũ; ndĩkĩrĩ o haha, nake nĩanjĩke o ta ũrĩa ekuona kwagĩrĩire.

²⁷O na ningĩ mũthamaki agĩkĩũria Zadoku mũthĩnjĩri-Ngai atĩrĩ, Githĩ wee tiwe mũndũ ũrĩa muoni maũndũ? Coka itũũra-inĩ na thayũ, mwĩ na ariũ anyu erĩ, Ahimaazu mũrũguo, o na Jonathani, mũrũ wa Abiatharu.

²⁸Atĩrĩrĩ, niĩ-rĩ, ngwĩikarĩra mariũko-inĩ ma werũ-inĩ, o nginya hĩndĩ ĩrĩa ũkandehithĩrie ũhoro ũnjĩre ũrĩa maũndũ matariĩ.

²⁹Tondũ ũcio Zadoku na Abiatharu magĩkĩoya ithandũkũ rĩu rĩa Ngai, makĩrĩinũkia Jerusalemu; nao magĩikara o kuo.

³⁰Nake Daudi agĩkĩgera rĩambatĩro-inĩ rĩa kĩrĩma kĩa Mĩtamaiyũ, agĩkĩambata o akĩrĩraga; nake agĩkorũo ehumbĩte mũtwe, na agĩthiĩ e magũrũ matheri; nao andũ othe arĩa maambatanirie nake makĩĩhumba mĩtwe yao mũndũ o mũndũ, nao magĩkĩambata o makĩrĩraga.

³¹Na rĩrĩ, mũndũ ũmwe akĩhe Daudi ũhoro, akĩmwĩra atĩrĩ, Ahithofeli e ndundu-inĩ ya njũkanĩrĩro ya arĩa me na Abisalomu. Nake Daudi agĩkĩhoya Ngai, akiuga atĩrĩ, Wee, Jehova, ndagũthaitha ũgarũre kĩrĩra kĩa Ahithofeli, ũgĩtue ũrimũ mũtheri.

³²Na gũgĩkinya atĩrĩ, atĩ Daudi aakinya o igũrũ gacũmbĩrĩ ka rĩambatĩro-inĩ rĩu, o handũ harĩa haahoyagĩrũo Ngai-rĩ, Hushai, Mũariki, agĩkinya harĩ we akamũtũnge, arĩ na igoti itembũkangu, na akeitĩrĩria tĩri mũtwe.

³³Nake Daudi agĩkĩmwĩra atĩrĩ, Ũngĩtuĩka nĩũgũtwarana na niĩ na kũu mbere-rĩ, nĩngũnyarirĩka mũno nĩ ũndũ waku.

³⁴No rĩrĩ, ũngĩhũndũka ũcoke ĩtũũra-inĩ, wĩre Abisalomu atĩrĩ, Nĩngũtuĩka ndungata yaku, wee mũthamaki ũyũ; o ta ũrĩa ndarĩ ndungata ya thoguo tene, ũguo noguo ngũtuĩka ndungata yaku rĩu; hĩndĩ ĩo nĩguo ũngĩ’hootera kĩrĩra kĩrĩa Ahithofeli ekũheana.

³⁵Ningĩ-rĩ, githĩ kũu mũtikĩrĩ na Zadoku o na Abiatharu, arĩa athĩnjĩri-Ngai? Tondũ ũcio nĩgũtuĩke atĩrĩ, atĩ ũndũ ũrĩa wothe ũrĩigua ũkĩario kũu nyũmba ya mũthamaki ũcio, ũwĩre Zadoku na Abiathari, acio athĩnjĩri-Ngai.

³⁶Na atĩrĩrĩ, kũu nĩkuo marĩ na ariũ ao erĩ, Ahimaazu wa Zadoku, o na Jonathani wa Abiatharu; naguo ũndũ ũrĩa wothe mũrĩigua, ndehithĩriei na andũ acio.

³⁷Tondũ ũcio Hushai, mũratawe wa Daudi, agĩgĩcoka itũũra-inĩ rĩu; nake Abisalomu agĩgĩkinya kũu Jerusalemu.