Ecclesiastes 6

¹Nĩkũrĩ ũũru nyonete gũkũ thĩ kwaraga riũa, naguo nĩũritũhagĩra andũ mũno.

²Naguo nĩ wa mũndũ ũrĩa ũheagwo nĩ Ngai ũtonga, na indo, o na gĩtĩo, na ndangĩkorũo aagĩte kĩndũ o na kĩ kĩa indo ciothe iria eriragĩria na ngoro yake; no rĩrĩ, Ngai akaaga kũmũhe hinya wa kũrĩa indo icio, no ikarĩagwo nĩ mũgeni; ũndũ ũcio o naguo no wa tũhũ, na nĩ mũrimũ mũũru.

³O na mũndũ angĩciara ciana igana, na atũũre mĩaka mĩingĩ, o nginya matukũ ma mĩaka yake maingĩhe mũno, no aage gũkorũo aiyũrĩtwo nĩ wega ngoro, o na ningĩ makĩria akaaga gũthikwo aakua-rĩ, niĩ nguuga atĩrĩ, nĩakĩrĩtwo nĩ kĩhuno.

⁴Nĩ ũndũ kĩhuno kĩu gĩũkaga tũhũ, na gĩgathirĩra o nduma-inĩ, na rĩĩtwa rĩakĩo rĩkahumbwo nĩ nduma o ro ĩo:

⁵o na ningĩ kĩagĩte kuona riũa, kana kũrĩmenya: kĩu-rĩ, nĩkĩgĩaga na ũhurũko gũkĩra mũndũ ũcio;

⁶ĩĩ, ti-itherũ ũguo nĩguo, o na angĩtũũra mĩaka ngiri maita merĩ, na aage maũndũ mega ma kũmũkenia; githĩ othe matigĩthiaga o handũ hamwe?

⁷Mĩĩtungumanio yothe ya mũndũ nĩ ya kũiyũria kanua, no rĩrĩ, ngoro ndĩthiragwo nĩ mũhaaha.

⁸Mũndũ ũrĩa mũũgĩ-rĩ, akĩrĩte kĩrimũ na kĩ? O na kana mũndũ ũrĩa mũkĩa ũmenyaga gwĩtwara wega mbere ya arĩa me muoyo?

⁹Nĩ kaba gũcũthĩrĩria kĩrĩa gĩkuoneka gũkĩra mũcuracurĩko wa merirĩria; o naguo ũndũ ũcio, no wa tũhũ na gwĩthĩnia gũtheri.

¹⁰Maũndũ mothe maanagĩa muoyo-rĩ, nĩmaaheirũo marĩĩtwa mamo gwata o tene, nake mũndũ nĩamenyekete ũrĩa atariĩ, atĩ ndangĩhota gũkararania na ũrĩa wĩ hinya kũmũkĩra.

¹¹Na rĩrĩ, kuona atĩ he maũndũ maingĩ matũmaga ndeto cia tũhũ ciongerereke-rĩ, mũndũ agunĩtwo nĩmo na njĩra ĩrĩkũ?

¹²Nĩ ũndũ-rĩ, nũ ũngĩmenya maũndũ marĩa mũndũ aagĩrĩirũo nĩmo ihinda rĩrĩa e muoyo, o matukũ mothe ma muoyo wake wa tũhũ, marĩa aninaga, magathira o ta kĩĩruru? Ningĩ-rĩ, nũ ũngĩhota kwĩra mũndũ ũrĩa gũgatuĩka thutha wa aarĩkia kwehera gũkũ thĩ kwaraga riũa?