Ecclesiastes 4

¹Ningĩ gũkũ thĩ kwaraga riũa-rĩ, ndacokire ngĩona maũndũ marĩa mahinyanagĩrĩrio namo, ngĩkĩona maithori ma arĩa ahinyĩrĩrie, no matiarĩ na mũmahoreria; na mwena-inĩ wa arĩa mekũmahinyĩrĩria, kwĩ na hinya, no acio ahinyĩrĩrie matiarĩ na mũmahoreria.

²Tondũ ũcio ngĩkĩgatha andũ arĩa akuũ, o acio mekuĩrĩire o gatene, gũkĩra arĩa matigĩtwo muoyo, o acio me muoyo o na rĩu;

³no rĩrĩ, gũkĩra andũ a mĩthemba ĩo yerĩ-rĩ, nĩ mũndũ ũrĩa ũtarĩ waciarũo, o ũcio ũtarĩ wona maũndũ moru marĩa mekagwo gũkũ thĩ kwaraga riũa.

⁴Ningĩ ngĩkĩona wĩtungumanio wothe, o na mawĩra mothe marĩa marutagwo na ũũgĩ, atĩ moimanaga na mũndũ kũiguĩra ũrĩa ũngĩ ũiru. Ũndũ ũcio o naguo no wa tũhũ na gwĩthĩnia gũtheri.

⁵Kĩrimũ kĩĩgwatanagĩria moko, na gĩkerĩaga nyama cia mwĩrĩ wakĩo.

⁶Nĩ kaba kũiyũkia rũhĩ rũgima na ũhoreri gũkĩra kũnyita na ngundi igĩrĩ na mwĩtungumanio wa gwĩthĩnia gũtheri.

⁷Ningĩ gũkũ thĩ kwaraga riũa-rĩ, ngĩcoka ngĩona ũndũ wa tũhũ.

⁸Nĩkũrĩ mũndũ wa mũmwe, ũtarĩ na mũrunawe, ĩĩ, ti-itherũ ndarĩ mũriũ, kana mũrũ wa nyina; no rĩrĩ, ndathiragwo nĩ mwĩtungumanio, o na kana maitho make makahũna ũtonga. Nake oigaga atĩrĩ, Ndĩgĩĩtungumanagĩria ũ, ngĩimaga ngoro yakwa kwĩhũnĩrĩria maũndũ mega? Ũndũ ũcio o naguo nĩ wa tũhũ, ĩĩ, ti-itherũ nĩ wa gũtangĩka kũnene.

⁹Nĩ kaba andũ erĩ gũkĩra ũmwe, nĩ gũkorũo nĩmonaga uumithio mwega wa gwĩtungumania kwao.

¹⁰Nĩ ũndũ mangĩgũa thĩ, ũmwe no oe ũrĩa ũngĩ; no rĩrĩ, mũndũ ũmwe angĩgũa, na ndarĩ wa kũmuoya na igũrũ, kaĩ arĩ na haaro-ĩ!

¹¹Ningĩ-rĩ, andũ erĩ mangĩkoma hamwe nĩmaiguithanagia ũrugarĩ; no mũndũ e wiki-rĩ, aakĩĩiguithia ũrugarĩ atĩa?

¹²O na mũndũ angĩhoota mũndũ ũrĩa wĩ wiki-rĩ, erĩ maahota kũmwĩtiiria; na mũhĩndo mũrame na ndigi ithatũ ndũngĩtuĩka narua.

¹³Nĩ kaba mwanake mũkĩa na mũũgĩ, gũkĩra mũthamaki mũkũrũ mũkĩgu, ũrĩa ũtangĩcoka gũtaarĩka.

¹⁴Nĩ gũkorũo oimire korokoro-inĩ atuwo mũthamaki; no ũcio ũngĩ, o na aciarĩirũo ũthamaki-inĩ wake, agĩtuĩka o mũkĩa.

¹⁵Ndakĩonire atĩ andũ othe arĩa marĩ muoyo gũkũ thĩ kwaraga riũa, me mwena wa mwanake ũcio, o we ũcio wa kerĩ, ũrĩa warũgamĩte handũ-inĩ hake.

¹⁶Andũ othe arĩa maathagwo nĩwe matingĩtarĩka; no rĩrĩ, arĩa magoka thutha-rĩ, matikamũkenera. Ĩĩ, ti-itherũ ũndũ ũcio o naguo no wa tũhũ, na gwĩthĩnia gũtheri.