Ecclesiastes 5

¹Cemaga ũgĩtonya nyũmba ya Ngai; nĩ ũndũ gũkuhĩhĩria ho kũigua ndeto ciake nĩ kwega gũkĩra igongona rĩrĩa rĩrutagwo nĩ irimũ, tondũ itimenyaga atĩ nĩ ũũru ireka.

²Tiga kwaria na ihenya ũtaambĩte gwĩciria, na ndũgetĩkĩrie ngoro yaku ĩhiũhe kuuga ũndũ mbere ya Ngai; tondũ Ngai arĩ igũrũ, no wee ũrĩ thĩ; tondũ ũcio nĩwagĩrĩirũo nĩ kũnyihia ciugo ciaku.

³Tondũ ũingĩ wa mĩhang’o ũtũmaga mũndũ arote, na ũingĩ wa ndeto wonanagia atĩ nĩ kĩrimũ kĩraaria.

⁴Rĩrĩa wehĩta mwĩhĩtwa harĩ Ngai, ndũkanahũthĩrĩrie kũũhingia; nĩ ũndũ we ndakenagio nĩ irimũ: hingia mwĩhĩtwa waku.

⁵Nĩ kaba ũtige kwĩhĩta, gũkĩra kwĩhĩta na ũkaaga gũkũhingia.

⁶Ndũkanareke kanua gaku gatũme mwĩrĩ waku wĩhie; o na ndũkanoigĩre mbere ya mũraika atĩ uuge waku no ihĩtia: kaĩ Ngai angĩrakario nĩ uuge waku nĩ ũndũ kĩ, na athũkie wĩra wa moko maku?

⁷Na rĩrĩ, wee wĩtigĩre Ngai, nĩ ũndũ iroto na ndeto nyingĩ nĩ cia tũhũ.

⁸Ũngĩona ngĩa ikĩhinyĩrĩrio, o na itua rĩa cira o na kĩhooto igĩthengio na ũhinya ciumio bũrũri, ndũkanamake nĩ ũhoro; nĩ ũndũ nĩkũrĩ mũnene gũkĩra anene arĩa angĩ ũrarũmbũiya ũhoro ũcio; na nĩkũrĩ angĩ anene kũrĩ o.

⁹Na rĩrĩ, bũrũri ũgunagwo na mĩena yothe rĩrĩa mũthamaki waguo e na ũtungatĩri wa mĩgũnda ĩrĩa mĩrĩme.

¹⁰Mũndũ ũrĩa wendaga betha-rĩ, ndarĩ hingo akaigania betha; o nake ũrĩa wendaga indo nyingĩ ndarĩ hingo akaiganwo nĩ wongereri: ũndũ ũcio o naguo no tũhũ.

¹¹Hĩndĩ ĩrĩa indo ingĩongerereka-rĩ, o nao acirĩi nĩmongererekaga; mwene cio akĩgunĩkĩte na njĩra ĩrĩkũ, tiga o gũciĩrorera na maitho?

¹²Toro wa mũndũ ũrĩa ũrutaga wĩra nĩ mwega, o na angĩrĩa irio nyinyi kana nyingĩ; no rĩrĩ, hũni ya gĩtonga-rĩ, ndĩngĩreka kĩone toro.

¹³Nĩharĩ ũndũ mũũru mũno nyonete gũkũ thĩ kwaraga riũa, naguo nĩ ũtonga ũrĩa wĩigagĩrũo o nginya mwene guo akaya kwĩyũnũha naguo.

¹⁴Naguo ũtonga ũcio ũkaya gũthirĩra o mĩtangĩko-inĩ ya ũũru, na angĩciara kahĩĩ, agakorũo atarĩ na kĩndũ moko-inĩ.

¹⁵O ta ũrĩa oimire nda ya nyina-rĩ, ũguo noguo agacoka gũthiĩ e njaga, o ta ũguo okire, na ndarĩ kĩndũ o na kĩ agakuua kiumanĩte na metungumania ma wĩra wake, o kĩrĩa angĩkuua na moko make.

¹⁶Naguo ũndũ ũcio no mũũru, atĩ maũndũ-inĩ mothe-rĩ, o ta ũguo okire, noguo agathiĩ; nake ũrĩa wĩtungumanagia enyitĩre rũhuho-rĩ, onaga uumithio ũrĩkũ?

¹⁷Matukũ-inĩ make mothe arĩaga e na nduma, na gwĩtanga agetangaga na mĩrimũ na marakara.

¹⁸Atĩrĩrĩ, ũndũ ũrĩa nyonete ũrĩ mwega nĩ mũndũ arĩage na anyuage, na ekenagie na wĩra wake wothe ũrĩa etungumanagia naguo gũkũ thĩ kwaraga riũa, matukũ mothe ma muoyo wake ũrĩa aheetwo nĩ Ngai; nĩ ũndũ rĩu nĩrĩo igai rĩake.

¹⁹O na mũndũ o wothe aaheo ũtonga na indo, na hinya wa kũrĩa indo icio, na wa kũnyita igai rĩake, o na wa gwĩkenia na wĩra wake-rĩ, kĩu nĩkĩo kĩheo aheetwo nĩ Ngai.

²⁰Amu ndakaririkana mũno matukũ ma muoyo wake, tondũ Ngai nĩamũikaragia na gĩkeno kĩa ngoro.