2 Samuel 22

¹Nake Daudi agĩkĩarĩria Jehova na ciugo cia rũĩmbo rũrũ hĩndĩ ĩrĩa Jehova aamũhonokirie akĩmũruta moko-inĩ ma thũ ciake ciothe, o na guoko-inĩ gwa Saulu;

²agĩkiuga atĩrĩ, Jehova-rĩ, nĩwe rũaro rũakwa rũa ihiga, nĩ kĩhingo gĩakwa kĩa hinya, o na nowe mũ’hatũri; nĩ wakwa hatarĩ nganja;

³Nĩwe Mũrungu, o we ndũmba yakwa ya ihiga, ĩrĩa ndahagĩra, Ningĩ ngo yakwa, o naruo rũhĩa rũrĩa rũ’honokagia, o na nowe rĩangĩro rĩakwa rĩakĩtwo handũ haraihu na igũrũ, o na ũũrĩro wakwa; Wee mũhonokia wakwa, nĩwe ũ’honokagia, ndige kũguthũkĩrũo nĩ andũ na hinya.

⁴Ngayagĩra Jehova, o ũcio wagĩrĩire kũgoocagwo; Ngakĩhonokio harĩ thũ ciakwa.

⁵Ndihũ cia gĩkuũ nĩciahĩtĩrĩirie, Nayo mĩiyũro ya wanangi ĩkĩndua nda;

⁶Mĩgeto ya Kwa-ngoma nĩyo yeĩ’thiorereirie, Ngagwatwo nĩ mĩtego ya gĩkuũ.

⁷Ndĩ na mĩnyamaro ĩo, ngĩitĩka gũkaĩra Jehova; Ti-itherũ ndarĩrĩire Ngai wakwa; Mũgambo wakwa we nĩaakĩũiguire e thĩinĩ wa hekarũ yake, Kĩrĩro gĩakwa gĩkĩmũkinyĩra o matũ-inĩ make.

⁸Hĩndĩ ĩo thĩ ĩgĩkĩrika kwerera o ĩgĩtetemaga, O nacio itina cia matu-inĩ ikĩenyenya O ikĩereraga, nĩ tondũ we nĩaakanirũo nĩ marakara.

⁹Hagĩkĩambata ndogo yumĩte maniũrũ-inĩ make, Naguo mwaki ũkiuma kanua gake, ũkĩninana, O nginya makara makĩya kũrĩrĩmbũkio nĩguo.

¹⁰Agĩcuhĩrĩria matu, agĩikũrũka thĩ, Na makinya-inĩ make no nduma ndumanu haarĩ.

¹¹Nake agĩgĩthiĩ akuuĩtwo nĩ kerubi, e rĩera-inĩ; Ĩĩ, ti-itherũ onirũo akuuĩtwo nĩ mathagu ma rũhuho;

¹²Nayo nduma aamĩtuire ta hema ĩmũthiũrũrũkĩirie na mĩena yothe, O ya maĩ macokanĩrĩire hamwe, o mo matu marĩa mathimbu mũno ma igũrũ.

¹³Tondũ wa ũkengi ũrĩa warĩ harĩ we, Makara ma mwaki makĩya kũrĩrĩmbũka.

¹⁴We Jehova agĩkĩrurumia marurumĩ e kũu matu-inĩ, Nake Ũrĩa-wĩ-igũrũ-mũno akĩruta mũgambo wake.

¹⁵Aaikanirie mĩguĩ, akĩhurunja thũ, Agĩcirehithĩrie rũheni, agĩcinyaagia.

¹⁶Hĩndĩ ĩo ndĩra cia iria ĩkĩonekana, Nacio itina cia thĩ igĩkĩhumbũrio, Nĩ ũndũ wa ũrĩa Jehova aarũithanĩtie, O na ũndũ wa itiiha rĩa mĩrukĩ ya maniũrũ make.

¹⁷Aatambũrũkirie guoko arĩ o igũrũ, akĩ’nyita, Akĩngucia, akĩnduta maĩ-inĩ macio mang’etu.

¹⁸Nĩaa’honokirie akĩndeithũra harĩ thũ yakwa ĩrĩa yarĩ na hinya, Akĩnduta kũrĩ acio a’thũũri, nĩ gũkorũo maarĩ nding’ũri kũngĩra.

¹⁹Maa’harũkĩire mũthenya ũrĩa ndarĩ na mũtino, No Jehova nĩwe watuĩkire mũndiirĩrĩri.

²⁰Aanyumirie na nja, akĩndwara kũndũ kwariĩ; Aa’tharire, akĩnduta ũgwati-inĩ, nĩ ũndũ nĩekenagĩra nĩ niĩ.

²¹Jehova aa’thukĩire maũndũ maringaine na ũthingu wakwa; O ta ũguo moko makwa matherete-rĩ, ũguo noguo a’thukĩire,

²²Nĩ ũndũ ndũire nũmĩrĩire njĩra cia Jehova, Na ndirĩ ndaaganĩra Ngai wakwa ngĩĩnyegenyũra harĩ we.

²³Nĩ gũkorũo matuĩro make mothe maaikaraga o mbere yakwa, O naho ha ũhoro wa irĩra cia watho wake, ndirĩ ndacithengera,

²⁴O na ningĩ ngĩonwo nĩwe-rĩ, ndiarĩ ũcuke, Na ngerĩithagia njeherere waganu wakwa.

²⁵Tondũ ũcio Jehova nĩa’thukĩire ithuka rĩringaine na ũthingu wakwa, O ta ũrĩa ’therete ngĩonwo na maitho make.

