Ecclesiastes 7

¹Nĩ kaba ngumo njega gũkĩra maguta ma goro marĩa manungaga wega: o na mũthenya wa gũkua, gũkĩra mũthenya wa gũciarũo.

²Nĩ kaba gũceera mũciĩ wĩ kĩrĩro, gũkĩra gũthiĩ mũciĩ wĩ iruga: nĩ ũndũ gĩkuũ nĩkĩo kĩninaga andũ othe; nao arĩa me muoyo no matũũre maririkanaga ndeto icio.

³Nĩ kaba kĩeha gũkĩra mĩtheko; nĩ ũndũ gũtuka gĩthiithi nĩgũtũmaga ngoro yagĩre.

⁴Ngoro cia andũ arĩa ogĩ-rĩ, ikoragwo ikĩrũmbũiya ũhoro wa mũciĩ ũrĩa wĩ kĩrĩro, no ngoro cia irimũ irũmbũyagia ũhoro wa mũciĩ ũrĩa wĩ gĩkeno.

⁵Nĩ kaba kũigua irũithia rĩa andũ arĩa ogĩ gũkĩra kũigua rũĩmbo rũa irimũ.

⁶Nĩ ũndũ o ta ũrĩa mwaki wa mĩigua ũtũratũrĩkaga wĩ nguruĩ ya nyũngũ, ũguo noguo mĩtheko ya kĩrimũ ĩtariĩ; ũndũ ũcio o naguo no

⁷wa tũhũ Ti-itherũ ũtunyani nĩũtũmaga mũndũ mũũgĩ akĩge, na ihaki rĩgate ũtaũku wa gũtaũkĩrũo maũndũ wega.

⁸Nĩ kaba kĩrĩkĩrĩro-inĩ kĩa ũndũ, gũkĩra kĩambĩrĩria-inĩ kĩaguo; nĩ kaba mũndũ wĩ ngoro ĩĩ gĩeterero gũkĩra ũrĩa wĩ ngoro ya mwĩtĩo.

⁹Tigaga kũhiũha kũrakara na ngoro yaku; nĩ ũndũ marakara matũũraga ngoro-inĩ cia irimũ.

¹⁰Tigaga kuuga atĩrĩ, Nĩ kĩ gĩatũmire matukũ ma tene maagĩre gũkĩra matukũ maya? Nĩ ũndũ ha ũhoro ũcio, ndũrĩ na ũũgĩ ũkĩũũria.

¹¹Ũũgĩ nĩ mwega o ta igai; ĩĩ, nĩwagĩrĩte makĩria harĩ arĩa monaga riũa.

¹²Nĩ gũkorũo ũũgĩ nĩ mwĩgito; o ta ũrĩa mbia irĩ mwĩgito; no rĩrĩ, wega wa ũmenyi maũndũ nĩ ũyũ, atĩ ũũgĩ nĩũtũũragia mũndũ muoyo ũrĩa wĩ naguo.

¹³Ta wĩtaranie wĩra wa Ngai; kũndũ kũrĩa ogomirie-rĩ, nũ ũngĩhota gũkũrũnga?

¹⁴Mũthenya ũrĩa ũgaacĩire-rĩ, iyũrũo nĩ gĩkeno, o naguo mũthenya wa mũtino-rĩ, gĩĩcirie; nĩ ũndũ Ngai nĩaatũmire mĩthenya ĩo ĩtwarane, nĩ getha mũndũ ndakanamenye maũndũ marĩa makoneka thutha wake.

¹⁵Maũndũ maya mothe ndamonire matukũ-inĩ makwa ma ũkĩgu; nĩkũrĩ mũndũ mũthingu ũgĩaga gũkua o na ũthingu wake, na nĩkũrĩ mũndũ mwaganu wĩraihagĩria muoyo o agĩĩkaga maũndũ moru.

¹⁶Tiga gũthinga makĩria, kana kũũhĩga makĩria; ũkwenda kwĩũraga nĩkĩ?

¹⁷Tiga kwagana makĩria, kana gũkĩga; ũkwenda gũkua hĩndĩ yaku ĩtanakinya nĩkĩ?

¹⁸Nĩ wega wĩrute ũndũ ũcio; ĩĩ, ti-itherũ, o na ũtige kwĩamũra harĩ ũrĩa ũngĩ; nĩ ũndũ-rĩ, ũrĩa wĩtigagĩra Ngai nĩakahĩtũkana na macio mothe.

¹⁹Ũũgĩ nĩguo wĩkagĩra mũndũ mũũgĩ hinya gũkĩra aathani ikũmi arĩa me itũũra-inĩ.

²⁰Ti-itherũ hatirĩ mũndũ mũthingu gũkũ thĩ wĩkaga o wega mũtheri, na ndehagia.

²¹Ningĩ-rĩ, tigaga gũthikĩrĩria ndeto ciothe iria ikwario, nĩ getha hihi ndũkaigue ndungata yaku ĩgĩkũruma.

²²Nĩ ũndũ ngoro yaku o nayo nĩyũĩ atĩ kaingĩ o nawe, wee mwene, nĩũrumĩte andũ angĩ o ta ũguo.

²³Maũndũ macio mothe ndamatuĩririe na ũũgĩ: ngiuga atĩrĩ, Nĩngũũhĩga; no rĩrĩ, ũũgĩ warĩ haraya na niĩ.

²⁴Maũndũ marĩa marĩ kuo-rĩ, me haraya na niĩ, na makarikĩra mũno; nũ ũngĩkĩhota kũmamenya?

²⁵Ndehũgũrire-ĩ, nayo ngoro yakwa ĩkĩgeria kũmenya, na gũtuĩria, o na kũmatha ũũgĩ na gĩtũmi kĩa maũndũ, o na kũmenya atĩ waganu nĩ ũkĩgu, o naguo ũkĩgu nĩ ũgũrũki:

²⁶ngĩgĩcoka ngĩona ũndũ mũrũrũ gũkĩra gĩkuũ, naguo nĩ wa mũtumia ũrĩa wĩ ngoro ĩtariĩ ta mĩtego, o na ta ndigi ngonjanie cia kũgwatia, o namo moko make makahaana o ta nga: mũndũ ũrĩa wothe ũkenagia Ngai-rĩ, nĩakahonoka harĩ we; no rĩrĩ, mũndũ ũrĩa mwĩhia nĩagakumbatwo nĩwe.

²⁷Atĩrĩrĩ, ũndũ ũcio nĩndĩwonete, ũguo nĩguo Mũhunjia ekuuga, ngĩringanagia ũndũ ũmwe na ũngĩ, nĩguo ’menye ũrĩa itũmi cia maũndũ itariĩ;

²⁸nacio nĩcio ngoro yakwa ĩtũire ĩcaragia, no ndirĩ ndaciona; nyonete o mũndũ mũrũme ũmwe thĩinĩ wa andũ ngiri; no ndirĩ ndona mũndũ-wa-nja o na ũmwe thĩinĩ wao othe.

²⁹Atĩrĩrĩ, ũndũ ũyũ wiki noguo nyonete, atĩ Ngai nĩombire andũ marĩ athingu; no rĩrĩ, o ene nĩmecarĩirie mawara maingĩ.