²⁶Wee-rĩ, harĩ ũrĩa mũigua tha, ũrĩĩonanagia o nawe wĩ mũigua tha, Na harĩ ũrĩa ũtarĩ ũcuke-rĩ, ũrĩĩonanagia atĩ ndũrĩ ũcuke;

²⁷Harĩ ũrĩa mwĩtheria ũrĩĩonanagia wĩ mũtheru, Naho harĩ mbũra-matũ, ũrĩĩonanagia wĩ mũmũhutatĩri;

²⁸Nao arĩa athĩnie-rĩ, wee nĩwe ũmahonokagia, No rĩrĩ, maitho maku maroranagia na andũ a rũng’athio, nĩguo ũmaagithie bata.

²⁹Nĩ ũndũ atĩrĩ, wee Jehova nĩwe tawa wakwa, Nake Jehova nĩwe ũtũmaga nduma yakwa ĩtuĩke ũtheri.

³⁰Amu tondũ waku ndahota gũtharĩkĩra mbũtũ ng’ima, Ningĩ tondũ wa Ngai wakwa ndahota kũrũũga rũirigo.

³¹Mũrungu-rĩ, njĩra yake nĩ nginyanĩru, Naguo uuge wa Jehova nĩ mũthuranĩre; Nĩwe ngo ya arĩa othe megiritanagia nake,

³²Amu-rĩ, nũ ũngĩ Mũrungu thengia o Jehova? O na ningĩ-rĩ, nũ ũngĩ rũaro rũa ihiga thengia o Ngai witũ?

³³Mũrungu nĩwe kĩhingo gĩakwa kĩrĩa kĩrũmu mũno, Ningĩ nĩwe wonagĩrĩria mũndũ ũrĩa ũtarĩ ũcuke mĩthiĩre yake.

³⁴Atũmaga magũrũ makwa magĩe ihenya ta ma thwariga ya mũgoma, Agakĩnginyia kũndũ gwakwa kũrĩa gũtũũgĩru.

³⁵Wee nĩwe ũmenyithagia moko makwa mũrũĩre wa mbaara, O nginya icoka ciakwa igakĩhota kũhaca ũta wa gĩcango.

³⁶O na ningĩ-rĩ, wee nĩwe ũ’heete ngo ĩrĩa ya ũhonokania waku, Naguo ũhoreri waku nĩguo ũ’nenehetie.

³⁷Wee nĩwe ũnjaramĩirie ũthiĩro wa makinya makwa, Magũrũ makwa magakĩaga gũtirũka.

³⁸Thũ ciakwa ndĩciteng’eretie ngacinina biũ, O na ndiigana kũhũndũka o nginya hĩndĩ ĩrĩa cianinirũo o kũninwo biũ.

³⁹Nĩ kũnina ndĩcininĩte biũ, ngacihehenjanga itikanacoke kwarahũka; Ti-itherũ nĩ kũgũa igũĩte makinya-inĩ makwa.

⁴⁰Nĩ ũndũ wee ũ’hotorete ũhoti wa kũrũa mbaara, Ugagĩtũma arĩa maanjũkĩrĩire, makurumanĩre harĩ niĩ,

⁴¹O na ũgĩtũma thũ ciakwa inyonie ciande, Nĩ getha andũ arĩa ma’thũũrĩte ndĩmang’ũrie biũ.

⁴²Nĩmaacũthangĩrĩirie, no mationire wa kũmahonokia, O nginya magĩkaĩra Jehova, no ndaigana kũmetĩka.

⁴³Hĩndĩ ĩo ngĩkĩmamemenda magĩtuĩka o ta rũkũngũ rũa thĩ, Ngĩmarangĩrĩria thĩ o ta ndoro ya njĩra-inĩ, ngĩcoka ngĩmanyaagia kũndũ guothe.

⁴⁴Ningĩ nĩwe ũ’honoketie, ũkanduta ngiano-inĩ ya andũ akwa, O na ũkanjikaria wega nĩguo nduĩke mũtongoria wa ndũrĩrĩ; Na rũruka rũa andũ itoĩ nĩrũkandungatagĩra.

⁴⁵Andũ a kũngĩ-rĩ, nĩmarĩĩ’nyihagĩria, O rĩrĩa maaigua ngumo yakwa makagwata o kũnjathĩkĩra.

⁴⁶Andũ acio a kũngĩ-rĩ, no kũhinyara makahinyara, Nao magoka makĩinainaga moimĩte na kũrĩa mehingĩire.

⁴⁷Jehova atũũraga muoyo; o we rũaro rũakwa rũa ihiga arogathwo; We Ngai ũrĩa rũaro rũa ihiga rũa ũhonokio wakwa arotũũra atũũgĩrĩte;

⁴⁸Nowe Mũrungu ũrĩa ũndĩhagĩria, O na akanyihia ndũrĩrĩ agatũma ndĩciathe.

⁴⁹Nĩwe ũnyumagaragia akanduta harĩ thũ ciakwa; Ĩĩ-ni, nĩwe ũndũũgagĩria ngakĩra arĩa manjũkagĩrĩra; Wee nĩwe ũ’honokagia ũkandeithũra harĩ mũndũ ũrĩa mũtoi.

⁵⁰Tondũ ũcio no ngũcokagĩrie ngatho, wee Jehova, ndĩ thĩinĩ wa ndũrĩrĩ, O narĩo rĩĩtwa rĩaku ndĩrĩinagĩre nyĩmbo ngĩrĩgooca.

⁵¹Mũthamaki wake-rĩ, nĩatũmaga one ũhonokio mũnene; Mũndũ wake mũitĩrĩrie maguta nĩamũtugaga, O we Daudi na mbeũ yake tene na tene.